上星期日打完XBB新冠疫苗，
噚日就開始發燒，
攪到成個人"溫溫燉燉"，
所以偷懶咗一日呀!
其實今日都冇咩精神架!
晚餐求求其其煮咗兩碟餸，
滷水雞翼和菜芯炒肉片，
簡簡單單又一餐!
今日黃氏提早團年，
妹妹早半個月左右已經book咗石門富臨皇宮，
仲有一間廳房添!
今晚夏蕙BB係富臨皇宮攪慈善晚會，
擺咗差不多70圍，
好熱鬧呀!
呢餐食咗$5151，
我哋加咗壽桃包和白飯一碗，
圍餐味道尚可，
菜式普普通通，
但勝在有間廳房俾我哋打麻雀囉!
我之前買咗樽沙嗲醬，
買一送一都係$19.9，
於是買咗2樽放入屋企，
今日就用咗佢嚟醃雞扒整沙嗲雞，
用氣炸鍋嚟焗，
快靚正呀!
之前响惠州買咗紫菜，
簡單滾咗個紫菜肉片雞蛋湯，
加少少蝦皮落去一齊滾，
最後灑少少蔥花，
呢個湯簡單好味又有營養呀!
天氣太凍喇!
煮咗D餸一陣間就凍，
唯有諗諗辦法啦；
今次煮咗一個雜錦鍋，
一煲過上枱熱辣辣，
快靚正呀!
材料落咩都得，
總之自己鐘意食咩就落咩啦!
我就落咗肥牛、雜丸、芝士腸、魚皮餃，
仲有金菇和紹菜呀!
噚晚老公話想食臘米飯，
咁啱屋企有齊材料，
所以今午就整咗生炒糯米飯俾佢食喇!
今日小魔怪WFH，
佢又有口福喇!
生炒臘味糯米飯，
半盒蓮塘買嘅燒肉，
灼碟菜芯，
開得飯喇!
呢餐用咗兩塊雞扒，
整咗一大碟薑蔥手撕雞，
舖咗大量薑蔥蓉而且啖啖肉，
啱哂我呀!
舊年2023年10月20日，
老公和我跟團去睇樓，
未出發，
老公吩咐我睇樓咋，
千祈唔好買呀!
點知到最後要買樓果個係佢喎!
由一間冇坯房零裝修，
到裝修好買埋傢俬電器，
足足3個月時間，
星期日2024年1月21日，
我哋終於收樓啦!
一房一廳一衛，
簡簡單單，
游水渡假最啱呀!
呢個星期煲咗兩次湯，
羅漢果菜乾粟米紅蘿蔔豬腱湯，
配蜜棗瑤柱南北杏；
雪梨乾海底椰紅蘿蔔粟米雞腳瘦肉湯，
配蜜棗瑤柱。
噚日响酒樓食咗碟鮑汁鳳爪，
$53得6隻鳳爪，
真係食得唔夠喉囉！
今日即刻買咗1磅半鳳爪和$10花生，
炆咗一鑊鮑汁花生鳳爪，
加埋$30都唔使，
食番夠本呀！
今日我和老公，
用大伯、大伯娘和姑奶5個人去飲茶，
元朗形點I~翠園，
第一輪點咗4個點心，
之後叫咗個1+2套餐，
呢餐食咗$474.1，
唔睇單都唔知茶位5人收$80，
味道唔差，
但價錢唔平囉!
臨近新年，
係時候要清清雪櫃物資，
騰出空間擺過年食品呀!
今日要清嘅係金沙骨和雞翼，
簡單用叉燒醬醃咗佢用氣炸鍋整熟佢，
灑少少熟芝麻，
好味道呀!
今由早上9點坐到下午4點半，
好彩早上食咗早餐先去整頭髮，
全程7個半小時，
中間去咗2次廁所，
由於臨近新年，
好多人去整頭髮，
坐到我都呆呆哋呀!
整完頭髮我先買飯返屋企食呀!
噚日俾我係冰箱底搵到包蠔豉，
雪咗咁耐，
係時候要煮咗佢嚟食喇!
今日買咗隻大豬手，
叫肉檔哥哥幫我斬細件少少，
咁豬手炆出嚟會入味少少架!
大小魔怪好攪笑，
佢哋用時話今日過年咩，
點解有蠔豉食嘅???
今日小魔怪WFH，
有佢係屋企，
晚餐一定要多肉呀!
所以今晚就煮咗一大鍋咖哩薯仔洋蔥炆排骨，
食哂佢一定飽啦!
上星期買咗1磅半金沙骨，
都唔知整咩好；
今朝攞出嚟解凍後，
最後決定整糖醋骨啦!
老公和大魔怪超鐘意食，
佢哋話酸酸甜甜好送飯呀!
今晚滾三文魚頭魚尾蕃茄薯仔豆腐湯，
老公未飲已經話正；
三文魚頭魚尾响佳寶買嘅，
啱啱擺出嚟就俾我買咗，
所以話早D去買餸係有著數架!
噚晚炆咗冬菇栗子雞翼，
用咗菜檔買嘅抽真空已去殼栗子粒，
好方便喎!
唔使去衣，
沖沖水就可以用嚟炆，
$12包又唔貴，
下次炆餸又或煲湯都買佢先得。
因為有超多冷飯嘅原因，
所以今晚食生炒牛肉飯，
買咗$25牛肉碎，
加咗3隻雞蛋、生菜絲和蔥粒，
炒埋一碟就食得喇!
噚日早上去完雲泉仙館，
返到屋企都已經成3點幾，
好攰唔想煮飯，
大魔怪女朋友仔話請我哋食飯，
我哋個個都唔想再出街，
所以決定夜晚叫外賣；
我响雲泉買嘅煲湯料啱哂喇!
唔煮飯就煲啖靚湯俾大家飲啦!
雪櫃仲有半盒燒肉，
再叫外賣~辣將軍(海南小廚)，
呢餐食得好滿足呀!
今日係奶奶忌日，
我哋一家4口連同母親大人和大魔怪女朋友仔，
1行6日齊齊去坪輋雲泉仙館拜祭奶奶；
母親大人第一次入嚟坪輋雲泉仙館，
佢話雲泉呢度環境清幽，
空氣好好啊!
好耐冇煲老火湯，
所以噚日就煲咗呢個粉葛土伏苓牛大力地老鼠煲排骨，
加咗紅蘿蔔、赤小豆扁豆、蜜棗和果皮，
呢個湯水有清熱袪濕解毒等功效架!
噚日，
我、老公和姑奶跟佢朋友共5人，
齊齊返惠州行下新地方~仲愷!
朋友帶我哋去午餐，
好特別，
實物揀餸而唔係圖片只供參考，
想食咩就攞個竹牌呀!
我哋揀咗5餸1湯，
剩菜價都係223蚊人仔，
真係超抵食呀!
今朝屋苑9點~13點洗食水缸，
不過每次都會早少少有番水，
但係有水都唔可以即刻用，
因為通常洗完水缸嘅水都係黃泥水，
起碼要開幾分鐘D水先清呀!
所以今早晨早開機洗衫，
又裝定D水用嚟洗手和煮午飯；
晚餐食舊餸，
上星期炆嘅牛肚牛腩，
今日就加咗個蘿蔔落去一齊炆，
另外燒肉和灼菜，
咁又一餐喇!
2024年元旦日，
一切由美食開始，
早餐、午餐和晚餐，
全日都咁豐富呀!
