噚日參加朋友公司舉辦嘅睇樓團，
包車包酒店住1晚，
仲包埋4餐添呀!
咁抵玩，
緊係唔少得我和老公啦!
噚日朝早9點30分係深圳香格里拉酒店大堂等，
坐車到惠東雙月灣食午餐，
連司機10個人食，
朋友就加咗窰雞、涼瓜牛肉和炒菜芯。
噚日朝早用咗個養生壺嚟煲湯，
竹蔗茅根海底椰雪梨湯，
呢個湯包係大陸美團優選買，
我每次返惠州都會買幾包返嚟，
真係好鬼正架!
今次加咗半個紅蘿蔔和3舊咸豬腱，
呢個湯好滋潤，
啱我飲呀!
今晚老公有飲宴，
小魔怪話做完gym買外賣返屋企食，
嘻嘻，
咁我又可以唔使煮晚飯喇!
因為我仲有咳，
老公吩咐小魔怪唔好買辣嘢俾我食呀!
佢雖然揀咗食川菜，
但除咗酸菜魚冇得走辣外(叫咗少辣)，
其餘干扁肥腸、炒萵苣、芥辣手撕雞和薯粉，
全部都唔辣呀!
呢餐食咗$220，
2個人係食唔哂架!
呢個咖哩薯仔牛筋腩，
係參考肥媽食譜做的，
食落真係同平時用咖哩醬整嘅好唔同，
咖哩胆好濃郁，
配上洋蔥碎、蕃茄蓉、乾蔥碎和蒜蓉，
加埋咖哩粉、黃薑粉和辣椒粉，
我冇落印度五香粉和芫茜粉，
不過我覺得已經好好味道呀!
今晚食得好簡單，
就係蠔油薯仔炆雞膇喇!
我鐘意用呢個蠔油汁撈飯，
真係會唔覺唔覺添多咗飯架!
响我病後呢段時間，
如果我煮飯嘅話，
通常都係一碟蒸餸和一碟烚菜，
好似咁晚咁，
就食蒸榨菜肉片和烚菜芯，
我用個鑊蒸完餸就順便烚埋菜，
真係好方便架!
依家每逢星期二和星期三晚，
大魔怪要去浸會大學返學，
而小魔怪平時返工又好少返嚟食晚飯，
所以我和老公兩個人，
我懶得晚飯煮喇!
屋企樓下商場兩餸飯$43，
加埋噚日嘅羅漢果菜乾紅蘿蔔粟米湯，
咁又一餐喇!
我病咗成個星期，
雖然退咗燒，
但都仲係好鬼咳，
我見屋企有幾個羅漢果，
所以買咗西施骨嚟煲啖湯飲下，
潤番下個喉嚨呀!
噚日，
我哋黃氏一家齊齊去拜父親大人，
之後，
姐姐請大家1行12人食自助午餐，
沙田萬怡酒店momo cafe，
我啱啱病好，
食力減半呀!
晚餐就叫陳根記外賣，
大家都話中午食得好飽，
但都叫咗9個餸，
另外炒多一碟菜呀!
失蹤咗幾日，
唔係出去玩，
而係病足咁多日呀!
話說上星期五和六已經開始骨痛，
我以為天氣唔好老人病發作，
點知星期日早上開始覺得唔多妥，
頭重重、喉嚨乾涸、流鼻水和咳，
下午仲開始發燒添38.8度，
叫大魔怪幫我買個6合1測試劑，
check過又冇中招，
星期日冇私家醫生睇，
只好食住退燒藥先，
要捱到星期一先睇到醫生；
食咗藥簡直大昏迷，
感覺成個人好似坐在船上，
响個大海度蕩來蕩去咁樣；
連續燒咗3日，
到今日星期三先退燒咋!
呢幾日我過冇咩嘢食過，
喉嚨痛完全冇胃口，
老公每日買個麵包俾我吊命，
至於老公和大小魔怪食咩，
佢哋自己攪掂喇!
再唔係就買飯盒，
今日我精神好D，
就煲粥食呀!
今日中午1點，
我和老公要去做義工呀!
就係幫忙派愛心湯水俾嘉湖南區內老人家，
所以11點半左右就煮咗個雪菜榨菜湯麵做午餐呀!
呢幾日食咁多海鮮，
係時候要食清D喇!
4月11~12日，
我和老公帶母親大人去大亞灣飲飲食食，
我哋去到蓮塘關口後先call滴滴，
大約要175人民幣左右(單程)，
返到屋企放低行李，
就同母親大人搵食喇!
呢排叉燒好紅，
全因近排係觀塘出現10蚊免切叉燒飯；
我唔使出去買，
自己整嚟食都得，
我買咗1斤梅頭瘦肉，
整咗呢碟蜜汁叉燒，
嘻嘻，
真係好鬼正架!
去日本旅行時買咗樽芥末子醬返嚟，
今日就用佢嚟整芥末籽蜜糖烤雞扒，
今次又係用氣炸鍋嚟整，
好方便呀!
蒜頭豆豉蒸排骨食得多，
今次改用焗嘅方法嚟整呢碟排骨，
老公話味道濃郁咗，
焗出嚟嘅排骨好香，
話下次都可以咁整俾佢食呀!
今日香港下午開始落大雨，
所以大小魔怪都唔願出街，
佢哋話晚餐想食麻辣香鍋喎!
咁我拿拿臨落街買材料，
肉類就買咗雞、雜丸和芝士腸，
蔬菜就買咗蓮藕、萵筍和青瓜，
呢類香鍋落咩材料都得，
各有所愛呀!
今日買咗12隻大雞翼，
用蝦醬醃咗佢，
今晚就落油鑊炸嚟食，
脆卜卜，
好惹味架!
今晚大魔怪由日本飛返香港，
佢同女朋友仔响日本奈良和京都玩咗6日，
日日都食得好豐富，
返到嚟我緊係要煲番個芫茜魚片皮蛋豆腐湯，
個湯煲到奶白奶白，
好下火架!
收到好多日本手信，
好多綠茶食品，
哈哈，
特別有盒綠茶咖哩，
好特別呀!
噚日買咗1.5磅牛肋條，
買埋蘿蔔整咗煲清湯蘿蔔牛腩，
做法非常簡單，
個湯都俾老公和小魔怪飲埋呀!
上次响惠州行街市時，
買咗包窑雞粉返嚟，
今日就用佢嚟醃雞，
放入焗爐焗熟佢嚟食，
食落又真係好有係大陸食窑雞嘅味道喎，
塊皮仲有少少脆身添架!
前排食剩咗半盒叉燒，
我就買咗幾包烏冬返嚟，
炒咗呢碟瑞士汁叉燒炒烏冬，
我和老公兩個人食咗3包烏冬，
好味道呀!
