買咗一磅免治豬肉碎，
炒咗兩個小菜，
魚香茄子&青瓜雞蛋炒肉碎，
簡簡單單又好送飯，
唔錯架!
大魔怪食番肉，
最高興嘅竟然係小魔怪，
因為佢話以後可以唔使飲齋湯啦!
今日煲粉葛土伏苓牛大力地老鼠煲西施骨湯，
加咗紅蘿蔔、馬蹄、粟米和蜜棗，
煲3小時後就有得飲架啦!
今日早起走咗去剪頭髮，
所以冇去街市買餸，
雪櫃有咩就煮咩，
嘻嘻，
又可以打斧頭囉!
今日買咗兩條排骨，
叫老板幫我斬開細細粒，
可蒸可炸，
返到屋企點整都冇問題啦!
今次整氣炸蝦醬小排骨，
一滴油都冇落，
仲逼咗好多豬油出嚟，
好香好惹味呀!
客家蔥油雞髀，
靈魂係舖係上面嘅蔥油，
客家人食雞時，
好鐘意蘸上由乾蔥頭造嘅豉油一齊食，
配上自家製花生油，
諗起都想快D可以返惠州食家鄉走地雞呀!
噚日係流浮山買嘅海星湯包$68，
裡面除咗有海星外，
仲有海底椰乾和雪梨乾，
亞姐話呢個湯包可以分開5次煲，
今日拿拿聲即刻煲嚟飲，
啖湯真係好清甜，
好好飲呀!
呢個湯有化痰止咳，清熱潤肺，解毒散結等功效。
上星期我和老公去咗流浮山，
引到姐姐和姐夫今日都話要去流浮山入貨，
今次佢哋揸車車埋我哋呀!
今日大暑，
天時暑熱我冇煲冬瓜湯，
買咗個西瓜返嚟雪凍佢嚟食，
好爽架!
有西瓜食，
人就開始放肆了，
整咗超熱氣嘅南乳炸金沙骨做餸，
好惹味呀!
老公摷雪櫃見有條急凍黃花魚，
老公話想食魚喎!
OK冇問題啦!
今日餐多舊魚~食。
蝦醬蒸豬腩肉；
買咗舊豬腩肉返嚟唔好洗，
成舊放入冰箱雪硬佢，
之後攞出嚟切薄片係會易D架!
二人晚餐，
青瓜小炒肉配蝦米雞蛋炒飯；
買咗舊腩肉返嚟，
切幾片出嚟炒青瓜，
簡單又好送飯，
唔錯架!
我今朝起身冇耐，
就俾老公拉咗出去行晨運；
早上7點3左右就出發，
由天水圍徒步入流浮山；
今朝朝早已然有成29~30度左右，
行到半路已經成身濕咗，
行咗差不多2小時(平路慢行)，
終於行到流浮山巴士站啦!
近排係街市見到拳頭咁大個嘅西蘭花賣，
$15有半斤，
同普通西蘭花有咩分別???
就係冇西蘭花莖，
切出嚟成個都可以食呀!
7月初，
我上網book咗今日12:00同老公兩個人，
去參觀新開嘅香港故宮文化博物館；
我哋搭屯馬線响南昌站轉東涌線去九龍站落車，
再轉搭綠van過去呀!
其實行過去都可以，
不過太曬都係坐車舒服D囉!
天氣熱，
朱家涼拌菜又出爐啦!
今日整咗碟涼拌麻辣青瓜，
爽爽脆脆，
冰涼開胃，
麻辣惹味，
送飯一流呀!
天氣熱辣辣，
兩個人食飯就煮得簡單D喇!
晚餐滾咗鍋絲瓜魚肚雲耳肉片湯，
撈湯食飯都唔錯架!
連餸都可以唔使煮，
哈哈，
慳家之首選呀!
今晚要返學，
中午炒咗一大鍋咸魚肉碎炒飯，
午餐和晚餐一鍋攪掂哂!
依家香港天氣日日都超過30度以上，
攪到我每次煮飯後都好似沖完涼一樣，
成身濕哂架!
所以好多時我煮完飯都冇咩胃口食飯，
今日滾咗呢個生菜魚肉湯，
清清哋又菜有魚肉，
我唔食飯都得呀!
今晚煮咗呢個麻辣大雜錦，
有鮑魚、蝦、雞髀肉、雜丸、薯仔、福花菜，
大小魔怪做咩今餐咁好餸，
我話呢D全部都係屋企已有物資嚟，
要清雪櫃就要食得豪D呀!
用埋呢半樽麻辣雞煲醬，
麻麻香香，
超正呀!
攞咗個11吋嘅大蘿蔔糕兜嚟裝呢個麻辣大雜錦，
我以為會食剩好多啦!
點知最後食剩一個飯碗左右嘅餸，
可想而知我哋幾大食呢!
今朝我天未光就起咗身，
幸運的影到晨光第一線，
好靚呀!
老公中午出咗街，
得我一個食就唔煮喇!
求其食麵包就算；
晚餐仲懶，
叫老公返屋企前去買個兩餸飯，
我炒埋碟菜芯牛肉，
咁就開得飯架喇!
今日小暑，
中國廿四節氣之一，
應節煲冬瓜湯嚟飲呀!
冬瓜紅蘿蔔粟米排骨湯，
配生熟薏米瑤柱紅棗。
呢排成日落雨，
攪到個人都立立哋，
懶得諗食咩，
雪櫃有咩就煮咩囉!
前兩日得我和小魔怪兩個食午餐，
求其煎咗2包餃子做午餐，
簡簡單單又一餐呀!
奇怪，
真係奇怪喇!
我明明買7隻雞全翼返嚟，
但當我用氣炸鍋焗雞翼時，
竟然得番7隻雞翼連尖和6隻雞膇仔，
咁第七隻雞膇仔去咗邊呀???
今朝起身口淡淡，
晏晝係屋企坐坐下沾寒又沾凍，
拿拿聲即刻做番個COVID檢測先得，
好彩仲係一條線呀!
老公話我呢排吹得冷氣多，
所以感親喎!
晚上唔想食飯，
煲咗煲潮州粥，
炒碟雜錦炒粒粒嚟送粥呀!
今日依然係8號風球，
由於屋企冇哂菜，
所以焗住要落街呀!
今日因為風大，
我唔敢行公園做運動，
退而求其次行走廊幾個圈就去買菜。
好彩仲有幾檔菜檔有開，
拿拿臨買完菜就返屋企囉!
打風食得簡單D，
其中一碟就係薯絲炒肉絲喇!
今日七一回歸假期，
大小魔怪都係屋企食飯，
所以煲啖靚湯俾佢哋飲呀!
印度椰子粟米紅蘿蔔馬蹄排骨湯，
加咗瑤柱、南北杏和蜜棗一齊煲，
呢煲湯煲咗2個鐘，
好清甜好滋潤架!
