2023年3月31日 星期五

菜脯肉碎煎蛋

 

今日買咗半磅豬肉碎,

諗住整幾個唔同款嘅餸菜,

今日就整咗菜脯肉碎煎蛋;

呢個餸非常簡單,

適合唔知煮咩餸,

又或想加餸時,

只要有齊材料就可以整嚟食喇!


2023年3月30日 星期四

蟲草花冬菇蒸雞肉


今晚食蟲草花冬菇蒸雞肉,

雞髀肉去皮去肥膏,

蒸出嚟冇咁油膩,

好健康架!


2023年3月29日 星期三

食番夠本


今朝10點45分我去咗元朗政府合署睇牙醫,

由於要做深層洗牙,

所以今次要打麻醉針呀!

打完麻醉針後

右邊面冇哂知覺,

就連食午餐都好困難囉!

餓咗大半日,

晚餐我就要食番夠本啦喂!

荷蘭豆炒臘肉、涼瓜炆排骨和豉油雞翼+雞腳。

 


2023年3月28日 星期二

又嚟,病


大魔怪又又又感冒了,

喉嚨痛、流鼻水、喉沙兼頭痛,

睇咗醫生,

食咗藥就係咁瞓,

午餐食通粉,

晚餐我就煲咗皮蛋瘦肉粥、榨菜蒸豬肉和灼菜芯。



2023年3月27日 星期一

豉汁蒸排骨


今日買咗1條仔腩排($29)嚟蒸豉汁排骨,

雪櫃有少少銀芽,

加埋落D排骨度一齊蒸,

灼多碟菜芯就開得飯喇!

簡單又好味道呀!


2023年3月26日 星期日

馬拉盞肉碎炒通菜


噚日買咗2扎通菜,

一扎炒咗蝦醬通菜鮮魷,

今日就整馬拉盞肉碎炒通菜,

呢個餸咸咸香香,

真係好送飯架!


2023年3月25日 星期六

大小魔怪28歲生日會


上星期六係大小魔怪28歲生日,

今日約埋黃氏一家和大魔怪女朋友仔,

合共12人齊齊慶祝佢哋生日呀!

响屋企附近餅店訂咗個足料嘅生日蛋糕,

我哋訂咗2磅蛋糕$290,

但餅店造出嚟嘅蛋糕足足有5磅幾,

真係超級巨型和抵食呀!

我哋12個人只係食咗半個蛋糕,

仲剩半個蛋糕係雪櫃呀!

2023年3月24日 星期五

冬菇臘腸蒸雞肉


今日係冰箱摷到1塊雞扒,

用嚟煎又或蒸都唔夠食,

好彩有小魔怪平時食開嘅小雞胸肉,

加埋幾隻冬菇和1條臘腸,

咁就蒸咗呢碟冬菇臘腸蒸雞肉喇!



2023年3月23日 星期四

腐竹薏米雞蛋糖水+外賣晚餐


今晚晚餐雖然叫咗外賣,

但我都冇偷懶架,

煲咗我哋成家都鐘意飲嘅腐竹薏米雞蛋糖水,

食完D辣辣哋嘅嘢,

食番碗甜甜嘅糖水中和番佢呀!


2023年3月22日 星期三

榨菜蒸牛肉


今日去牛肉檔買咗$45牛肉,

叫肉檔哥哥幫我切埋D牛肉(我懶得自己切呀),

買埋包即食榨菜,

整呢碟榨菜蒸牛肉,

灼埋碟菜芯,

咁又一餐囉!


2023年3月21日 星期二

梅菜炆腩肉


上次返惠州,

我竟然忘記了買梅菜呀!

激C我啦!

今次用嘅梅菜係香港買,

貴係貴D,

但食住先啦!

下次返去我一定會入貨架啦!


2023年3月20日 星期一

春天袪濕湯水~粉葛土伏苓牛大力地老鼠煲排骨


呢排我真係好鬼懶,

好耐冇煲過老火湯呀!

今日襯大魔怪放假而小魔怪又返晏,

所以一早買齊材料煲咗呢個湯,

粉葛土伏苓牛大力地老鼠煲排骨;

近排天氣咁潮濕,

最啱就係煲呢個湯水祛骨火和祛濕呀!


2023年3月19日 星期日

土魷馬蹄蒸肉餅


今日買咗豬肉碎諗住蒸馬蹄肉餅,

點知摷到雪櫃仲有2隻土魷,

拿拿臨即刻改食法,

整咗呢碟土魷馬蹄蒸肉餅呀!

我最鐘意就係食呢個整肉餅,

好香魷魚味,

肉餅又爽爽軟軟,

一D都唔"鞋"呀!


2023年3月18日 星期六

撐枱腳~新北江~芝士面


今日大小魔怪28歲生日,

點慶祝?

大魔怪約咗女朋友仔去酒店staycation,

老公就去咗中學校友會攪嘅週年聚餐,

所以今日剩番小魔怪陪我食飯呀!

小魔怪請我食飯,

食咗$201,

我就買番D雪糕雪條請佢食呀!


2023年3月17日 星期五

大頭菜蒸鯇魚腩


噚晚除咗食雜錦鍋,

我仲買咗舊鯇魚腩$42,

用咗大頭菜蒸嚟食,

大頭菜咸咸香香又爽脆,

加埋滑滑嘅魚肉,

送飯一流呀!


2023年3月16日 星期四

雜錦鍋


今日我又要清雪櫃啦!

摷到有梅頭豬肉片、牛丸和我自己包嘅韭菜豬肉餃子,

加埋旺菜、粉絲和清雞湯,

一煲過,

有湯有菜有肉有餃子,

簡單又好味道!


2023年3月15日 星期三

閒話家常


呢幾日我都唔使諗煮咩餸,

因為我哋都係食雞呀!

响惠州帶返嚟果2隻走地雞,

D雞肉真係唔係人人都咬得開架!

唔講大家都唔知,

呢度只係半邊雞,

我起埋骨都咁大碟,

真係食極都食唔完呀!


2023年3月14日 星期二

芥蘭炒臘肉


今次惠州之旅,

弟婦攞咗條佢自己生曬嘅臘肉俾我哋食呀!

平時我都好少買臘肉嚟食,

因為怕咗佢哋肉質太硬,

但弟婦自己曬嘅臘肉,

炒完出嚟特別香軟,

攪到我都要破戒食咗幾片,

嘻嘻,

又真係幾好食架!


2023年3月13日 星期一

芥菜咸排骨瑤柱湯


噚日係惠州返到嚟天水圍,

經過樓下菜檔見到有特價菜~芥菜,

每份$8都有成8棵架!

咁啱係返惠州前我醃定咗D咸排骨,

即刻買返屋企整煲芥菜咸排骨瑤柱湯飲下先得。


2023年3月12日 星期日

終於返鄉下喇~惠州


3月10日~3月12日星期五六日,

我和老公返咗惠州呀!

3年冇返去,

惠州真係變化得好大,

尤其係我哋居住嘅村屋附近,

大興土木,

興建咗好多新道路,

沿途綠化做得好好,

真係越變越靚呀!


2023年3月9日 星期四

紅燒排骨


响淘寶淘咗幾包唔同種類嘅方便醬,

今日就用其中一包紅燒醬嚟整紅燒排骨,

味道唔錯又真係好方便喎!

2023年3月8日 星期三

煎焗叉燒


叉燒,

唔一定用焗爐又或用氣炸鍋整架!

今次就用個平底鑊整咗呢碟蜜汁叉燒;

平時我鐘意買梅頸肉嚟整叉燒,

今次就用咗去皮五花腩肉,

整出嚟嘅叉燒都好淋好滑架!

用呢個方法,

可用整叉燒和金沙骨添!


2023年3月7日 星期二

香煎雞扒配蒜蓉炒露筍


大魔怪好鐘意食露筍,

所以今日煎雞扒順便炒埋個蒜蓉露筍,

雞扒露筍一碟過,

慳番唔使洗多隻碟呀!

2023年3月6日 星期一

福花菜炒牛肉


今晚得我和老公兩個人食飯,

原本想炒碟福花菜炒牛肉就算,

但一碟餸好似好少,

最後蒸多2條臘腸補數,

咁老公就唔會詐型啦!


2023年3月5日 星期日

南乳蓮藕豆卜炆豬腩肉


每次炆親南乳蓮藕豆卜炆豬腩肉或排骨,

大小魔怪都會添飯架!

唔只佢哋,

我剩食豆腐卜都食到要添飯呀!



2023年3月4日 星期六

2023年3月3日 星期五

韭菜豬肉餃子


上星期煮餃子麵做午餐時,

大魔怪話街買餃子唔好食,

話我包嘅餃子先好食喎!

見佢講到出口,

今日我即刻買哂所有材料開工呀!

總共包咗63隻,

唔知食到幾多餐呢???

見到煮起嘅餃子粒粒脹卜卜,

又真係幾吸引架!

2023年3月2日 星期四

我嘅facebook&instagram,終於返嚟啦!


無端端被封咗1個多月,

我嘅facebook&instagram,

終於返嚟喇!

問我點解被封,

我都唔知道呀!@@"





2023年3月1日 星期三

屏山文物徑半日遊


今日挑起條筋,

老公和我行下屏山文物徑,

輕輕鬆鬆行路過去,

車都唔使搭,

唔錯架!

第一站~天水圍西鐵站旁~聚星樓。