柱候蘿蔔牛筋腩牛肚

今日我突然間好想食牛肚，

所以買齊材料，

煮咗一大鍋柱候蘿蔔牛筋腩牛肚，

呢度可以食兩餐，

隔日食會更腍更入味呀!

材料: 急凍牛肋條1.5磅、急凍牛肚1磅、急凍熟牛筋1磅、蘿蔔1條、

薑6大片、八角2粒、紹酒2湯匙、熱水5碗、冰糖適量、辣豆瓣醬1湯匙 

調味: 柱候醬1.5湯匙、豉油1湯匙、蠔油1湯匙、老抽適量

做法:凍水落鑊加牛肋條、牛肚、薑3大片和紹酒1湯匙，

煮滾出水10分鐘，取出沖洗後，牛肋條切大粒；牛肚切條；

熟牛筋切件；蘿蔔去皮切件(批深少少，蘿蔔會冇渣)；

凍鍋落油，落薑3片和辣豆瓣醬1湯匙炒出紅油，

加入牛肋條和牛肚炒勻後，沿鑊邊贊紹酒1湯匙，

加調味、八角、冰糖和熱水5碗煮滾，

轉小火慢慢炆1.5小時後熄火，唔好開蓋焗2小時；

再開中小火煮滾牛腩，加入蘿蔔和熟牛筋炆多1小時後熄火；

食前開火煮滾蘿蔔牛筋腩炆多15分鐘至收汁，按個人口味落鹽調味便成。

~呢個柱候蘿蔔牛筋腩金錢肚，隔日食仲入味，牛肚會再腍身D呀!

~炆牛腩時如發現冇哂汁嘅話，可以加入適量熱水繼續煮呀!

~將牛腩牛肚放入雪櫃雪一雪，D油自然成糕狀，咁就易於"畢"出嚟呀!

 

  

大家可以入嚟Facebook讚下我新開嘅Fans專頁呀! 

  

雀后(添飯)Facebook Fan Page