黑色星期三

2022年11月30日，

今日係我嘅黑色星期三，

今朝落街攞免費報紙時，

竟然俾我遇到人生第一次困𨋢，

被困30分鐘後，

感覺心力交瘁呀!

點知，

小魔怪下午3點幾4點話發燒38.5度，

快速抗原測試陽性，

佢嘅病症係發燒、咳和喉沙，

我、老公和大魔怪就暫時都仲有一線生機；

唔理咁多，

老公和我即刻分頭去入貨，

未來七日要困係屋企，

加油呀!💪💪💪

生病晚餐~薯絲炒肉碎

今日唔知發生咩事，

大小魔怪兩個人都攞咗半日病假返屋企，

拿拿臨即刻幫佢哋做快測，

好彩佢哋都係一條線；

晚餐煲咗咸蛋皮蛋瑤柱肉碎粥，

炒埋一大碟肉碎炒薯絲，

簡簡單單又一餐呀!

滷牛腱牛肚

星期六已經滷定呢煲牛腱牛肚，

噚日已經分咗2餐嚟食，

今朝將食剩嘅牛腱牛肚(連汁)，

煮咗一大碗河粉，

終於食得哂喇!

豆卜魚腩魚頭煲

 

上次炆魚頭，

小魔怪話冇魚肉食喎!

所以今日買咗1舊魚腩和1個魚頭，

炆咗個豆卜魚腩魚頭煲，

大小魔怪食哂D魚腩，

而我和老公就食魚頭，

各有所好呀!

金銀蛋菠菜燴肉碎

 

今日菠菜苗$16斤，

買咗$10嚟煮金銀蛋($11有4隻)，

再加多$15豬肉碎和1小盒清雞湯，

煮埋一大碟都唔使$40，

但出街食嘅話起碼要$100蚊，

講到底都係自己煮慳好多呀!

清補涼豬腱湯

今晚得我和老公兩個食飯，

煲咗老公至愛嘅清補涼豬腱湯，

買咗$50豬腱肉，

落咗1包清補涼，

加咗圓肉1湯匙、瑤柱5粒和蜜棗2粒，

煲1.5小時，

落鹽調味後就有得飲喇!

我食咗一大碗薏米，

飽哂呀!

沙薑雞

今日去佳寶買嘢，

啱啱見冰鮮雞到貨，

揀咗隻清遠雞$60，

隻雞有成3磅幾，

一D都唔細隻呀!

去雜貨舖買包沙薑粉，

今晚食沙薑雞!

蒸到啱啱好，

隻雞都幾滑架!

瑤柱腿蓉燴旺菜

記得上次用咗8粒瑤柱嚟整碟瑤柱腿蓉燴旺菜，

老公話好好食但好敗家囉!

今次就用咗2粒瑤柱嚟煮，

而且冇落清雞湯煮菜，

唔知仲好唔好味呢???

豉油皇煎蝦

摷到雪櫃仲有磅幾蝦係度，

簡單煮咗碟豉油皇煎蝦，

我唔敢食太多，

因為最迎濕疹又發作，

好鬼痕呀!

客家蔥油鹽焗手撕雞

我見好耐冇整手撕雞嚟食，

今朝買咗隻冰鮮雞$60，

用鹽焗雞粉醃佢大半日，

蒸完拆肉，

淋上客家蔥油，

炒埋碟菜就開得飯架啦!

一年一度大閘蟹宴

一年一度大閘蟹宴又嚟喇!

噚晚入咗錦綉花園會所食大閘蟹；

每年大閘蟹都係老公舊同學訂架!

今年嘅蟹有7兩重，

約$130隻加工費$30，

呢餐我和老公兩人食咗3隻蟹，

加埋晚飯$750。

冬菇蝦米肉碎炒粉絲(螞蟻上樹)

 

我都好耐冇整炒粉絲，

見今日有碗豬肉碎係雪櫃，

拿拿臨搵齊材料整嚟食囉!

我哋成家都鐘意食粉絲，

所以今次我浸咗好多粉絲呀!

蘿蔔蝦皮雞蛋湯

呢排街市有幼身蘿蔔賣，

買咗1條嚟煮蘿蔔雞蛋湯，

加咗少少蝦皮落去一齊滾呀!

我和老公2個人，

連湯連渣，

每人飲咗2碗，

簡單、鮮甜又美味呀!

雜糧&外賣

平時如果得我和老公兩個人食飯，

我好多時都會簡簡單單煮粉麵食架!

所以冰箱通常都會有雜丸，

而雪櫃就一定有菜芯，

肉就未必成日有喇!

冇肉咁點算???

落街去商場買盒兩餸飯囉!

$41盒唔貴喎，

最鐘意食佢哋嘅酸菜豬肚，

佢哋嘅酸菜豬肚唔係咸，

而係甜架!

好惹味好送飯架!

咖哩洋蔥薯仔炆雞翼

雪櫃仲有十幾隻雞翼，

一次過煮哂佢好似好多咁，

留番幾隻我又唔想，

到最後我都係煮哂佢，

食唔哂留明天食物，

到時我就可以煮少樣餸啦!

沙茶肥牛金菇粉絲煲

今晚食番噚晚打邊爐食剩嘅嘢；

專登買咗樽沙茶醬嚟打邊爐，

沙茶醬係打邊爐必備嘅調味醬之一，

我好鐘意沙茶嘅香味，

用嚟左溝溝右溝溝(麻辣油、豉油、麻油)，

整碟美味調味嚟打邊爐就very good!!!

今日就用佢嚟整咗個沙茶肥牛金菇粉絲煲，

加埋白灼蝦和灼菜芯，

開得飯啦!

烚下烚下

今晚大魔怪帶埋女朋友仔一齊返嚟食飯，

佢哋話想打邊爐，

大魔怪女朋友仔仲專登去大埔買咗振興牛丸請我哋食呀!

今朝我去街市買哂所有材料，

 

煲埋煲五指毛桃海底椰粟米紅蘿蔔做湯底，

開得飯喇!

紅燒花生豬手

今朝我去街市買咗隻冰鮮豬手$45，

摷下屋企仲有半碗花生，

加埋罐啤酒，

炆咗一大鍋紅燒花生豬手。

豉汁排骨蒸飯

噚日我掛住上網打機，

攪到唔記得煮飯呀!

為咗加快有飯食，

拿拿臨整個蒸飯，

飯餸一齊煮，

蒸完飯嘅熱水就用嚟灼菜，

一D都唔嘥呀!

粟米蛋花肉碎湯

大魔怪放工返嚟話想飲湯，

罐頭粟米湯都話OK呀!

好彩屋企仲有半碗醃咗嘅豬肉碎，

加埋隻雞蛋，

熱辣辣粟米蛋花肉碎湯有得飲喇!

豉油雞

今日整咗隻懶人版嘅豉油雞，

全程用豉油汁浸熟隻雞，

雖然係冰鮮雞，

係D雞肉都好滑架!

變變變

近期我脫髮比例嚴重，

髮型師建議我剪短頭髮睇下有冇改善，

前幾個月我已經剪咗5寸頭髮，

今日又剪多差不多有3~4寸頭髮，

十幾年冇試過咁短頭髮，

真係有D唔習慣添!

南乳蓮藕炆腩排

 

雪櫃仲有幾磚南乳係度，

拿拿臨買咗個有泥嘅粉藕，

炆咗一大鍋南乳蓮藕炆排骨，

加埋我至愛嘅豆腐卜和支竹，

呢個餸超級好送飯，

係大小魔怪至愛餸菜之一嚟架!

德國咸豬手兩食

 

响759亞信屋買咗隻德國咸豬手，

今日就用佢嚟整德國咸豬手兩食，

黑椒洋蔥炆咸豬手&蕃茄薯仔甘筍煲咸豬手，

今次老公話好煮意喎!

有湯飲又有咸豬手肉食，

正呀!

咖哩薯仔炒豬肉碎

雪櫃樽秘撈魚蛋醬仲有少半樽，

今日就攞佢嚟整咗呢碟咖哩薯仔炒豬肉碎，

打斧頭餸菜之一，

薯仔$8+豬肉碎$15，

炒起一大碟，

咖哩惹味又好送飯，

撈飯一流，

真係幾正架!

臘腸冬菇蒸雞髀肉

 

打風前買定幾塊雞髀肉放入冰箱，

今日攞出嚟蒸臘腸冬菇；

臘腸用熱水灼過，

雞髀肉就起哂皮，

食落就冇咁油啦!

3餸1湯打風餐~金羅漢果菜乾紅蘿蔔粟米煲豬腱

天文台預告今日會掛8號風球，

我早早煲定湯~金羅漢果菜乾紅蘿蔔粟米煲豬腱，

等大小魔怪下午返嚟有啖湯飲呀!

晚餐就3餸1湯，

白飯任裝。

超Hea晚餐

今日香港全日掛3號風球，

聽講話明早會掛8號添，

唔知堅定流???

不過今次呢個颱風和季候風一齊夾攻下，

下午又風又雨又開始凍，

我都懶得煮晚飯，

簡單煮咗韭菜餃子蝦子麵做晚餐，

食湯麵暖笠笠，

啱哂我呀!