好耐冇煲過肉湯，
所以今日就買咗2大扎西洋菜($10有2扎)，
煲咗朱家例湯~西洋菜咸鴨腎粟米紅蘿蔔豬腱湯呀!
過年果幾日，
食量大咗兼食得雜咗，
所以依家有機會就盡量食番清少少呀!
今日煮咗老少平安，
簡單易做又好送飯，
大人細路都啱食呀!
星期二買咗條豬腩肉，
原本係晚上用嚟炆冬菇蠔豉鴨腳的，
但炆完鴨腳之後先記得條豬腩肉仲係雪櫃；
今日就買咗蓮藕和豆腐卜嚟炆豬腩肉喇!
呢個餸主角唔係腩肉，
係豆腐卜呀!
豆腐卜索哂D南乳汁，
勁正呀!
噚日買咗2包馬蹄返嚟煲素湯，
用剩咗幾粒馬蹄，
今日就剁碎嚟蒸肉餅，
清清哋好送飯架!
今日大伯大伯娘、姑奶、姨甥和淇淇，
約埋一齊嚟我家拜年；
晚餐都係家常便飯，
五餸1湯，
白飯任裝!
今日見到佳寶D急凍白蝦都幾大隻，
$48磅又唔貴喎，
買咗差不多1.5磅蝦返屋企，
本來諗住煮沙爹粉絲蝦，
不過原來屋企冇哂粉絲，
唯有改煮豉油皇煎蝦，
一樣咁惹味呀!
唔經唔覺，
祈祈唔再係BB喇!
佢今年已經10歲了。
噚日妹妹妹夫為祈祈辦咗個迎接10歲的生日會，
簡單又溫馨。
每到過新年時，
家家戶戶都會買定棵大白菜(紹菜)壓年；
今年我就買咗個山東大白菜$25，
大大個肥嘟嘟
又嫩又清甜呀!
年初二用咗半個嚟煮齋，
剩番另外果半個，
今日就用咗嚟煮粉絲肉片喇!
煮咗一大碗，
夠我和老公食兩餐呀!
之前係凍肉舖買咗2塊醃咗嘅黑椒雞扒，
用嚟整呢碟黑椒雞絲意粉就最啱喇!
今次加咗少少黑椒汁嚟炒，
特別惹味呀!
之前係雜貨舖買返嚟嘅辣椒乾，
咪睇佢細細仔又唔多靚，
但用嚟炒餸真係好鬼"攻鼻"架!
我已經冇剪開嚟炒，
如果D辣椒銀走哂出嚟嘅話，
真係辣都飛起架!
講番呢碟炒福花菜，
用咗有肥豬肉嘅肉片嚟炒，
真係特別香口，
肉片略煎至有焦香，
食落夠哂惹味，
一D都唔覺肥呀!
今日開始要清過年時買落嘅食材喇!
摷到雪櫃裡面有三色椒和洋蔥，
係街市買咗條一字排骨返嚟，
煮咗呢碟豉椒炒排骨。
今日年初四，
亦係公眾假期最後一日，
晚餐得我兩佬撐枱腳，
煮咗簡單又方便嘅台式滷肉飯，
每人一碗，
灼埋碟菜就食得啦!
今日大年初三，
亦係2月14日西方情人節，
祝大家情人節快樂呀!
噚日去咗妹妹家團拜，
晚餐由姐姐、我和工人姐姐一齊煮，
家常便飯，
食得開心呀!
今日大年初二；
今朝一早起身準備煮開年飯，
食完開年飯後，
我哋就出門去妹妹家團拜啦!
今日大年初一，
我雀后祝大家牛年大吉，
牛氣沖天，
身壯如牛，
牛馬精神，
萬事如意，
財源滾滾，
心想事成!
朱家傳統初一全日食素，
簡簡單單煮咗幾個素菜，
今年初一唔會出外拜年，
留在家中齊心抗疫，
希望病毒速速遠離。
今日年卅十晚，
亦係我和朱生結婚廿八週年嘅日子；
連續兩年都冇得出外慶祝，
所以買個蛋糕返屋企簡單慶祝一下囉!
噚日煎咗自家製蘿蔔糕做茶點，
俾母親大人和妹妹佢哋試食，
祈祈話:姨媽整嘅蘿蔔糕超級好食，
大家唔食係你哋嘅損失呀!
哈哈，
我呢個做姨媽聽見真係好開心，
多謝祈祈嘅讚賞啊!
今日年廿九，
母親大人、妹妹妹夫和祈祈，
齊齊入嚟天水圍同我哋一齊團年呀!
2021有新的開始，
希望大家合家平安，
團團圓圓，
身體健康!
今日整蘿蔔糕，
原本以為老公會幫手刨蘿蔔，
點知佢約咗人踩單車，
咁即係得我一個人切切切刨刨刨啦!
整完呢幾底蘿蔔糕，
我條腰骨即刻有D痛添呀!
見到新鮮出爐嘅蘿蔔糕真係忍唔住口，
要食碗頭啖糕先得。
呢堂課係上星期二學的，
今次搓鮮香草煙肉包&芥末菠菜腸仔包。
本來明晚我哋都要返學架，
但由於近期多區晚上七點後需要強制檢測，
中心考慮返學可能對我哋會做成不便(我諗咋)，
所以取消明晚嘅課堂，
新年過後又將開課日子推遲至3月初先再開始，
呢十堂課原本由1月初開始，
依家斷斷續續到4月頭先完結，
感覺好長時間啊!
以往農曆新年果幾日假期，
我哋都會出外到親戚家拜年，
每年初三仲會返惠州過年添架!
可惜由於新冠肺炎仍然嚴峻，
我哋應該唔會周圍去拜年喇!
(剩係去同母親大人拜年咋!)
雖然唔去拜年，
但家居清潔一樣照做，
亦會做應節食品呀!
今日就開油鑊炸腰果和炸蝦片，
遲兩日先整蘿蔔糕。
今日清清哋整咗個蕃茄豆腐蝦滑煲，
呢個煲仔菜，
可以做餸又得，
做湯羹又得，
唔講咁多，
開飯囉!
買咗條腩肉都唔知煮咩好，
見到菜檔有半個芋頭，
唔使諗咁多，
一於煮南乳芋頭炆腩肉啦!
呢個餸係小魔怪至愛呀!
今朝去咗覆診(睇血壓)，
我買埋餸返到屋企都成10點幾，
處理下D餸嚟又夠鐘煮午飯了；
2個人食得好簡單，
煮咗個盅頭飯嚟食，
快靚正呀!
第四堂學搓玉桂提子大圈包和杏仁糖粒果子包，
兩款麵包材料大致都係一樣，
所以亞sir建議佢示範做玉桂提子大圈包，
而我哋改做腸仔包，
叫我哋自己選擇做咩包喎!
哈哈，
我哋大家緊係做腸仔包啦!
仲使問咩!
洋蔥豬扒，
一個經典嘅家常菜；
只係配上簡單嘅豉油(老抽)做汁料，
甜甜香香，
好送飯呀!
