由於今年冇年三十晚
所以今日年廿九食過團年飯後，
明天就係大年初一喇!
除夕夜，
慶團圓，
四餸一湯，
白飯任裝!
前兩日我自己唔係咁舒服，
所以都冇咩心情大掃除和煮飯呀!
求求其其煮下粉麵食算啦!
休息咗幾日後，
今日又要準備刨蘿蔔整蘿蔔糕呀!
做法年年一樣，
冇變呀!
咸蛋蒸肉餅呢個餸，
我由細食到大架!
今日見有隻咸蛋係屋企，
簡簡單單蒸碟肉餅嚟嘆下啦喂!
執冰箱摷到裡面有2塊雞扒，
拿拿臨解凍用泰國香辣雞翼粉醃咗佢，
今次唔開油鑊喇!
用氣炸鍋做炸雞，
好熱氣，
但好好味道呀!
今日開油鑊炸腰果&炸蝦片，
炸咗1斤半腰果，
預咗部份腰果送俾姐姐，
答謝佢聖誕時織咗條頸巾俾我呀!
哈哈，
平時蒸水蛋，
我會用量杯去加量水，
但今次蒸水蛋，
全部都係靠自己平時蒸水蛋經驗而做的，
好彩都冇失手，
水蛋一樣滑過我塊面呀!
一連兩日廚房大掃除，
今朝我就拆咗個抽氣扇出嚟洗，
好彩我一年都洗幾次抽氣扇，
所以都唔算太污穢呀!
今日去街市入貨，
買咗條五花腩肉返嚟，
整我至愛嘅蒜泥白肉呀!
麻麻香香辣辣，
好正架!
大魔怪噚日食完塊韓國雜菜粟米煎餅(素)後，
佢話想食泡菜喎，
不過街外買嘅泡菜係落魚露醃製的，
要搵到啱哂大魔怪呢位素食人士食嘅泡菜，
我唯有嘗試自己整啦!
大魔怪噚日開始WFH，
我又要日日煮唔同素菜俾佢食啦!
今日除咗煲咗雜菜素湯外，
仲煎咗韓式雜菜粟米餅俾佢食呀!
今日見到肉檔有斬咗件嘅元蹄肉賣，
整紅燒肉就最啱喇!
揀咗件冇咩肥膏瘦肉多多嘅元蹄肉，
雖然瘦肉部份有少少"鞋"口，
但老公話"鞋"有"鞋"好食喎!
而我就揀咗唯一有少少肥肉嘅豬皮食，
好滑好好食呀!
今晚我要返學，
下午整咗鍋黑椒金菇粉絲豬肉片，
留起部份俾老公做晚餐，
呢個餸有黑椒汁，
送飯一流呀!
噚日買咗幾條厚肉嘅金沙骨返屋企，
醃咗一日一夜，
今晚用氣炸鍋焗嚟食，
老公好懷疑咁話熟唔熟架???
哈哈，
我話唔熟架，
千祁唔好食，
點知最後佢食得多過我呀!
今日星期日，
我哋一家四口子都係屋企，
老公話午餐想食粥，
拿拿臨煲皮蛋瑤柱瘦肉粥，
炒碟豉油皇炒麵，
買埋油炸鬼和牛脷酥$20，
(油炸鬼牛脷酥又貴咗呀!)
午餐攪掂；
晚餐好簡單，
焗咗兩個韓國pizza，
食埋下午食剩嘅皮蛋瑤柱瘦肉粥，
咁又一餐喇!
呢幾日我好努力咁清雪櫃冰箱嘅食品，
騰出多餘空間後，
咁我又有機會再去入貨啦!
今次主要係清我包嘅韭菜豬肉餃子呀!
第二堂學搓青芥末吞拿魚包&杏仁朱古力包。
加咗芥末粉和芥末嘅麵包，
食落係冇咩芥末味架!
之前我上網想book期打第三針疫苗，
點知起碼最少要排到2月中先有位，
聽朋友話仲有排隊起碼2~3個鐘先打到針呀!
攪到我心大心細，
唔知打唔打好呀!
今朝去食早餐時，
見到商場醫務所有人排隊攞籌打疫苗；
當我食完早餐後，
就走入去醫務所碰碰運氣，
睇下仲有冇籌，
就係咁我已經打咗第三針疫苗喇!
晚上炆咗碟豆醬支竹炆腩排和炒菜芯，
簡簡單單又一餐。
今日小魔怪開始WFH，
見佢平時冇機會係屋企飲湯食飯，
即刻煲番煲朱家例湯~青紅蘿蔔粟米螺片豬腱湯。
我好鐘意食青紅蘿蔔，
老公鐘意食粟米，
而小魔怪就鐘意食螺片和豬腱，
所以呢個湯，
我哋係會清哂D湯渣架!
上星期五諗住去造顏色焗油，
點知幫我整頭髮嘅髮型師話我頭髮太多兼鬆散，
所以要造游離子直髮先呀!
隔咗3日即噚日星期一，
我再去整顏色焗油，
今次染咗紫色呀!
卷咗個大圈圈髮型靚咗一晚咁多啦!
今朝洗頭後又直番哂囉!
老公飲咗咗少半支紅酒，
佢叫我攞嚟煮餸喎!
今日就炆咗鮮茄紅酒燴牛腩，
煮咗一大鍋，
分兩餐食都冇問題啦!
由於Omicron病毒已經入侵香港社區，
所以我哋又要過晚上冇得出街食飯嘅日子；
平日週末，
大小魔怪好少係屋企食飯，
今日兩個就好乖留係屋企，
咁我就拿拿臨煲啖素湯俾大家飲啦!
今次好足料，
買咗2個印度椰子嚟煲湯，
啖湯好香椰子味，
好正架!
呢個湯有止咳潤肺，滋陰清燥熱等功效呀!
其實呢個課堂我已經學過，
不過為咗有得玩又有得食嘅關係，
學多幾次都唔係問題呀!
第一堂學搓紫菜芝士蟹柳包、蘑菇芝士雜菜包。
今日買咗一舊上肉，
問肉檔亞姐俾少少肥豬肉加落去一齊攪碎，
咁個蒸完個肉餅會滑D，
甘香D架!
大魔怪超鐘意食黑松露醬炒滑蛋，
所以最近買咗樽黑松露醬返嚟，
95%係蘑菇，
5%係黑松露；
黑松露嘅味道有點似石油氣味，
哈哈，
我唔係咁頂得順囉!
食得多濃味嘅餸菜，
有時都會食得清淡少少架!
今餐炒咗碟椰菜粉絲煮蝦米，
只係落少少鹽、糖、和香菇粉調味，
清清哋又好好味，
老公話成日食都得喎!
老公和我都鐘意食鴨腳，
所以每次見到有大鴨腳賣時，
我都會買定放入冰箱，
咁就隨時想食就可以煮嚟食喇!
2022年第一煮~麻辣雜錦煲!
小魔怪初頭話唔辣呀!
點知當個麻辣汁越煮越濃味後，
佢終於食到口水鼻涕都出哂嚟，
最後要飲罐冰凍啤酒嚟解辣呀!
話時話今次係廳度炒呢個麻辣煲，
D辣味辣到老公和大魔怪都頂唔順，
佢哋要入房避一避呀!
送走2021，
迎接2022年；
昨日同家人一齊渡過愉快嘅除夕夜，
祝願明天會更好，
疫情快快離開，
大家身體健康!
