噚日見有時間就執下個廚櫃，
竟然俾我摷到有3樽叉燒醬存貨，
好彩係全部都係2027年尾先過期，
我拿拿臨用佢嚟醃雞翼，
整碟氣炸蜜味叉燒醬雞翼嘆下先得。
噚日買咗1斤多少少梅頭肉，
肉檔叔叔話如果買帶皮和肥肉嘅梅頭肉就$48斤，
全瘦嘅梅頭肉就要$58斤，
今日買咗1斤多少少帶皮梅頭肉$58，
如果買瘦梅頭肉就要成$6X以上喇!
雖然我會叫肉檔叔叔幫我切走大部份肥肉，
但計落都係帶皮梅頭肉抵少少囉!
梅頭肉有少少肥唔怕喎，
用嚟整蜜汁叉燒就最啱啦!
氣炸完嘅叉燒一D都唔肥，
又腍又滑，
叉燒一Ｄ都唔柴呀！
老公去咗馬來西亞玩，
我一個人就懶得煮喇!
今日就唔同，
細仔全日在家，
點都要煮餐飯俾佢，
所以一早醃定金沙骨，
放入氣炸鍋整熟佢就食得啦!
今日買咗2磅金沙骨，
揀咗6條薄薄哋嘅排骨，
整咗呢碟蜜汁燒排骨，
加蜜糖和熟芝麻，
好惹味架!
噚日買咗$50梅頭豬肉，
梅頭肉有少少肥，
用嚟醃叉燒就用啱喇!
今日去豬肉檔買豬肉，
我叫肉檔哥哥幫我切3片梅頭肉$50，
梅頭肉用嚟整叉燒或豬扒就用啱啦!
今次我整叉燒呀!
懶得開焗爐和氣炸鍋，
最後落鑊慢慢煎，
都唔錯架!
前兩日買咗半隻燒鴨返嚟，
我和老公食極都仲有半盒，
最後我買咗個涼瓜返嚟，
炆咗一大碟豉汁涼瓜炆燒鴨，
有涼瓜老公即刻添飯又添餸，
清哂果半盒燒鴨呀!
屋企有盒燒肉，
係我和老公參加咗一個活動攞返嚟的，
真係大盒，
我和老公要分幾餐嚟食，
今餐食咗1/3盒燒肉，
整咗呢個大馬站煲，
燒肉加豆腐、韭菜和蝦醬一齊煮，
真係特別惹味架!
韭黃叉燒炒滑蛋，
呢個餸真係好耐冇食，
但又係由細食到大嘅餸菜之一，
真係充滿童年回憶呀!
今日經過街市順便買包支竹(無炸)，
返到屋企，
我先發覺原來已經有1包支竹係廚櫃度，
支竹唔擺得太耐，
睇嚟我呢兩日要盡快食哂佢先得喇!
今日買咗個買咗個肥嘟嘟深綠色的涼瓜~雷公鑿，
用嚟炆燒鴨，
涼瓜和燒鴨都係老公至愛，
所以今餐餸啱哂佢口味呀!
今朝同老公去天水圍百老匯睇早場~破地獄，
長者$25，
成人$60，
唔好話香港電影冇人睇，
今朝早場全院滿座，
套戲都幾感人，
我都有少少眼濕濕呀!
早上買咗靚靚梅頭肉，
醃咗今晚做叉燒。
老公和亞仔佢嚟3個都鐘意食燒肉，
所以買咗1斤燒肉返嚟，
半斤即日食咗，
剩番半斤就買咗D豆腐卜炆嚟食呀!
屋企食剩半斤燒肉，
今晚用佢整咗呢碟豆腐卜炆燒肉，
豆腐卜索哂D汁，
送飯一流架!
係呀，
今日又係叉燒呀!
上次整叉燒大魔怪冇食到，
今日專登整番餐俾佢食呀!
炒埋碟菜芯炒牛肉，
兩個餸好似好少，
嘻嘻，
大家陪我減肥，
張就下啦!
今日買咗$35梅頭瘦肉諗住整叉燒，
見冰箱仲有8隻雞翼，
又攞埋出嚟一齊醃呀!
有叉燒又有雞翼，
今餐好多肉呀!
燒肉係上星期係蓮塘口岸買的，
今晚就用佢嚟煮咗節瓜冬菇炆燒肉，
我只係用咗蠔油和糖調味，
簡簡單單唔花巧，
送飯一流呀!
响蓮塘口岸買咗咁多盒燒肉返嚟，
每日都有煮嚟食架!
冬瓜豆腐卜炆火腩和支竹冬菇炆火腩，
唔知大家鐘意食邊款呢???
每次經蓮塘過關返香港，
我都會買埋燒肉和鹽焗雞架!
大小魔怪最鐘意食架啦!
噚日買咗1斤幾燒肉，
晚上食咗半盒，
剩番半盒留番今晚食；
我煮咗支竹炆火腩，
呢個餸真係好送飯架!
雪櫃仲有少少燒肉，
今日買咗盒豆腐返嚟，
煮咗呢鍋男人的浪漫~豆腐炆火腩；
火腩配豆腐，
真係絕配呀!
