姐姐妹妹佢哋好想食咖哩豬皮蘿蔔魚蛋，
簡單啦!
今日買哂材料煮咗一大盒，
明天攞去妹妹家開除夕party呀!
唔知係咪我哋兩公婆人老咗，
著幾多衫都覺得好鬼凍呀!
所以今日煲西洋菜咸鴨腎湯，
飲碗熱湯，
成個身體都會暖笠笠呀!
哈哈，
又到糧尾時候喇!
慳慳哋煮咗碟XO醬西蘭花炒雞柳做晚餐，
加埋食剩嘅幾件叉燒，
嘻嘻，
咁又一餐啦喂!
我想食叉燒，
小魔怪想食雞翼，
一次過滿足哂我哋兩個為食貓，
都唔錯吖!
今日Boxing day有咩做??
就係包餃子喇!
買咗1斤豬肉碎和1斤餃子皮(厚)，
加埋一大扎韭菜，
包咗52隻韭菜豬肉餃子；
煎咗10隻嚟做午餐(試食)，
今次煎餃子冇失手，
餃子皮脆脆又juice，
咬落仲有好多肉汁漏哂出嚟添!
真係超正呀!
今朝買咗個冰鮮豬肚和排骨，
煲咸菜胡椒豬肚黃豆排骨湯；
聽天文台話呢幾日會凍，
所以飲呢個湯就最啱驅寒架喇!
2021平安夜，
我和老公係屋企撐枱腳食平安夜晚餐!
焗雞髀、炸帶子、烚粟米和西蘭花，
呢餐簡單又好味。
祝大家，
平安!幸福!
今朝我買咗條生命麵包，
屋企又有罐咸牛肉，
摷埋個古董飛碟機出嚟，
整件咸牛肉飛碟做咗我嘅午餐喇!
雖然個古董飛碟機外型又殘又舊，
但仲用得，
我唔捨得掉咗佢呀!
今日午餐食D咩???
我將噚日食剩嘅雞肉，
加埋拆咗肉嘅雞殼，
煲咗煲咸雞粥，
蒸魚肉燒賣和煎素餃子，
咁又一餐囉!
哈哈，
係咪好hea呢???
今日冬至，
我雀后祝大家冬至快樂，
團團圓圓，
身體健康!
噚日買咗隻雞嚟醃咸佢，
整老公至愛嘅客家咸雞嚟食呀!
今次攪攪新意思，
整碟起咗骨嘅客家咸雞，
配埋碟傳統客家蔥油點雞食，
呢隻雞皮薄肉嫩又唔肥，
一隻雞分兩餐食，
啖啖肉，
真係好正架!
噚晚得我和小魔怪係屋企食晚飯，
兩個人懶得煮又懶得落街食，
唯有叫外賣啦~天水圍辣將軍(海南小廚)，
涼拌麻辣三寶、乾鍋田雞、炒酸辣土豆絲，
呢餐$249。
噚日做冬整呢隻玉露雞，
係好耐之前跟yahoo blog友熙媽食譜整的；
我都有好幾年冇整過呢款雞，
今年又整番嚟食下啦喂!
今日朱家四口子都在家，
所以我哋今日就預早食冬至飯，
五餸一湯，
有葷有素，
白飯任裝!
買咗盒有機豆腐嚟煮肉碎，
加咗少少辣豆瓣落去一齊煮，
辣辣哋，
好送飯呀!
摷到大魔怪俾我嘅太興$200現金劵，
襯今日老公要落元朗，
咁就順便叫佢去太興睇下買到D咩啦!
叉燒1斤$125，
白切雞半隻$85，
加多$2外賣袋，
總共$212要補現$12呀!
買咗1斤荷蘭豆，
分咗兩餐嚟食呀!
一餐清炒荷蘭豆，
一餐就XO醬荷蘭豆炒臘腸。
今朝落街買餸，
見到D豬腩排好鬼靚，
五層肉半肥瘦，
用嚟炆芋頭就最啱喇!
噚日買咗盒沙律菜，
本來諗住俾大魔怪整蔬菜沙律，
點知佢出街都冇返嚟食飯，
咁唯有留番俾我哋食啦!
今朝分咗1/3盒小魔怪帶返公司食，
今晚我和老公食咗1/3盒，
仲有1/3盒就要留番明天先食啦!
今晚煎咗塊雞扒拌沙律菜，
加車厘茄和芝麻沙律醬，
嘩，
好靚呀!
噚日買咗豬仔骨，
解凍用韓式烤肉醬醃咗一日，
今晚就整咗呢鍋韓式炆豬仔骨，
個汁甜甜香香，
好送飯呀!
噚日除咗整韓式蔬菜煎餅(素)外，
我仲整埋咖哩雜菜配黃金酥餅添呀!
用咗李錦記咖哩醬，
雜菜就薯仔、甘筍和洋蔥，
煎多4塊黃金酥餅，
食到大魔怪Lam Lam脷呀!
今日大魔怪放假，
簡單煮咗兩款素菜俾佢做午餐。
其中一款係韓式雜菜煎餅，
用上屋企僅有材料，
少半個椰菜和半條甘筍，
加韓式煎餅粉、雞蛋、鹽、胡椒粉、黑胡椒碎和水，
用中火慢慢煎成兩面少少焦香(落多少少油嚟煎)，
最後灑少許熟芝麻，
咁就食得架啦!
平時我都好鐘意上youtube偷師，
學下其他人煮菜架!
今次就學人整東北名菜~白菜豬肉燉粉條。
呢個餸材料簡單又易做，
加咗粉條我可以當飯食，
真係幾正架!
小魔怪點解唔辣架???
佢話如果辣辣哋應該仲好食喎!
哈哈，
估唔到佢咁鐘意食辣，
似我呀!
唔係我唔煮辣，
係老公唔食得辣呀!
買咗4磅急凍豬手，
睇唔出呢批豬手咁好肉喎!
一次炆哂D豬手，
我和老公緊係食唔哂啦!
我用餐盒裝起咗部份花生豬手，
儲係冰箱呀!
一餐剩食花生豬手，
另一餐我加埋支竹落去一齊炆翻熱佢，
兩種食法，
大家鐘意邊款呢???
貪得意係凍肉舖買盒即食麻辣小龍蝦試下，
話明麻辣小龍蝦，
緊係又麻又辣啦!
我食得辣都覺得好麻辣，
老公食咗2~3隻就放棄了，
至於小魔怪呢???
佢原來唔係咁鐘意食小龍蝦，
咁即係話，
呢碟麻辣小龍蝦差不多我一個人食哂呀!
响759亞信屋買嘅無激素豬梅肉片，
好多人買嚟打邊爐，
但我就鐘意用佢嚟做薑汁燒肉喇!
薄薄哋易煎又入味，
配埋我至愛嘅芝麻醬椰菜絲，
嘻嘻，
咁就連菜都唔使煮啦!
前幾日剩咗嘅餃子皮，
我用嚟包咗34隻素餃子；
大魔怪好鐘意食煎素餃，
可惜今次有少少失手，
煎得唔靚呀!
今日去759亞信屋入貨，
買咗4包($100)無激素豬扒和豬肉片，
仲有3包($52)急凍蝦仁，
雖然蝦仁細細隻，
但都幾爽口架!
原本今日午餐得我一個人食，
點知小魔怪突然話要留家工作，
咁我即係午餐唔煮都唔得啦!
拿拿臨煮一大鍋雪菜肉碎，
用嚟撈米線食呀!
煮咗咁大鍋雪菜肉碎點算好???
我鐘意將一半雪菜肉碎放入餐盒雪入冰箱，
咁就隨時都可以攞嚟食啦!
噚日包咗韭菜豬肉餃子，
緊係要整煲花膠雲吞雞嚟嘆下啦!
小魔怪和老公不知食得幾滋味，
小魔怪仲讚我包嘅韭菜豬肉餃好好食，
話唔使再食街買嘅餃子喎!
睇嚟我以後都冇得偷懶囉!
計下計下，
我都有成4個月都冇自己包過餃子囉!
見今日又係得我一個人係屋企，
唔使趕住煮午餐，
咁就買定材料嚟包餃子啦!
買咗$15餃子皮，
包咗63隻餃子，
11隻元寶餃子，
仲有餃子皮剩，
咁明天包素餃俾大魔怪食啦!
午餐又用個小電鍋煮湯餃子食，
落咗生菜和紫菜，
仲加埋我至愛嘅辣椒油，
熱辣辣韭菜豬肉湯餃子出鍋喇!
