花膠雲吞雞

噚日包咗韭菜豬肉餃子，

緊係要整煲花膠雲吞雞嚟嘆下啦!

小魔怪和老公不知食得幾滋味，

小魔怪仲讚我包嘅韭菜豬肉餃好好食，

話唔使再食街買嘅餃子喎!

睇嚟我以後都冇得偷懶囉!

材料: 雞1隻、花膠2隻(已浸發)、金華火腿適量、韭菜豬肉餃子14隻、

小棠菜適量、瑤柱8粒、薑5片、水10碗

做法: 洗淨雞後，將薑2片和雞放入熱水鑊內出水5分鐘後沖水備用；

小棠菜洗淨；金華火腿切粗條後放入熱水碌一碌後撈起；瑤柱沖水備用；

將10碗水煮滾後，落雞、金華火腿、瑤柱和薑3片用中火煮滾，

轉小火慢慢滾1小時，用羹片起浮起嘅雞油，落花膠滾多30分鐘；

用另一個鍋將韭菜豬肉餃子灼熟；小棠菜放入雞湯內煮至番滾後加鹽調味，

落埋韭菜豬肉餃子滾多1分鐘便成。

~蔬菜方面，可揀白菜、娃娃菜、小棠菜和津白都可以呀!

     

 大家可以入嚟Facebook讚下我新開嘅Fans專頁呀!

 雀后(添飯)Facebook Fan Page