自我隔離的第七日

自我隔離的第七日，

按照政府衛生署最新規定，

在家居檢疫人士，

只要接種2劑疫苗後，

可在第六日和第七日進行快速測試呈陰性的話，

就容許離開隔離設施或家居，

咁即係話我明天可以出疫監啦！🎉🎉🎉

自我隔離的第六日

自我隔離的第六日，

有朋友仔問我呢幾日留係屋企悶唔悶???

其實我都算係宅女一名，

平時除咗去買餸外，

我真係好少會出街；

我鐘意上網煲劇、睇網上小說，

習慣了唔覺悶呀!

自我隔離的第五日

自我隔離的第五日，

今日衛生處話，

在家居檢疫人士，

只要接種兩劑疫苗後，

可在第六日和第七日進行快速測試呈陰性嘅話，

就容許提早離開社區隔離設施或家居，

咁即係我可以提早放疫監喇!

不過詳情要等衛生處稍後公布呀!

自我隔離的第四日

自我隔離的第四日，

老公話買餸辛苦，

所以決定隔日先去買一次餸喎!

今日菜價真係唔平，

老公買咗菜芯1斤、蕃茄3個、薯仔兩個和蒜頭4個，

竟然要$63，

好貴呀!@@"

自我隔離的第三日

自我隔離的第三日，

老公約咗朋友踩單車，

所以冇時間去買餸，

唯有摷下雪櫃仲有咩儲備先得。

自我隔離的第二日

自我隔離的第二日，

由於我唔可以離開屋企，

所以落街買餸就交俾老公做喇!

我寫低要買嘅嘢，

老公負責買返嚟，

另外，

佢仲買咗盒快速測試套裝，

等我可以做測試呀!

密切接觸者

話說上星期六入咗博愛照胃鏡，

可惜要等到星期一先安排到；

到咗星期一，

隔離牀婆婆臨出院前做核酸檢測呈陽性，

咁無端端我就變成佢嘅密切接觸者喇!

被圍封係病房一個角落，

唔可以出病房呀!

好彩我哋所有病人入院前要做快速測試和深喉唾液測試，

而住院期間全程都要戴口罩，

就連瞓覺都要戴，

我又打齊三針新冠疫苗，

感染率應該好低，

所以醫生批准我出院，

另約時間去照胃鏡呀!

不過咁，

我出院後都要自我隔離14日，

由醫院回家只可以行路或搭的士，

遲下衛生署會寄檢疫包俾我，

定時做深喉唾液檢測；

近日確診數字日日上升，

希望我哋大家齊齊努力，

打敗呢場世紀疫症呀!

蓮藕粟米排骨湯

 

今日煲呢個蓮藕粟米排骨湯，

有清熱下火、健脾開胃、化痰止咳、預防感冒等功效，

非常適合呢個抗疫時期飲用架！

朋友仔問我D蔬菜貴唔貴，

蓮藕$20、粟米$11、唐排$85，

呢煲湯湯剩買材料都要$116，

好彩我哋會食埋湯渣，

所以計落都唔算貴呀!

XO醬青瓜炒雞絲

自從大陸菜唔係日日落到嚟香港後，

香港D菜價貴到飛起呀!

呢兩日買咗個旺菜$22，

3條青瓜$18，

真係貴到買唔落手呀!

前日攞咗1條青瓜做手撕雞，

今日就用埋其餘兩條青瓜嚟炒雞柳呀!

網購

响呢個新冠肺炎咁嚴重嘅日子，

我哋都係少出街(除咗買餸外)；

係屋企無無聊聊嘅時間特別多，

唯有去淘寶天貓超市，

睇下有冇機會執到平嘢先得。

2月11日早上落單，

2月12日晚上已經送到屋企呀!

沙薑手撕雞配青瓜絲

响佳寶好耐冇見呢隻沙薑手撕雞賣，

但呢幾日又出現番喇!

$49一隻唔算貴，

買咗2隻返屋企慢慢食呀!

花膠雲吞雞

香港依家買咩都好貴，

主婦想打斧頭都幾難囉!

菜貴肉貴，

反而冰鮮雞感覺平少少喎!

所以買咗隻整雲吞雞呀!

鹵豬軟骨

今日過咗天盛街市買餸，

買咗D冰鮮豬軟骨返嚟，

炆咗鍋鹵豬軟骨嚟食，

晚餐試食咗幾舊，

因為唔係壓力鍋，

軟骨唔算太腍，

明天食應該會仲入味呀!

廿九週年

今日係我和老公結婚廿九週年喇!

疫情下冇得出街慶祝，

唯有自己煮飯食啦!

麻辣鍋

小魔怪WFH特別想食好嘢呀!

今晚我就整咗個麻辣鍋做晚餐。

材料都幾豐富架!

有蝦、雞髀、蓮藕、薯仔、魚蛋、福花、甘筍和西蘭花外，

食到一半就加咗紅薯粉和公仔麵，

越食越麻辣，

連鼻水都流哂出嚟呀!

支竹腩排旺菜煲

支竹腩排旺菜煲，

有菜有肉有支竹，

用煲仔上菜，

懶得洗碟呀!

韭菜豬肉餃

今日年初七，

祝大家人日快樂呀!

新年期間清咁D雪櫃物資，

終於有空位放我包嘅餃子喇!

依家我都好少買街外餃子食，

食過咁多個牌子嘅餃子，

我都係覺得自己包嘅餃子最好食呀!

日式薯仔紅蘿蔔炆排骨

今日去豬肉檔買咗1斤排骨，

成日用蠔油炆食厭咗喇!

今次就做日式整法，

簡單又好味道呀!

瑞士汁炆豬手

今日買咗4磅急凍豬手粒返屋企，

用咗瑞士汁嚟煮呀!

炆起一大鍋，

可以食兩餐呀!

雜錦鍋

過年係咁食食食，

食咗幾餐大魚大肉，

又年糕又蘿蔔糕，

都係時候要食清少少啦!

今日整咗呢個雜錦鍋，

有菜有肉有丸丸，

仲有粉絲和金菇，

加盒清雞湯煮滾佢哋就食得，

快靚正架!

大年初三

今日大年初三，

赤口日，

小說話，

多做事!

噚日去咗姐姐家團拜，

大人有大人玩，

小朋友有小朋友玩呀!

大年初二

 

今日大年初二，

我一早起身就準備呢餐開年飯，

食過開年飯後，

我哋會去姐姐家拜年呀!

大年初一

今日大年初一，

我雀后祝大家虎年大吉大利，

虎虎生威，

龍精虎猛，

萬事如意，

財源滾滾，

心想事成，

出入平安!

朱家傳統初一全日食素，

連續兩年大年初一冇出外拜年，

留家抗疫，

希望疫情快D結束啦!