養生壺~五指毛桃伏苓湯

响淘寶淘咗幾包1人湯水料包，

最適合用嚟燉湯；

今次我用養生壺嚟煲湯，

加咗半個紅蘿蔔和$20瘦肉，

個湯水清清哋都唔錯架!

4~5碗水，

放入養生壺和其他材料，

按煲湯功能，

煲完落鹽調味就飲得啦!

由於呢個湯包係一人份，

個人覺得適合用嚟燉湯呀!

惠州2日1夜自由行

噚日12月29日，

我、老公和大魔怪，

連同大魔怪女朋友仔1家(母親連妹妹)，

一行6人返惠州飲飲食食，

我和老公係地頭蟲，

緊係要帶佢哋去惠州西湖行下啦!

6人包車350人仔，

由蓮塘口岸出發至惠州西湖步行街落車。

上到去11點半左右，

先去西湖行下影下相先。

魷魚蒸肉片

今晚老公指定話要食魷魚蒸肉片，

魷魚片响大亞灣買的，

好鮮味，

有機會會再去買呀!

紅燒牛三寶~牛腩、金錢肚、牛筋

今朝炆咗一大鍋紅燒牛三寶~牛腩、金錢肚、牛筋，

材料全部都係佳寶買，

啱啱開箱，

亞姐仲幫我揀咗舊靚靚金錢肚，

牛腩、金錢肚和熟牛筋，

買咗差不多$150，

老公話咁大鑊邊食得哂，

唔怕喎，

我裝起放入冰箱，

下次食時再加個蘿蔔落去一齊煮，

嘻嘻，

咁咪又慳一餐囉!

男人的浪漫~豆腐炆火腩

雪櫃仲有少少燒肉，

今日買咗盒豆腐返嚟，

煮咗呢鍋男人的浪漫~豆腐炆火腩；

火腩配豆腐，

真係絕配呀!

2023聖誕party

今日係黃氏一年一度聖誕party嘅日子，

以往我哋會係元旦附近日子開party架!

但姐姐姐夫和妹妹一家共5人，

明天要去日本旅行，

所以改咗今日開聖誕party，

晚飯後，

抽獎時候又到喇!

睇下今年大家有冇抽到啱心水禮物啦!

平安夜晚餐

今日平安夜，

大魔怪同女朋友仔入咗迪士尼玩，

而小魔怪就留係屋企陪我倆老食晚飯，

花膠瑤柱雲吞雞、氣炸燒排骨、蜜糖豆炒臘肉，

簡簡單單渡過2023年嘅平安夜!

韭菜雞蛋豬肉餃&韭菜盒子

今日包咗韭菜雞蛋豬肉餃，

1斤餃子皮包咗63隻，

仲剩餃子皮和韭菜餡料，

整咗幾個韭菜盒子做小食，

煎到脆卜卜，

點少少泰式雞醬，

好好味道架!

冬至快樂

今日冬至，

天氣非常寒冷，

天水圍得8度，

但體感就更凍喇!

今日早上同老公要返大陸辦事，

所以我哋一早就出咗門喇!

寒風凜凜，

大家都著到成隻糭咁，

保暖最重要；

我哋下午經過蓮塘口岸返香港，

老公見到餐廳有豬腳薑賣56蚊(人仔)，

裡面有4舊豬腳、4隻蛋和好多薑，

明火加熱就食得，

味道又唔差，

都幾抵食喎!

仲有燒肉55蚊斤(人仔)，

呢盒買咗68蚊(人仔)，

脆皮又唔肥，

正呀!

可惜大小魔怪今晚兩個都唔返嚟食飯，

唔緊要啦!

等我和老公慢慢嘆先得。

雪梨海底椰紅蘿蔔粟米煲西施骨

噚日係惠州買咗雪梨乾，

今日見天氣寒冷，

拿拿臨買齊材料返嚟煲啖熱湯飲下，

暖下胃和潤下喉嚨先得。

帶母親大人返惠州

噚日星期二，

我和老公兩個人，

帶母親大人返惠州；

我哋一早提醒佢要著厚少少衫和褲，

因為返大陸地區會比較凍呀!

我哋經蓮塘口岸坐永東巴士去惠州康帝酒店落車；

一落車就感受到惠州氣溫比香港低多幾度，

惠州康帝酒店鄰近惠州西湖，

我哋同母親大人到附近食完客家菜，

就行過去西湖和西湖步行街行下。

與母親大人提早過冬至

噚日，

我哋中午去咗拜祭父親大人後，

妹妹訂咗同一間酒樓飲茶和晚餐，

酒樓下午2點半過後，

俾咗間房我哋打麻雀，

後生嘅就各自活動，

晚上7點準時齊齊與母親大人提早過冬至，

酒樓晚上全廳滿座，

頭幾款餸菜都好急趕送上嚟，

直至隻燒雞就等咗超過15分鐘後先上枱，

原本的頭抽銀芽炒麵，

酒樓轉咗炆伊麵，

海鮮飯就有少少生米，

反映後再上多碟伊麵，

呢餐全包宴食咗$4988。

2023提早冬至的晚餐~雙冬羊腩煲

今日，

我哋一家4口連同大魔怪女朋友5個人，

齊齊提早過冬至；

適逢今日天氣轉涼，

最啱就係打邊爐食羊腩煲架啦!

今次我炆咗5磅羊腩，

加埋生菜、嚮鈴、金菇，

點知大小魔怪話唔夠食，

仲要加咗幾粒雜丸和台灣王子麵，

咁就飽飽囉!

雜記

今朝早餐食豬扒沙律，

見到中間果粒紅色嘢，

哈哈，

我對呢粒嘢真係冇咩興趣，

所以一早就挑走咗佢囉!

買完餸返屋企見到屋苑有聖誕裝飾，

早晚都有影咗，

又幾靚喎!

晚餐食得簡單，

菜芯肉片蝦子麵。

養生壺~竹蔗茅根海底椰雪梨湯

今日又用養生壺煲湯，

竹蔗茅根海底椰雪梨湯，

落咗5碗水，

加半個紅蘿蔔和瘦肉$15，

煲好落鹽調味，

清甜潤喉，

好好飲呀!

生菜牛丸湯

突然好想飲湯，

屋企材料有限，

摷到雪櫃有牛丸和生菜，

加埋清雞湯，

生菜牛丸湯出爐喇!

爭鮮&章魚燒

今晚，

得我和小魔怪食晚餐，

我唔想煮，

所以去爭鮮食壽司，

呢餐食咗$282，

小魔怪話唔夠飽，

所以食埋蟹膏章魚燒$42就啱啱好喇!

椒鹽豬扒

前日係百佳買咗兩pack豬扒，

做緊特價好似$70有2盒，

今日試其中盒椒鹽豬扒，

由於豬扒落咗醃料，

煎嘅時候唔好咁大火，

慢慢煎熟佢就食得，

不過我覺得用焗爐、氣炸鍋又或BBQ都應該唔錯架!

家常便飯

今朝一早煲定蓮藕湯，

仲煮埋隻豉油雞，

因為下午好忙，

我和老公去咗做選舉助選團，

今日天氣都比較熱，

大家企係太陽底下都幾辛苦架!

返到屋企頂唔順瞓咗個晏覺，

嘻嘻，

我又充滿力量喇!

麻油沙薑手撕雞

 

小魔怪係屋企食飯，

緊係要啖啖肉先滿足到佢啦!

用咗2塊雞扒拆肉，

整咗一大碟麻油沙薑手撕雞，

加咗少少鹽焗花生落去，

有咬口，

唔錯架!

氣炸蜜汁燒豬頸肉

今朝醃咗2塊豬頸肉，

諗住氣炸一塊嚟做餸，

點知食完一塊後大家都唔夠喉，

所以拿拿臨再氣炸埋另一塊，

一樣食得哂呀!

養生壺~石斛麥冬玉竹湯

呢個星期煲咗兩次呢個湯，

有呢款湯包真係好方便，

每個湯包都係3.99人民幣，

雖然份量少少，

但用個養生壺嚟煲就啱啱好喇!

加咗廿蚊瘦肉和半個紅蘿蔔一齊煲，

煲75分鐘後加鹽調味，

咁就有得飲架啦!

冬菇節瓜炆腩排

今晚兩個後生唔返嚟食晚飯，

我哋兩老又要自己撐枱腳啦!

我煮咗一個餸~冬菇節瓜炆腩排，

有瓜有肉又有冬菇，

均衡營養，

開得飯啦!

咸魚雞粒炒飯

今晚又係得我和老公兩個人食，

所以中午煮多少少飯，

留番晚上炒嚟食，

今晚煮咗咸魚雞粒炒飯，

老公話食到最後先食到有咸魚味，

哈哈，

睇嚟我要落多D咸魚先得啦!

家常便飯

噚日係蓮塘口岸買咗手撕雞和燒肉，

燒肉食哂而雞就食剩半盒，

加埋弟婦自己曬嘅臘肉炒咗碟芥蘭炒臘肉，

煎多4隻燶邊荷包蛋，

簡簡單單家常便飯又嚟啦!

返惠州

原本我哋諗住下星期先返惠州，

點知老公話想試下經蓮塘口岸返惠州喎!

好啦!

咁就噚日上咗去探路喇!

我哋過咗蓮塘口岸關後，

直行就見到個露天停車場，

再行前少少就見到永東巴士往惠州(60蚊人仔)，

我哋選擇係惠州金鑾酒店落車，

再call車返屋企都係廿蚊人仔左右咋!

呢架車車程同羅湖大巴士差不多時間，

但我慳咗搭火車錢，

我哋返惠州又多一個選擇喇!

北上半日遊

今日老公和我，

約咗Antia、老Dad、Antia細佬和朋友仔共7人，

一齊去沙田富臨飲茶，

好耐冇食過嘅炸煎堆，

真係好好味道，

仲有隻棟篤企雞又滑又嫩，

呢餐Antia請飲茶又送禮物俾我，

真係多謝呀!

魷魚筒蒸梅頭肉片

前日係大亞灣買咗魷魚筒和魷魚片返屋企，

老公即刻話要蒸嚟食，

佢話由細食到大，

用嚟送飯一流，

太好味道喇!

大亞灣郊遊記

話說Anita係英國返咗嚟香港，

大家都想去惠州行下，

所以我提議大家去大亞灣食海鮮買海味；

咁啱我前段時間第一次過蓮塘口岸時，

同個7人車司機搭訕，

加咗佢微信，

約佢車我哋(6人)去大亞灣玩半日；

噚日9點45分去蓮塘口岸，

一出關等司機嚟車我哋，

直去大亞灣霞涌黃金海岸。

豉汁鳳爪炆排骨

噚日買咗12隻炸鳳爪，

即刻買多兩條腩排，

加埋蒜頭豆豉一齊炆，

炆到D鳳爪軟腍腍，

一咬即脫骨，

真係幾正架!

超正，冇伏呀

响山姆會員商店買咗牛角酥(33.8人仔)有9個，

安格斯牛肉芝士漢堡 (89.9人仔)有6個，

牛角酥用氣炸鍋氣炸幾分鐘後，

成個牛角酥皮脆內嫩，

呢兩日我和老公差不多日日食一個，

太邪惡但好好味道囉!

今日整咗個西式早餐俾大魔怪食，

加埋杯蘋果汁，

滿足!

另外個安格斯牛肉芝士漢堡，

內裡冇醬汁，

只有安格斯牛肉扒、芝士和漢堡包，

牛肉都幾厚，

我用平底鑊落牛油慢慢煎番熱個麵包和塊牛肉扒，

冇醬汁啱哂我，

想食醬就自己加。

平均15蚊人仔嚟講，

比我預期超好食，

安格斯牛肉扒好嫩又多汁，

我落鑊煎都唔乾身，

唔錯!

所以話今次買呢兩樣嘢都係超正，

冇伏呀!

天下第一刀~蝦醬粉絲蒸豬肉

今朝未夠八點就去買豬肉，

早去俾我買咗天下第一刀，

即係梅頭肉最爽口嘅部份，

豬肉有少少肥又爽口，

用嚟炒、蒸和做叉燒都好好食架!

今晚就用咗佢嚟整咗呢碟蝦醬粉絲蒸豬肉，

豬肉和粉絲索哂蝦醬鮮味，

呢次真係要添飯呀!

黑椒雞扒炒意粉

呢碟黑椒雞扒炒意粉係前兩日我整俾小魔怪食嘅，

佢鐘意啖啖肉，

不過睇真D我加咗金菇落去一齊炒意粉；

我試過味，

煎雞扒皮脆肉嫩咸咸香香，

意粉係用黑椒醬炒，

簡單又惹味呀!

深圳福田印力中心&山姆會員商店

今日臨時約咗朋友仔北上，

先去福田印力中心搵食，

再去隔離山姆會員商店行街街；

我哋經蓮塘口岸過關，

搭地鐵2號線(唔使轉車)，

由蓮塘口岸站去僑香站A出口，

直行就到印力中心，

佢嘅旁邊就係山姆會員商店。

我哋先去印力食蒙古菜~西貝莜面村。

叉燒蛋菜粒炒飯

叉燒蛋菜粒炒飯，

用咗3隻蛋去炒3碗冷飯，

成個飯先滿蛋香，

簡單就是美!

養生壺~川貝枇杷秋梨湯

今次煲呢個湯包係川貝枇杷秋梨湯，

加咗半個紅蘿蔔和瘦肉$20，

加咗6碗水落養生壺度煲，

煲完大魔怪、老公和我每人都有2碗湯飲，

真係好鬼正架!

長洲遊2023

今日我同老公和他的舊同學，

共8人齊齊入長洲郊遊呀!

咁啱今日係長者日，

長者可以免費入長洲呀!

不過我哋早上搭快船(長者冇免費)，

不過都係收$2，

而成人$42.3。

今次行下長洲東面，

有沙灘外，

仲有好多奇石，

好特別架!

行到3點幾，

搵間茶餐廳食嘢，

就搭3點半船返中環喇!

XO醬西芹炒海鮮

今日買咗一大棵西芹$10，

摘咗幾條嚟炒蝦仁和帆立貝，

小魔怪鐘意食爽口嘅西芹，

估唔到大魔怪都一樣咁鐘意食喎!

兩個都食唔停口，

睇嚟下次要炒多D先得啦!

豉汁三色椒炒排骨

今日買咗2條腩排$50，

又唔貴喎，

加咗三色椒一齊炒，

仲要係豉汁味，

送飯一流呀!

家常便飯

今晚晚餐都係家常便飯，

榨菜木耳蒸豬肉、香煎紅腸和蠔油生菜，

等埋大魔怪返嚟食飯，

3個人食3個餸，

夠哂啦!

陪朋友返大陸睇樓

今日陪朋友上惠州十里銀灘附近睇樓，

總共睇咗2個樓盤，

有一線海景的，

又有遠望沙灘景，

各有特色；

睇完樓又去咗霞涌食海鮮，

蠔8蚊人仔1隻買咗6隻共48蚊人仔，

蟶子1扎65蚊人仔、扇貝6隻20蚊人仔，

海鮮買咗133蚊人仔，

加工費每斤10蚊(5斤8兩)，

扇貝加粉絲蒸加10蚊，

加海膽炒飯(68人仔)和炒油麥菜(28人仔)，

加飲品和茶錢，

呢餐總共食咗342人仔呀!

蟶子多到食唔噹，

我拎返屋企慢慢嘆!

老爺百歲冥壽紀念日

今日係老爺百歲冥壽，

老公叫我整碟客家炆豆腐卜，

當作紀念下老爺；

今午用老公去天瑞街市買餸，

每份帶子$30有6隻，

買咗2份收我$50，

仲送多一隻帶子俾我，

總共有13隻，

超抵呀!

今晚有客家炆豆腐卜、蒜蓉粉絲蒸帶子和三色椒炒牛肉呀!

一年一度大閘蟹宴

噚晚係老公中學同學一年一度大閘蟹宴，

今年老公同學買到嘅大閘蟹，

每隻有成8兩2~3重，

蟹價$125隻(酒樓代蒸$40隻)，

全部都係公，

D白膏好肥美，

真係超好食呀!

我和老公食咗3隻蟹(兩份食)，

加埋其他餸菜，

呢餐食咗約$800(兩個人)。

家常便飯

今日大魔怪女朋友仔嚟食飯，

簡單煮咗幾個家常菜，

酸菜魚肥牛鍋(蓮藕金菇底)、芝麻花生手撕雞、蒜蓉炒豆苗，

仲煲咗個蕃茄薯仔紅蘿蔔豬腱湯，

3餸1湯，

開飯啦!

養生壺~花旗參石斛麥冬湯

 

噚日係惠州帶返嚟嘅湯包，

今日就用養生壺煲俾老公和我飲，

我落咗4碗水去煲，

加$15瘦肉，

煲完75分鐘後，

竟然仲有4碗湯；

呢個湯包唔錯喎，

雖然材料少少哋，

但夠我和老公兩個人飲，

下次返惠州再去美團團購先得。

又hea遊惠州

小魔怪話好耐冇返惠州，

 佢個回鄉證已經過咗期，

襯12月底仲可以用過期嘅回鄉證過關返大陸，

所以噚日星期三8/11，

我、老公和小魔怪返惠州飲飲食食；

我哋經蓮塘口岸過關，

call滴滴車去大亞灣霞涌食海鮮，

自己買海鮮後去酒樓加工，

呢餐食咗460人仔，

小魔怪話平靚正，

好抵食呀!

簡易湯水~紫菜蛋花牛丸湯

今日大魔怪話想飲湯，

但屋企冇咩材料，

唯有摷下雪櫃有咩材料就煮咩湯啦!

簡單滾咗個紫菜蛋花牛丸湯，

材料有牛丸、紫菜、蝦皮、雞蛋和清雞湯，

如果有蔥花加落去更加香呀!

貪得意將牛丸界咗花，

又幾靚喎!

五香淮鹽煎雞翼

屋企有樽五香淮鹽，

都用咗好耐囉!

唔知超市仲有冇得賣呢???

我好鐘意用佢嚟醃雞翼，

用咗佢就唔使落其他調味料，

真係好方便架!

今次我用明火慢慢煎香佢，

煎到雞翼皮脆卜卜，

咸咸香香好惹味架!

Cookingnana( 新北江店)

今日中午我偷懶唔煮飯，

叫咗外賣同大魔怪一齊食；

叫咗個二人餐，

有2個漢堡包、1份小食、1份意粉，

加2罐無糖可樂，

承惠$192.9。

大魔怪話呢餐係重量級碳水餐，

原本小魔怪話減肥唔食架，

不過最後我哋都要叫埋小魔怪出嚟幫口食，

嘻嘻，

今餐佢又冇得減肥喇!

蠔油冬菇栗子炆排骨

 

今日買咗少少冬菇($148蚊斤)，

粒粒都有花紋，

雖然唔係好大粒，

但勝在夠厚身，

有咬口呀!

今餐整咗呢碟蠔油冬菇栗子炆排骨，

正呀喂!

啱哂我口味呀!