沙參玉竹蓮子茨實百合湯

今日又煲老火湯~沙參玉竹蓮子茨實百合湯，

配埋雞腳、豬腱、圓肉、瑤柱和蜜棗，

所有材料都可以食埋，

一D都唔會嘥呀!

鹽焗雞

今餐有鹽焗雞食，

用咗四季鹽焗雞粉嚟醃雞，

隻雞係噚日醃定，

大大話話醃咗有1日半，

都幾入味架!

點埋自製薑蔥蓉，

開飯囉!

惹味胡椒蝦

 

今朝早襯仲係微微雨時，

我就已經落街買餸，

點知買買下餸，

天文台轉咗黑色暴雨，

太大雨唯有食埋早餐先返屋企啦!

但食完早餐後一樣咁大雨，

我返屋企只係過氣馬路就到有瓦遮頭嘅地方，

但我都成身濕哂呀!

買咗1.5磅急凍蝦，

整咗呢碟惹味胡椒蝦呀!

雪梨乾山楂甜菊葉水

 

好耐冇煲雪梨乾山楂甜菊葉水，

今朝去咗藥房買齊材料煲嚟飲呀!

呢個雪梨乾山楂甜菊葉水冷熱飲都得可以架!

不過我就鐘意凍飲喇!

雪梨乾有清熱潤肺、止咳化痰等功效，

比新鮮雪梨潤而不寒；

山楂有活血散瘀、降血糖和消脂等功效；

甜菊葉就有降底血糖、消除疲勞、減肥養顏等功效。

提提大家，

呢個雪梨乾山楂甜菊葉水，

如有胃酸過多或孕婦(山楂有增強子宮收縮功效)，

都不宜飲用架!

柱候蘿蔔牛筋腩牛肚

今日我突然間好想食牛肚，

所以買齊材料，

煮咗一大鍋柱候蘿蔔牛筋腩牛肚，

呢度可以食兩餐，

隔日食會更腍更入味呀!

猴頭菇雪耳百合潤肺湯

今日摷咗個湯包出嚟，

美味棧~猴頭菇雪耳百合潤肺湯，

我加埋紅蘿蔔、粟米、排骨和瑤柱，

我見屋企仲有1個猴頭菇，

放埋落去一齊煲呀！

煲佢2個鐘就有得飲啦!

提提大家，

雪耳唔使咁早落架!

煲到最後15分鐘先好落呀!

香煎三文魚扒

老公話想食魚，

今朝就買咗2片急凍三文魚扒返屋企，

解凍後用廚紙索乾水份，

加鹽和胡椒粉醃一陣，

落鑊煎香就食得，

加少少蒸魚豉油點嚟食，

啖啖肉，

真係好正架!

沙爹排骨炆薯仔

雪櫃D凍肉清得七七八八，

剩番呢條豬仔骨，

都唔知點整，

求求其其攞2隻薯仔炆咗佢，

洋蔥都唔記得落，

落咗應該會更惹味呀!

日式芝麻醬雞絲拌青瓜海蜇

噚日父親節晚餐，

我整咗呢碟日式芝麻醬雞絲拌青瓜海蜇，

小魔怪好喜歡食，

食剩嘅雞絲仲攞埋返公司做今日午餐添呀!

見佢咁鐘意食，

搵日再整多次俾佢食啦!

父親節快樂

今日父親節，

祝天下父親~父親節快樂呀!

今年朱家留家過節，

簡簡單單煮咗餐皆大歡喜嘅晚餐，

有素有肉又有冷盆，

加埋大小魔怪至愛嘅忌廉蘑菇湯，

開飯啦喂!

鮑汁豬手&雞翼

呢幾日整親隻腳，

我都冇落街買過餸；

今日見隻腳好番好多，

所以試下慢慢行去附近凍肉舖，

買咗3磅急凍豬手粒，

整咗一大鍋鮑汁豬手嚟補下隻腳喇!

小魔怪話豬手冇咩肉食，

拿拿臨加幾隻雞翼落去一齊炆，

咁就大家都有得食啦!

歐式天然酵母麵包製作精選實習初班~第三、四堂

第三堂學搓雜莓玫瑰蜂蜜包&土耳其蜂蜜包，

亞sir加咗條腸仔俾我哋整土耳其蜂蜜包，

好正架!

黑椒豬扒

話說呢幾日朝早晨運時，

我嘅右腳腳面已經扯扯哋痛，

但唔算太嚴重；

點知噚晚上完堂返屋企時，

腳痛到爭D行唔到，

拖下拖下慢慢行終於返到屋企；

今朝起身腳都係痛，

拿拿臨去睇中醫骨科，

醫生話我可以行得多企得多，

最重要係超重，

影響到骨與骨之間組織發炎，

經過按摩、電療和貼上膏藥，

希望會快D好番啦!

今晚晚餐簡單煮咗黑椒豬扒，

豬扒係759亞信屋買的，

$100有4包，

豬扒薄薄哋唔使點拍鬆，

又食幾好食喎!

豉油皇煎蝦

哈哈哈，

噚晚有蝦食，

老公問點解咁好餸，

咁即係話我平時hea煮啦!

但其實係我見D急凍蝦平平哋，

咪買嚟食囉!

萬水千山*糭*是情

今日端午節，

簡單烚咗幾隻自家製咸肉糭和紅豆花生素糭，

加埋街買嘅鹼水豆沙糭、玉子燒和灼多碟油菜做午餐，

祝大家端午節快樂!

咸蛋白兩食

包糭時剩咗好多咸蛋白，

除咗用嚟滾湯外，

亦可以預先蒸熟咸蛋白，

將咸蛋白切件後放入食物盒，

儲架係雪櫃冰箱，

咁就可以隨時攞出嚟用啦!

今次我就用嚟煮勝瓜喇!

其實有好多煮法架，

咸蛋白可以用嚟蒸三色蛋、蒸豬肉、煮波菜、煮莧菜，

我仲見有人用咸蛋白炒飯添呀!

揚州炒飯

食剩咗D自製叉燒，

留番嚟炒飯就最啱喇!

加埋蝦仁一齊炒，

一大鍋揚州炒飯出爐喇!

今次用咗一杯半米煮成飯後即炒(冇用冷飯)，

我和老公竟然全部食得哂，

哈哈，

我哋正飯桶嚟架!

沙田新城市廣場~潮庭

今日我專登出沙田，

約咗母親大人飲茶，

順便攞咗10隻糭俾家人食呀!

母親大人話今年我包嘅糭而又靚和又香喎!

啱啱7點幾接到母親大人電話，

佢話D糭好好食，

又糯又軟，

啱哂佢口味呀!

2021愛心糭

今日又係一年一度包糭嘅大日子；

今年包咗48隻咸肉糭、6隻紅豆花生素糭，

忙咗成日，

任務完成，

明年請早!

氣炸蜜汁叉燒

好似好耐冇用過個空氣炸鍋喇!

今日就攞佢出嚟，

整番碟氣炸蜜汁叉燒嘆下得。

豉椒排骨

老公和我都鐘意食熟洋蔥，

所以每次煮呢碟豉椒排骨時，

我都會煮到D洋蔥熟少少，

老公話好食到要添飯呀!

冬瓜生熟薏米栗米甘筍排骨湯

 

我呢排超級懶，

已經好耐冇煲過湯喇!

噚日星期日，

我終於煲咗冬瓜生熟薏米栗米甘筍排骨湯，

早一日買定排骨醃咸佢，

煲湯後排骨特別好食，

我哋將所有湯渣都食哂呀!

又嚟喇!

6月1日晚8點左右上天貓落單，

6月3日中午到咗4箱貨，

6月4&5日就分別送上1條10卷廁紙，

好彩屋企長期有人，

唔係就麻煩少少喇!

不過訂咗個廁所刷就爛咗，

拿拿臨影相去淘寶退貨，

幾分鐘唔使就退番錢俾我，

好快喎!

今次訂咗粟米熱狗腸，

係我至愛呀!

歐式天然酵母麵包製作精選實習初班~第二堂

 

第二堂學搓金沙脆皮朱古力包&竹炭朱古力合桃香橙包。

金銀蒜粉絲蒸帆立貝

金銀蒜粉絲蒸帆立貝，

今次就用蠔油、老抽和水嚟煮粉絲，

等粉絲索哂D汁後，

先舖上帆立貝一齊蒸，

咁蒸出嚟嘅粉絲一D都唔乾身，

好軟仲好入味添架!

青瓜雲耳粟米芯炒肉片

今日食得清淡D，

炒咗碟青瓜雲耳粟米芯炒肉片做晚餐，

粟米芯係用罐頭的，

亦可以買新鮮的啊!

瑞士汁滷豬手

咁多種現成滷水汁料嚟講，

我都幾鐘意瑞士汁，

因為瑞士汁偏甜，

啱哂我口味呀!

今日就用瑞士汁嚟滷咗4磅豬手，

咁我就可以慢慢嘆啦喂!

今次買急凍豬手粒，

食落都唔差喎，

豬皮一樣QQ彈，

一口氣食咗3件豬手，

我已經充滿骨膠原喇!

豉油雞翼

今晚我要返學，

所以要整定晚餐俾老公食，

煮咗4隻雞全翼，

等老公自己慢慢嘆呀!