黑椒洋蔥豬扒

 

每次諗唔到煮咩餸，

我都會煮呢碟黑椒洋蔥豬扒，

因為簡單囉，

黑椒汁又好餸飯，

簡直係朱家家常菜之一呀!

節瓜眉豆花生鱆魚煲西施骨

今日細仔和老公都係屋企，

所以又係時候煲老火湯喇!

節瓜眉豆花生鱆魚煲西施骨，

有清熱解暑、健脾祛濕和強健筋骨等功效。(AI資料)

家常便飯

今晚得我和老公兩個人食，

都係家常便飯，

豆豉蒸排骨、煎素腐皮卷和灼菜芯，

簡單又好味道呀!

客家梅菜炆腩肉

今日去肉檔買咗條五花腩肉，

叫肉佬幫我起埋塊豬皮，

腩肉都幾厚身，

有肥有瘦，

底部仲有少少軟骨添，

分開切咗佢出嚟一齊炆，

炆出嚟腩肉就唔使咁大件喇!

叫外賣

 

今朝細仔WFH，

老公就約咗朋友飲茶，

我懶得煮午餐，

細仔話叫外賣~芙蓉德好味手撕雞，

手撕雞冷麵$42，

1盒小辣1盒唔辣，

仲有涼鞋小食$85~雞腎、豬耳和豬大腸，

原價$169，

加平台費$4.2，

但有優惠減$42.2，

呢餐總共$131。

亞仔話叫foodpanda平過keeta。

魚香茄子

 

今日煮咗個好送飯嘅餸~魚香茄子，

加咗梅香咸魚，

呢個餸特別惹味呀!

老公又要添飯喇!

豆角叉燒炒蛋

 

雪櫃仲有半盒叉燒，

今日就買咗半斤青豆角返嚟，

攞咗少少豆角切粒粒，

整咗呢碟豆角叉燒炒蛋，

細仔話好耐冇食，

正呀喂!

養生壺~石斛淮山湯

 

今日又用養生壺煲湯，

材料有淮山、石斛條、蓮子、百合、

麥冬、伏苓粒、龍眼肉、杞子和蜜棗，

呢個湯有滋陰、健脾祛濕等功效。

香煎豆腐

 

今日買咗盒豆腐，

落多少少油煎豆腐兩面，

再灑少少五香淮鹽係豆腐面，

咁就一個餸，

咸咸香香，

係咪好簡單呢!

家常便飯

今日細仔WFH，

預咗佢食飯，

點知煮好哂佢先話約咗朋友出街食飯，

好彩今餐煮嘅係家常菜，

西蘭花炒牛肉和蠔油薯仔炆排骨，

不過份量大，

又要食多幾餐先食完呀!

蕃茄雞蛋燴肉碎

 

今晚又係得我和老公兩個人食飯，

簡單一個餸有蕃茄、雞蛋和豬肉碎，

煮起連鍋一齊上，

碟都洗少一個呀!

青紅蘿蔔粟米螺片煲西施骨

 

今日見菜檔有青紅蘿蔔，

拿拿臨買埋粟米和西施骨，

煲咗呢個青紅蘿蔔粟米螺片煲西施骨，

加埋蜜棗、南北杏和瑤柱仔，

啖湯好甜，

好好飲呀!

上水雲軒樓

今日我哋約咗大伯大伯娘一齊辦事，

完事後就落上水食午餐，

我哋揀咗去雲軒樓飲茶，

第一次食，

味道ok啦!

入大埔探孫仔

 

今日入咗大埔探朱鎧仁小朋友，

呢排新抱仔放暑假，

日日由媽媽湊佢，

又成日帶佢出街，

所以變得好黐身，

遲下新抱仔要開學，

佢肯會喊死囉!

晚餐由我負責煮，

沙薑豬手、涼拌茄子、蝦膏蒸豬肉、烚西蘭花，

仲有雞腳眉豆花生煲西施骨湯。

木耳榨菜蒸米粉

今晚食得簡單，

整咗木耳榨菜蒸米粉，

我和老公兩個人食3個米粉，

份量啱啱好，

每人食咗2碗，

好飽架!

亂棍打死牛魔王~豆角炒牛肉

亂棍打死牛魔王即係豆角炒牛肉，

雖然呢個名字由來我唔知，

但我剩係知道我鐘意食呢個餸囉!

蓮藕紅蘿蔔粟米煲豬尾骨

仲有1節蓮藕係屋企，

用佢嚟煲湯就最啱喇!

蓮藕紅蘿蔔粟米煲豬尾骨，

全程煲1.5小時，

落少少鹽調味就好好味道架啦!

蠔油薯仔炆排骨

 

今日買咗2條腩排$60，

買多兩個薯仔，

整咗大大鍋蠔油薯仔炆排骨，

專登落多少少水，

多D汁，

好送飯呀!

家常便飯

 

今日要去政府牙科洗牙，

洗牙我係怕怕架，

因為怕痛囉!

不過唔洗又唔得，

唯有頂硬上啦!

今晚煮埋噚日半份蓮藕餅(冇加冬菇)，

仲有西蘭花苗炒蝦仁，

煮完先發覺呢兩碟餸都係要咬架!

洗完牙牙軟軟，

要慢慢食先得啦!

香煎蓮藕餅

 

好耐冇整過蓮藕餅，

今日買咗2節蓮藕，

攞咗其中一節嚟整蓮藕餅呀!

呢份我加咗一隻大冬菇落去(切粒)，

一碟有8件。

黃氏家聚

 

 噚日黃氏家聚，

我一早整咗沙薑雞腳拎過去一齊食，

早午母親大人、妹妹一家3口、我和老公，

一齊去禾輋海港酒家飲茶，

姐姐佢哋有事做下午先會到妹妹家；

去到妹妹家部入人開枱打麻雀，

我、姐姐和妹夫就唱K；

晚餐方面，

妹妹佢哋係中山買咗兩隻窑雞落嚟，

吩咐工人姐姐整咗手撕雞，

灼雲吞餃子、沙薑雞腳、節瓜瑤柱、蟹柳炒蛋、白灼蝦，

仲有祈祈就自整嘅牛肉漢堡包，

美女廚房，

整得真係好好味道呀!

輕食~榨菜肉絲鮮蝦蟹籽雲吞米粉

呢兩日係惠州食咗好多嘢，

係時候要食番清D喇!

所以今日就嚟煮輕食，

榨菜肉絲鮮蝦蟹籽雲吞米粉，

袁記雲餃嘅鮮蝦蟹籽雲吞真係冇得輸，

配埋自煮嘅榨菜肉絲，

呢餐真係好好食呀!

惠州3日兩夜

8月3日星期一

今日我、老公和姑奶3個人係蓮塘口岸食早餐後，

就返咗惠州，

中午約咗親戚一行7人，

齊齊去我家附近老牌酒樓飲茶，

堂妹買咗團購卷108套餐，

我哋叫多籠蝦餃，

呢餐食咗￥141，

超抵食呀!

沙薑雞腳雞翼

今日去大埔探朱鎧仁小朋友，

佢啱啱上玩playgroup返嚟，

又攰又眼瞓，

好扭計呀!

好彩瞓醒食飽後又變返活潑可愛咋!

襯佢瞓覺，

我整咗沙薑雞腳雞翼，

而晚餐就由新抱仔煮，

沙爹粉絲牛肉煲、涼拌海藻菜和小米斧飯。