沙爹薯仔炆排骨

老公投訴話雪櫃太多醬料，

所以又係時候下D醬醬喇!

今次就用咗沙爹醬嚟炆薯仔排骨；

買咗$60飛排，

炆到薯仔和排骨都好腍呀!

連埋D沙爹汁，

撈飯一流呀!

豉椒雞翼

雪櫃仲有幾隻雞翼，

食埋就要再去入貨啦!

簡單煮咗碟豉椒雞翼，

今次煮到比較乾身，

下次都係要煮多D豉汁用嚟撈飯先得。

飲茶、食壽司

今日中午去咗屯門青松觀附薦後，

我哋9個大人1個小朋友，

分咗3枱去飲茶；

晚餐唔想煮，

簡單買咗3盒壽司返屋企食算喇!

嘻嘻，

我都覺得自己好鬼懶呀!

黃豆醬支竹炆排骨

其實我都幾鐘意食支竹，

所以間唔中就會煮嚟食，

我今日就用佢嚟炆排骨，

加埋我至愛嘅黃豆醬，

個汁用撈飯真係冇得頂呀!

瑤柱腿蓉燴旺菜

我都幾鐘意買旺菜、娃娃菜和津白呢個種類嘅菜，

因為佢可以儲存多幾日都冇咩大問題，

用嚟炒肉、煮粉又或白灼都咁好食呀!

今日就整咗碟瑤柱腿蓉燴旺菜，

用呢個瑤柱腿蓉嚟撈飯，

真係一流架!

放肆一下

小魔怪話好想食燒臘檔嘅紅色雞翼，

買得雞翼，

緊係要買埋其他滷味啦!

滷水豬腸、豬耳和豬肚(其實我最鐘意食生腸)；

嘩，

打開盒果下真係流哂口水架，

放肆一下，

啤啤佢先得。🍷🍷🍷

粟米蓉兩食~粟米燴豬扒&粟米火腿蛋花湯

噚晚開咗罐粟米蓉嚟煮餸，

用咗半罐嚟燴豬扒，

今日就用埋其餘果半罐嚟滾個粟米火腿雞蛋湯，

一罐粟米蓉兩食，

好慳家喎!

魚肉蝦丸生菜煲

我見好耐冇整生菜魚肉湯，

拿拿臨去魚檔買魚肉；

其實我都好想買埋墨魚滑架，

可惜魚檔嘅墨魚滑放咗入冰箱，

硬過石頭呀!

冇辦法啦!

唯有返屋企攞包蝦仁出嚟解凍，

自己整D蝦丸加埋落去滾兩滾呀!

咸魚雞粒炒飯

唔知有冇人好似我咁大懵呢???

話說噚晚煮好餸兼裝定湯準備開飯時，

先發覺原來我冇襟飯煲制，

拿拿臨襟著個飯煲制都煮唔切架；

咁啱雪櫃仲有一碗冷飯，

老公唔介意食冷飯，

而我和小魔怪就飲湯食湯渣和食餸飽；

咁噚晚煮咗果煲飯呢???

今日我用咗一半嚟炒飯，

另一半就蒸熱佢嚟食呀!

冬瓜粟米紅蘿蔔生熟薏米排骨雞腳湯

今日靚湯~冬瓜粟米紅蘿蔔生熟薏米排骨雞腳湯，

加埋瑤柱和蜜棗嚟煲

攞個個LC煲嚟煲湯，

但材料好似好多，

多到差D水滿瀉呀!

睇嚟下次再換個大煲煲湯先得囉!

舊同事聚會

好耐冇見D舊同事，

約埋一齊飲飲食食啦喂!

揀咗嚟元朗食雞煲和火鍋，

埋單$1248，

都好抵食呀!

黑椒汁涼瓜牛扒

今日係百佳超市買咗盒醃好嘅黑椒牛扒，

買多個苦瓜~雷公鑿(又名大釘)，

呢個配搭真係絕配嚟架，

係咁二炒埋一碟就食得，

煮餸，

簡直easy job啦!

榨菜蒸豬肉絲

點解平時我咁鐘意食蒸餸呢???

原因好簡單，

因為蒸完餸嘅熱水，

我會加幾滴油(唔落鹽)落去烚菜，

一餐有菜又有肉，

開飯啦喂!

雜糧

呢幾日午餐都係食粉麵，

有時食烏冬，

有時食米線，

咪睇好似好大鍋，

但我和老公都食得哂，

可能係粉麵濕濕哋，

易入口呀!

我都幾鐘意食魚角，

口感彈牙，

好好味道架!

氣炸蜜汁燒排骨

偷懶咗一排，

今朝終於拎起心肝早早落街去晨運，

行完幾個圈後，

熱到出哂汗，

拿拿聲買餸返屋企啦喂!

提早過生日

姐姐7月尾生日，

而我就9月初生日，

所以我哋通常都會揀8月中齊齊慶祝生日架!

在疫情期間，

出街食飯就唔會喇!

唯有自己整又或叫外賣啦!

我整咗咖哩豬皮蘿蔔魚蛋和蝦醬雞翼，

其餘的壽司、刺身、炸雞和小食，

都係姐姐和姐夫一早去買定，

等晚上叫埋pizza就可以開餐啦喂!

姐姐真係好錫大魔怪，

仲煲埋素湯俾佢飲添呀!

五香淮鹽焗雞扒

老公話想食焗雞，

摷下雪櫃仲有2塊雞扒，

拿拿聲解凍先得，

一朝早醃定，

晚上就可以攞去焗啦!

雞皮焗到脆卜卜，

好鬼正呀!

客家咸菜炆豬腩肉

今日又有客家菜食喇喂!

客家咸菜炆豬腩肉，

今次冇用南乳嚟炆，

只係用簡單嘅蠔油、豉油和老抽嚟調味，

配埋咸咸酸酸嘅咸菜，

唔使講今餐又要添飯架啦!

椒鹽豬扒

今日又係759亞信屋買咗4包$100嘅無添加激素嘅梅頭豬扒，

即刻攞包出嚟整咗呢碟椒鹽豬扒!

食落啖啖肉，

咸咸香香，

真係好鬼惹味架!

青瓜粟米炒雞粒

青瓜粟米炒雞粒，

豐富營養有瓜又有肉，

用嚟撈飯食就最啱啦!

今次加咗少少豆瓣醬落去一齊炒，

都幾惹味架!

漸變

由於我的白髮太多，

所以每隔3~4個月左右，

我就會去整一整頭髮架喇!

好耐之前我會要求整單色，

但近排我嘅髮型師話要我改變下喎，

頭髮顏色亦變得好多色彩!

初初睇都唔係咁順眼架!

但唔知係咪自己變咗呢，

開始可以接受到唔同顏色喎!

我做嘅係顏色焗油，

唔係咁傷頭髮架!

其實我都好想電髮，

但我嘅髮型師唔係咁建議我電髮，

因為我頭髮太過濃密，

電髮會好似師奶咁喎!

但我真係一個師奶嘛!

所以卷一卷D頭髮，

靚半日咁多啦!

鮑汁花生鳳爪

一碟鮑汁花生鳳爪，

如果係酒樓叫嚟食嘅話，

一碟5~6隻鳳爪加幾粒花生，

平則30零蚊，

貴則4~50蚊一碟都有呀!

今日我就買咗2.5磅鳳爪(廿蚊都唔使)，

加多5蚊花生，

炆咗一大鍋鮑汁花生鳳爪，

自己整成本平好多架!

香煎粟米墨魚餅

今日買咗$30墨魚膠，

整咗碟香煎粟米墨魚餅；

原來$30墨魚膠得好少咋，

煎完只得8塊，

好彩今晚小魔怪唔係度食飯咋!

唔係就肯定唔夠食喇!

芫茜魚片皮蛋湯

天氣咁熱唔煲老火湯喇!

簡單滾個芫茜魚片皮蛋湯，

飲碗下火靚湯都唔錯架!

香煎蓮藕餅

今日中午睇奧運乒乓球女子團體銅牌賽，

好刺激呀!

我和老公連飯都唔敢食住，

終於攞到銅牌，

開心到傻咗呀!

今餐有蓮藕餅食，

我至愛佢爽爽脆脆，

好送飯呀!

芋頭蒸排骨

今日去買餸，

見到有真空包裝嘅半邊芋頭賣，

買番屋企嚟蒸排骨先得。

我和小魔怪都鐘意食粉粉糯糯嘅芋頭，

入口即溶好鬼正架!

家常便飯

 

今日午餐食烚粟米，

晚餐就食梅菜蒸豬肉餅和炒椰菜，

越煮越簡單，

哈哈，

係咪好頹廢呢???

黃豆醬支竹豆卜炆五花腩肉

呢排我掛住睇奧運比賽，

所以連煮餸越簡單越好呀!

今日就炆咗一大鍋黃豆醬支竹豆卜炆五花腩肉，

夠哂食兩餐呀!

麻辣香鍋

上次出街食麻辣香鍋，

雖然又咸又油又辣，

但我哋都食得好滋味呀!

今日我就自己整番個，

少油少咸和少辣版嘅麻辣香鍋，

今次主要落咗雞、蝦、蓮藕和薯仔，

已經食到小魔怪Lam Lam脷呀!

佢仲講定下次食麻辣香鍋嘅材料添呀!