成日整節瓜粉絲蝦米，
食到有少少厭呀!
所以今次浸咗瑤柱和雲腿，
用嚟炆呢碟節瓜，
呢個餸咸咸香香又有汁，
送飯一流呀!
今晚煮咗碟絲瓜炒潮州魚卷，
清清哋都唔錯架!
我好鐘意食絲瓜，
清甜又爽口，
夏天食就最啱喇!
我落咗少少鹽和糖調味，
非常簡單又好味道呀!
屋企有幾種唔同嘅菜，
冰箱又有幾款唔同嘅急凍海鮮，
買埋$20瘦肉，
今晚就整咗呢個雜菜海鮮粉絲煲喇!
前兩日買咗生菜，
剩食生菜好似齋咗少少，
所以開咗2罐即食鮑魚加餸，
大小魔怪話做咩咁好餸，
嘻嘻，
7月喇!
又到出糧嘅大日子，
大家識做啦!
今日買咗半斤韭菜花嚟炒，
摷到屋企仲有魷魚乾和蝦乾，
落少少辣XO醬和肉絲一齊炒，
呢碟小炒王特別惹味呀!
响屋企附近商場，
有檔大集團嘅菜檔買嘅菜都特別平，
例如標價$10、$12或$15等，
佢哋可以係同價錢嘅蔬菜裡買兩份蔬菜，
所以噚日我買茄子2條+娃娃菜1包夾埋都係$15，
真係好抵買；
雖然佢哋賣菜特別平，
但環境衛生做得唔係太好外，
員工態度差到成日同客人嘈交，
所以我都唔係成日幫襯呀!
今晚得一碟餸~客家釀茄子，
用冬菇豬肉蝦米和乾蔥一齊釀，
2大條茄子煮起一大碟，
我食咗5件，
好滿足呀!
今日菠菜13蚊斤，
平咗喎!
於是買咗斤返屋企煮金銀蛋菠菜燴肉碎，
呢個餸濕濕哋，
有肉有菜又有皮蛋咸蛋，
加幾粒杞子落去又靚又有營養，
真係好送飯呀!
雪櫃仲有半個椰菜，
開咗罐豆豉鯪魚嚟炒，
睇唔出兩樣加埋一齊炒又幾夾喎!
上星期買咗片南瓜，
擺咗係雪櫃差D唔記得咗，
好彩老公提我，
唔係又嘥咗架啦!
老公鐘意食南瓜，
差不多大部份嘅南瓜都俾佢食哂呀!
3個月冇整過頭髮，
我D白頭髮麵標哂出嚟喇!
今日花咗3個半鐘頭整頭髮呀!
返屋企前買咗個腸粉餐$18做下午茶，
同老公兩份食，
好味道呀!
晚餐就煮咗呢個蕃茄雞蛋燴牛肉碎，
大人細路都啱食，
撈飯一流架!
第二道肉碎菜式係~欖菜肉碎炒豆角，
今次買咗長豆角嚟炒，
加咗十幾隻辣椒乾落去一齊炒，
少少辣，
好送飯呀!
噚日買咗2扎通菜，
一扎炒咗蝦醬通菜鮮魷，
今日就整馬拉盞肉碎炒通菜，
呢個餸咸咸香香，
真係好送飯架!
今次惠州之旅，
弟婦攞咗條佢自己生曬嘅臘肉俾我哋食呀!
平時我都好少買臘肉嚟食，
因為怕咗佢哋肉質太硬，
但弟婦自己曬嘅臘肉，
炒完出嚟特別香軟，
攪到我都要破戒食咗幾片，
嘻嘻，
又真係幾好食架!
今晚得我和老公兩個人食飯，
原本想炒碟福花菜炒牛肉就算，
但一碟餸好似好少，
最後蒸多2條臘腸補數，
咁老公就唔會詐型啦!
今日買咗魚肉、茄子和豆腐卜，
釀咗一大碟煮煎釀茄子豆腐卜 ，
再加咗個蒜頭豆豉芡汁燴一燴，
正到冇朋友呀!
其實我都幾好鐘意食菠菜，
簡簡單單灼熟佢嚟食又得，
用蒜蓉炒就更惹味，
食得刁鑽D就用金銀蛋肉碎煮嚟食，
菠菜，
真係點煮都咁好食呀!
噚日係愉景灣買嘅有機菜，
春菜$20和韭菜$10，
今晚用佢哋嚟煮晚餐，
春菜咸排骨蝦乾瑤柱仔煲&韭菜炒蛋，
潮洲紅桃粿(綠豆餡)係大魔怪女朋友仔請我哋食架!
屋企個煮食爐又壞壞哋啦!
其實今年4月已經換咗個新爐頭，
點知噚日又係拆唔到出嚟洗，
即刻搵咗煤氣公司維修技術員整，
今日嚟睇咗喇!
可以免費幫我再換個新爐頭，
呢個煮食爐用咗6年，
爐頭都換咗好幾次，
每次換都約$500~600，
老公話如果下次再壞，
買個新煮食爐好過喎!
今晚得番一個爐頭煮飯，
又見依家天寒地凍，
整煲熱辣辣嘅雜錦煲嚟食，
一煲過，
快靚正呀!
茄子雞蛋醬(素食)，
做法真係好簡單，
用咗黃豆醬、蠔油、豉油、老抽和糖嚟炆茄子，
炆到茄子淋哂後
加埋滑蛋撈佢，
灑上蔥花炒勻，
撈飯、撈麵和拌粥食都唔錯架!
