食飯盒

得兩個人食飯，

我真係懶得去煮呀!

買個雙餸飯$43，

燒味雙拼$34，

好味又方便，

真係啱哂我呢個懶人呀!

姨甥生日會

噚日，

我哋入咗沙田姐姐家，

齊齊預早慶祝姨甥生日，

今日姐姐叫咗泰式到會，

和自製三文魚和火腿拚盆呀!

新髮色

我病咗咁耐，

終於變回一線花旦啦!

今次病打亂哂我呢幾日嘅日程呀!

原本星期一要去整頭髮，

推遲到今日先嚟整，

坐咗4個半鐘頭，

髮色變咗，

人都精神咗呀!

薯絲炒肉碎

小魔怪至愛食薯仔，

今餐就專登炒咗3個薯仔俾佢食呀!

薯絲切到手軟，

下次要改用刨先得。

梅菜蒸豬肉

 

今晚蒸咗碟梅菜豬肉和灼菜芯做晚餐，

老公話簡簡單單咪好囉!

佢鐘意食呀!

羊肚菌雜菌湯

噚日襯自己精神少少，

拿拿臨煲啖湯俾家人飲，

今次煲呢包羊肚菌雜菌湯，

加埋唐排、紅蘿蔔和粟米落去一齊煲，

煲咗一個半鐘，

我飲咗啖熱湯，

成個人都舒服哂呀!

呢個湯包係美團優選買的。

又輪到我了

星期五我開始流鼻水，

當日已經即刻check咗冇事；

但係星期六，

食完早餐後就發覺自己開始暈陀陀，

拿拿臨即刻再check多次，

中中中又中；

初初微燒，

中午後就開始燒得有D高，

足足燒咗一日一夜，

兼有少少喉嚨痛；

星期日晚已經冇燒，

我開始食蓮花清瘟，

出咗一身冷汗後，

成個人開始有番精神，

但退燒後就開始咳呀!

中秋過後返惠州

噚日襯中秋節補假，

我和老公返咗惠州屋企，

中午返到屋苑樓下茶餐廳食午飯，

食飽飽就會合姑奶和朋友，

一齊返屋企喇!

中秋節快樂

噚日我哋成個黃氏家族，

齊齊去咗妹妹家做節，

晚餐超級豐富，

擺滿兩張枱呀!

家常便飯

明天中秋節，

我哋一家會去妹妹家同母親大人和姐姐佢哋一齊過節，

之後我就和老公返惠州住幾日，

所以今日晚餐，

我要將雪櫃裡嘅食物，

盡量處理哂佢呀!

麵豉蒸排骨、午餐肉炒蛋和蠔油生菜菜芯。

韭菜雞蛋豬肉餃

今次包呢個韭菜雞蛋豬肉餃，

同平時有少少唔同，

就係我加咗蝦皮落D肉餡度，

食落肉餡好鮮味，

真係好正架!

今日我和大魔怪女朋友仔，

總共包咗66隻餸子，

用咗一半餃子嚟煮越車河粉，

剩番一半放入冰箱。

提早食中秋節飯

今日我哋一家4口聯同大仔女朋友仔，

提早食中秋節飯；

今餐都係我煮，

白切雞、蜜汁煎金蠔、

黃金蝦、瑤柱炆節瓜，

仲有煲咗日月魚螺頭豬腱湯，

配埋淮山、白蓮子、白合、芡實、龍眼肉、杞子和蜜棗，

啖湯超越濃郁，

鹽都唔使落呀!

呢個湯有滋陰補腎、明目潤肺、舒緩眼乾眼澀等功效架!

醬香牛筋腩肚炆薯仔

每次炆呢個牛筋腩肚，

我都鐘意落蘿蔔；

但今日改咗落兩個大薯仔去炆，

小魔怪竟然話好好食，

睇嚟以後都係要落薯仔架啦!

試新嘢

話時話，

我係嘉湖住咗廿七年，

真係冇去過三盞燈食嘢，

之前佢同B記車仔麵係同一個老板架!

我見佢冇開幾日後又開番，

問B記亞姐話換咗老板喎!

噚日經過見到人哋食炸魚柳早餐，

甩佢塊魚柳大塊過隻碟，

睇到我流哂口水；

今朝心思思就去試下喇!

$40加+$2凍飲。

家常便飯

今日都係家常便飯系列，

香煎銀雪魚、韭黃蝦仁炒蛋和菜芯炒肉片，

三個餸仲有竹蔗茅根海底椰雪梨湯，

開得飯啦!

油麥菜兩食

油麥菜兩食，

一款豆球鯪魚炒油麥菜，

另一款係蒜蓉腐乳炒油麥菜，

大家鐘意食邊款呢???

韭菜花魷魚絲炒肉碎

韭菜花魷魚絲炒肉碎，

呢個餸好惹味，

因為我加咗辣豆瓣醬一齊炒，

辣辣哋，

好送飯架!

大伯70歲生日宴

噚日，

我哋一家連同大仔女朋友，

5個人出席大伯70歲生日晚宴，

祝大伯生日快樂，

身體健康呀!

今晚訂咗一圍半酒席，

除咗乳豬和燒鵝有大細分別外，

其餘餸菜份量正常兼好大碟，

味道都唔錯架!

昨日8號風球的晚餐

噚晚係我正日生日，

又係8號風球的夜晚，

冇得出街食飯，

唯有自己煮啦!

雜菌炆伊麵、豬耳&豬腸&牛肚拼盆、

燒雞翼&鹽焗雞腳、蒜蓉炒豆苗。

元朗過橋麵檔

今朝我同老公落元朗去銀行辦事，

中午就行咗去過橋麵檔食午餐，

我叫咗個霸王雞菜飯餐加杯凍檸茶，

老公就叫咗個馬拉盞海鮮炒飯配熱阿華田，

呢餐食咗$126。

家常便飯

大魔怪兩日病假話咁快就完咗啦!

明日佢就要返工，

晚上又要開始返夜校讀碩士課程，

好彩1星期返兩日課，

唔會太辛苦呀!

今晚3餸1湯，

蒜蓉蜜糖紅腸、菜芯炒牛肉、榨菜蒸豬肉、粟米肉碎蛋花湯。

病假

今日大魔怪中招在家養病休息，

醫生開咗2日病假俾佢，

佢食咗藥就日瞓夜瞓；

大魔怪今日全日胃口麻麻，

我榨咗杯提子梨汁俾佢飲，

中午食瑤柱皮蛋瘦肉粥，

晚餐佢食咗半碗飯，

但餸就食哂呀!

筍乾炒肉絲

呢D筍乾係上次去福建潮汕旅行時買的，

今日就用佢嚟炒肉絲，

筍乾先浸大半日再出水，

切薄絲嚟炒，

落咗少少辣豆瓣醬和蠔油做調味，

簡單又好味道呀!