韭菜豬肉餃子

計下計下，

我都有成4個月都冇自己包過餃子囉!

見今日又係得我一個人係屋企，

唔使趕住煮午餐，

咁就買定材料嚟包餃子啦!

買咗$15餃子皮，

包咗63隻餃子，

11隻元寶餃子，

仲有餃子皮剩，

咁明天包素餃俾大魔怪食啦!

午餐又用個小電鍋煮湯餃子食，

落咗生菜和紫菜，

仲加埋我至愛嘅辣椒油，

熱辣辣韭菜豬肉湯餃子出鍋喇!

材料: 豬肉碎1斤(半肥瘦)、韭菜$5、雞蛋1隻、蒜蓉適量、

水4湯匙、滾油適量

調味: 豉油2湯匙、蠔油1湯匙、鹽1茶匙、糖1茶匙、生粉2茶匙、

麻油少許、胡椒粉適量

做法: 將豬肉碎放入大碗內，加入調味攪勻後，

落水2湯匙慢慢攪至豬肉餡料起膠，再加雞蛋和水2湯匙攪勻，

放入雪櫃雪1小時；韭菜洗淨去頭，瀝乾水份後切碎；

從雪櫃取出豬肉餡，加入韭菜和蒜蓉，贊滾油係蒜蓉和韭菜面後，

將韭菜和豬肉餡攪勻後，便可以用嚟包餃子架啦!

包好嘅餃子可以裝起放入冰箱內，咁就隨時都有得食啦!

大家可以入嚟Facebook讚下我新開嘅Fans專頁呀!

雀后(添飯)Facebook Fan Page