簡簡單單又一餐

之前係759亞信屋買嘅pizza，

今日我和老公食埋最後一盒啦!

自從上次買完之後，

我都好耐冇見759有得賣，

想再買到佢都幾難呀!

今晚晚餐我都係冇煮飯，

 

煮咗餃子烏冬食，

兩個人食簡簡單單咪好囉!

蕃茄薯仔紅蘿蔔栗子素湯

前兩日煲咗個簡單嘅素湯，

蕃茄薯仔紅蘿蔔栗子湯，

材料全部俾我哋食哂，

真係一D都唔嘥架!

瑞士汁雜菜豬肉絲炒烏冬

 

今日午餐食雜糧，

瑞士汁雜菜豬肉絲炒烏冬；

因為小魔怪在家工作，

所以炒咗4包烏冬，

多多都冇有怕，

小魔怪會幫我清哂佢呀!

蒜頭豆豉炆鳳爪排骨

蒸鳳爪排骨就食得多，

今日就試下用炆嘅方法去做，

落咗辣豆瓣醬一齊炆，

真係惹味好多架!

魚香茄子

 

上次用咗1/4件咸魚嚟炒飯，

今日又剪咗少少咸魚肉嚟煮魚香茄子；

加咗咸魚嘅魚香茄子特別惹味，

攪到老公和我都唔覺唔覺咁，

添多咗飯呀!

醬豬手

今日買咗隻豬手，

叫亞姐唔好幫我斬件，

剩係腳趾位置斬開；

滷咗呢碟醬豬手，

豬手起骨片肉，

嘩，

啖啖肉，

又有骨膠原，

正呀喂!

豉油皇煎蝦

小魔怪至愛食蝦，

噚日就買咗1磅半急凍蝦，

整咗一大碟豉油皇煎蝦，

食到佢Lam Lam脷呀!

小魔怪有個怪習慣，

佢會食埋D蝦殼，

我就唔得囉!

冬菇花膠炆鴨腳

 

中秋節當日，

炆咗一鍋冬菇花膠鴨腳，

花膠係鱈魚膠，

雖然細細隻，

但都好有膠質，

好養顏啊!

蒜蓉豆豉南瓜蒸排骨

老公成日叫我煮南瓜俾佢食，

噚日去街市見到有切開咗嘅南瓜賣，

於是買咗1小件返嚟蒸蒜蓉豆豉排骨呀!

開箱

星期五晚落單，

今日中午就送到屋企，

有人話我買來買去都係果D嘢；

係架，

因為我食過覺得唔錯先至再訂嘛!

不過呢，

我都肯試新嘢架!

好嘅就再買，

唔好咪買一次就算囉!

呢度大約買咗$349呀!

朱家慶中秋

今日我哋朱家慶中秋，

懶煮嘅關係，

叫咗外賣炸雞&pizza。

呢個餐都幾抵食$378，

2個普通9寸pizza，

6件炸雞，

焗飯/意粉/小食(選三)，

汽水/湯/蒜蓉包(選一)，

網上訂餐滿$300送炸春卷1份，

我哋4個人都食唔哂，

剩番嘅pizza和蒜蓉包，

留番嚟大小魔怪明天做早餐啦!

雙冬支竹炆排骨

 

今日煮咗一大鍋雙冬支竹炆排骨；

雙冬即係冬瓜和冬菇，

用嚟炆支竹排骨係好好食架!

我最鐘意撈汁送飯，

濕濕哋易入口呀!

老火湯~鱆魚蓮藕馬蹄紅蘿蔔綠豆排骨湯

 

天氣咁鬼熱，

我都真係好耐冇煲老火湯呀!

襯小魔怪今日home office，

拿拿臨買材料煲啖湯飲下喇!

鱆魚蓮藕馬蹄紅蘿蔔綠豆排骨湯，

加埋陳皮和蜜棗，

食湯渣都食飽呀!

歐式天然酵母麵包制作精選實習中班~第二堂

第二堂，

特濃金沙朱古力包&杏仁香芒吐司，

個朱古力包係流心的，

好正架!

瑞士汁豬手豬肚

 

雪櫃仲有小半支瑞士汁，

快快用埋佢唔好"阻定"呀!

買急凍豬手粒時順便買多埋個急凍豬肚，

滷起一大鑊，

可以分兩三餐食呀!

XO醬蝦仁炒青瓜

响百佳買嘅急凍蝦仁，

總有幾包儲係雪櫃冰箱裡面；

用嚟炒蛋或炒瓜嘜都得，

隨時加餸都冇問題呀!

豉油汁洋蔥豬扒(帶甜)

近日有兩個颱風係香港附近，

一個向左走，

一個向右走，

過門而不入呀!

攪到呢兩日香港天氣日日都35度以上，

真係熱到爆呀!

咁熱都唔知食咩好，

摷下雪櫃有豬扒就食豬扒啦!

呢碟豉油汁洋蔥豬扒甜甜哋，

好送飯架!

蒜頭豆豉蒸黃立鯧

响百佳買咗2條急凍黃立鯧($29.9)，

見唔係咁貴，

買嚟試下都好喎!

今次用蒜頭豆豉嚟蒸，

因為豉汁好送飯呀!

雜錦鍋

每當我諗唔到煮咩餸時，

一個雜錦鍋就會出現係飯枱上架啦!

煮起一大鍋，

包羅萬有，

全部都係家人鐘意食嘅嘢，

又攪掂一餐啦喂!

歐式天然酵母麵包制作精選實習中班~第一堂

休息咗差不多1個半月，

今個星期二我哋又開學啦!

第一堂學搓~香辣乳酪麵包、天然酵母法式吐司。

柱候蘿蔔牛腩牛肚

老公點名話要食牛肚，

拿拿臨去買材料啦喂!

買唔到金錢肚，

毛肚都照殺啦!

蒜香魚露炸雞翼

 

買咗磅大雞翼，

最啱就係用嚟整魚露雞翼架啦!

見好耐冇食過炸雞翼，

今日一於開爐炸嘢啦!

今次D雞翼真係隻隻都係十八歲，

卜卜脆呀!

拉麵說~半筋半肉台式红燒牛肉面

之前試過拉麵說嘅豚肉叉燒拉麵和广式豬肚雞風味拉麵，

今餐就試新嘢~半筋半肉台式红燒牛肉面。

食後感，

我個人覺得麻辣醬唔太辣，

牛湯底都算濃郁，

有牛肉同有少少牛筋添，

加埋包酸菜拌食拉麵，

配搭得啱啱好，

可以一試呀!

生日快樂

哈哈，

今日係我正日生日，

原本都唔打算慶祝，

因上8月中先同母親大人、姐姐妹妹佢哋一齊食過生日飯；

但母親大人、姐姐姐夫和妹妹妹夫都想聚一聚，

所以齊齊入嚟天水圍玩樂下囉!

妹夫好有心買咗個生日蛋糕送俾我，

真係好開心呀!💕💕💕

老公驚我煮得辛苦，

所以呢餐生日飯都係蒸蒸煮煮和買外賣呀!

XO醬西芹炒雞柳

我細細個時唔係咁鐘意食西芹架!

但唔知係咪自己老咗兼口味變咗呢，

依家對西芹又唔係咁抗拒喎；

而老公和小魔怪又鐘意食西芹，

所以間唔中我買西芹嚟做餸，

今餐就煮咗XO醬西芹炒雞柳喇!

蝦仁腸仔蛋炒飯

唔知有冇朋友仔好似我一樣，

鐘意加D菜粒嚟炒飯；

尤其係個西蘭花莖，

我會留起嚟切粒粒炒飯，

食落爽口又好味道呀!

豉油雞

今日一早去咗健康院抽血，

兩個星期後去覆診就有報告睇喇!

返到屋企附近街市買咗隻雞整豉油雞，

唔記得咗今朝抽完血，

斬雞時隻右手有D痛添!