10月29日(星期日)，
我和老公兩個人返咗惠州輕鬆下，
休休閒閒hea幾日，
羅湖坐完大巴返惠州車站後，
就call滴滴車返新屋，
俾我call到架Tesla新車，
坐得特別舒服，
真係好好彩。
正所謂新屎坑三日香，
今日係用養生壺第三日，
用埋呢次係時候要停一停喇!
今日煲蟲草花淮山湯，
配瘦肉、圓肉、紅棗和杞子；
老公話呢個養生壺真係好有用，
以後每週煲一次呢個份量嘅湯水俾佢飲喎!
蟲草花淮山湯，
有潤肺補腎護肝，
抗氧化抗衰老和降血壓等功效。
今日又試下用養生壺啦!
今次用佢嚟煲粥，
用嘅係冷飯，
落咗豬肉碎和皮蛋一齊煲；
全程原先要煲78分鐘，
但煲到50分鐘左右，
個粥已經好綿架啦!
呢次落咗5碗水去煲粥，
老公和我每人食咗2碗幾粥，
飽飽囉!
新玩具～養生壺，
今日就用佢煲緊雪梨乾麥冬湯，
材料有雪梨乾、麥冬、淮山、南北杏、瘦肉和杞子，
呢個湯水有潤肺生津、化痰、止喉嚨痕癢等功效，
宜秋冬天氣飲用架！
揀選功能7~火力200~全程75分鐘。
噚日半條蘿蔔煮咗蘿蔔魚鬆，
今次就用另外果半條炆牛筋腩，
用咗咖哩魚蛋醬，
少少辣，
都幾好味道架!
蘿蔔炒魚鬆，
係一個由細食到大嘅餸菜，
今日我用咗半條蘿蔔嚟煮魚鬆(魚肉)，
呢排D蘿蔔真係又甜又大條，
煮起一大碟，
好送飯呀!
噚日拜山有隻雞，
所以晚餐就好簡單喇!
薑蔥炒雞、梅菜豬肉、蝦醬蝦仁帆立貝炒西蘭花，
仲有西洋菜咸鴨腎豬腱湯，
全部餸菜都好送飯架!
今朝，
老公、小魔怪、大魔怪和女朋友仔4個人，
去元朗舊屋後山拜山，
我冇去，
因為山路太斜，
我跌過一次怕怕了。
不過之後我都有落元朗同佢哋食午餐。
我哋選擇去蓬萊咖哩屋食印度菜，
我哋4個人(小魔怪下午有約)，
叫咗個3人套餐，
再另加一碟芝士nan，
呢餐食咗$558，
仲送咗張85折咭俾我哋!
味道完全冇變，
一樣咁好味呀!
明天要去拜山，
所以我預早一日去買定隻雞先，
咁明早去拜山唔使咁趕呀!
買咗一大清遠雞和一隻冰鮮雞，
兩隻都醃咸佢；
今晚食手撕雞、蒸水蛋、雞汁炒菠菜和罐頭蘑菇湯。
近期迷上呢包榨菜芯，
佢爽脆兼有咬口，
用嚟蒸肉片就最啱啦!
呢包榨菜芯係惠州買，
好似3蚊人仔1包，
唔知香港有冇得賣呢?
今日我又包餃子啦!
木耳韭菜豬肉餃，
總共包咗67隻，
咁啱姑奶中午嚟咗，
我煮咗一大鍋木耳韭菜豬肉餃河粉，
食得好滿足呀!
我今朝去買餸真係冇咩煮意，
見到有冰鮮雞賣，
簡簡單單買咗隻，
用鹽焗雞粉醃咗佢，
放入氣炸鍋焗熟佢，
斬都唔使斬，
手撕嚟食算啦!
炒多碟XO醬蝦仁青瓜，
3個人，
夠食啦!
只要小魔怪係屋企食飯，
佢都會要求食雞肉，
所以今餐我就整咗氣炸叉燒醬雞扒，
啖啖肉，
啱哂佢啦!
今日大魔怪女朋友仔嚟食晚飯，
所以我一早起身就去天瑞徑晨運，
之後就順便去天瑞街市買游水蝦，
俾我見到有$68斤基圍蝦，
買咗$100返屋企做白灼蝦，
煎蓮藕餅、蒸豉汁排骨、蒜蓉炒菜芯，
煲埋藥膳雞腳，
晚餐有4餸1湯，
開得飯啦!
有時懶懶哋，
又唔知煮咩餸時，
我都會去街市買幾塊醃咗嘅牛扒，
煎到佢8成熟後，
將佢剪成一塊塊，
再加半個或一個洋蔥炒埋一碟，
一個簡單又好味嘅洋蔥炒黑椒牛扒，
出爐啦!
今日竟然俾我係佳寶買到剪哂指甲嘅炸鳳爪，
買咗一磅嚟炆腩排，
用咗蒜頭豆豉汁嚟炆，
炆到D鳳爪入哂味，
一入口即脫骨，
真係好鬼正架!
今日買咗2磅雞翼，
攞咗10隻雞翼嚟炆薯仔，
呢個餸由細食到大，
一樣咁好味道呀!
老公見大魔怪仲有少少咳，
又咁啱見商場有川貝海底椰雪梨乾湯包，
所以就買咗個湯包返嚟啦!
1個湯包料唔多夠，
我加咗少少海底椰和雪梨乾，
再加粟米、紅蘿蔔和瑙施骨一齊煲，
煲2個鐘後，
就等大魔怪放工返嚟飲呀!
冰箱有包出咗水嘅花膠仔，
老公話煮咗佢嚟食啦!
所以今日買咗8隻鴨腳，
加埋冬菇仔，
炆咗一大碟冬菇花膠炆鴨腳。
每次打親風，
天文台都話個風路徑有變數，
所以噚日由3號風球，
到今日中午掛8號風球，
直到晚上7點掛9號風球；
雖然9號風球，
好彩係我家唔係當風位置，
外邊仲係好平靜，
只係落雨呀!
噚日買咗2節蓮藕，
一節用咗嚟煲湯，
另一節就用嚟炆南乳蓮藕支竹木耳排骨呀!
今日3號風球，
又遇上季候風，
今朝有風又有雨；
去街市買多少少菜，
咁明天真係打風都唔怕啦!
今晚打風晚餐有湯飲，
蓮藕鱆魚綠豆馬蹄紅蘿蔔煲西施骨，
叉燒和薑絲腐乳油麥菜苗，
開得飯啦!
噚日去咗做義工，
返到屋企已經好晏，
醃咗嘅叉燒就留番今日先焗嚟食；
咁啱今日大小魔怪又唔返嚟食飯，
我和老公兩個人食咗半份叉燒，
其餘半份就再留番明天先食喇!
大魔怪有D咳和頭痛，
請咗病飯係屋企休息，
晚餐佢話想食清淡D，
我整咗菜芯炒牛肉和煎三文魚扒，
唔知算唔算清淡呢!
呢排間唔中我都有煲下唔同種類嘅湯水，
簡簡單單唔複雜，
啱哂我呀!
今日係十一國慶節補假，
大小魔怪都冇出街，
見佢哋留係屋企食飯，
所以一早買咗隻清遠雞和栗子，
晚餐炆咗栗子冬菇炆雞，
加多碟鮑魚生菜，
開得飯啦!
明天係姨甥亞諾25歲生日，
噚日我哋黃氏家族一齊入沙田提早幫佢慶祝生日。
姐姐準備哂所有生日會美食，
好豐富呀!
