今日post舊照呀!
之前係天貓超市買咗盒拉麵說~豚肉叉燒拉麵，
襯又係一個人晚餐嘅時候煮咗嚟食，
食後感:
塊豚肉真係薄得可憐，
如果俾多幾片就更好喇!
豚肉拉麵湯底冇胡椒豬肚雞拉麵湯底咁濃郁，
清淡有清淡的好啊!
腐竹蒸麵豉排骨；
今日買咗唐排嚟做呢碟蒸排骨，
加埋腐竹一齊蒸，
原本腐竹蒸完出嚟係會好滑架!
仲索哂D麵豉汁，
同落豆腐卜嘅效果係一樣架!
平時炒完紅腸，
我好多時都係落少少蒸魚豉油調味，
但今次就試下落咗蒜蓉和蜜糖去炒紅腸，
食落有濃郁蒜味及甜香味，
大鑊，
食慾大增添!
朱家家常菜又出爐啦!
薯仔炆雞翼，
有時唔知食咩餸時，
我就會煮呢味餸架啦!
簡簡單單又好送飯，
唔錯架!
休息咗差不多近2個月後，
星期二晚我又返學學搓麵包喇!
今次學歐式天然酵母麵包，
第一堂~黃金布里歐麵包&法式金枕麵包。
今日我又係佳寶買咗2樽黃豆醬，
$20有2樽，
真係好抵用!
用嚟醃排骨、炆牛腩、煮豆角都好好食架!
依家天氣咁熱，
所以我都要提早少少出外做運動，
做完運動就順便去買餸，
咁我就可以唔使再落多一次街喇!
雖然早咗出門咋，
但條街一樣咁熱，
每次返到屋企我全身都濕透架!
今日香港天氣熱到爆呀!
我哋天水圍區中午最高有成36度，
好彩我一早落街買哂餸咋!
我坐係屋企都覺得熱，
所以唔夠10點半左右，
就開咗冷氣降溫喇!
講番今晚食呢個花菇栗子排骨煲，
我用咗豬仔骨嚟炆，
大大舊排骨，
我食2件都飽哂啦!
今朝一早出咗去染頭髮，
都冇去街市買餸，
返到屋企就摷下雪櫃睇下有咩材料就煮咩囉!
簡簡單單炒咗碟XO醬西蘭花炒蝦仁，
加埋昨晚嘅牛肚，
咁又一餐囉!
雪櫃仲有半支瑞士汁，
拿拿聲用埋佢嚟煮餸啦喂!
响急凍舖買咗牛肚、雞翼、火雞腎，
牛肚和火雞腎預先滷定放入雪櫃雪一晚，
雞翼就唔使咁快落住，
因為雞翼易熟呀!
今日佛誕假期，
為應節所以我哋今日午餐食素呀!
雜菌炆伊麵、油炸鬼牛脷酥加白粥，
簡簡單單又一餐，
我唔客氣喇!
今日見到有芥菜賣，
2大棵$11又唔貴喎，
不過買咗70幾80蚊唐排就貴少少啦!
加埋蝦乾和瑤柱仔一齊去熬個湯底，
個芥菜湯超級鮮甜呀!
人老了，
依家特別鐘意芥菜嘅苦澀味呀!
成日煮豉汁蒸鳳爪排骨，
食都食到有D厭，
所以今次就用咗黑椒汁嚟炆鳳爪排骨，
味道濃郁，
好送飯喎，
唔錯唔錯!
5月尾先係母親大人正日生日，
不過襯大家都得閒冇事做，
所以預早少少同母親大人一齊慶祝呀!
今次訂咗海港飲食集團嘅~歡樂賀壽彌月百日宴套餐!
我哋每開一盆菜都嘩聲四起，
超有驚喜，
份量超足又有睇頭，
我哋13人食都唔哂呀!
呢個圍餐有生果，
妹妹改要棗蓉糕(唔使加錢)，
仲包橙汁、啤酒和汽水，
$4380，
超值啦!
生日蛋糕係四個孫仔孫女夾錢買的，
大小魔怪另外每人俾咗$500婆婆買嘢食，
婆婆笑到見牙唔見眼呀!
老公終於好番哂啦!
所以今日我就整咗佢至愛嘅~咸魚豬肉煎餅。
佢讚好好食，
仲添咗2碗飯呀!
老公肚仔唔舒服，
所以連續兩日午餐都係食粉麵，
清清哋，
啱哂佢呀!
呢兩日老公個肚唔舒服，
簡單煮咗鍋蠔油豆腐燴肉碎，
濕濕哋用嚟撈飯易入口，
都唔錯架!
今日煮煲仔菜~冬菇支竹炆豬腩肉，
用咗BB娃娃菜舖底，
咁就一個餸有齊肉、菜、冬菇和支竹，
慳水慳力，
碟都洗少隻呀!
一個人的晚餐~蔥花雞蛋煎餃，
配埋昨晚食剩嘅麻辣手撕雞；
之前天貓淘咗呢兩樽黑白芝麻真係好好用，
大大樽有排用呀!
今日係母親節!
肺炎疫情下我哋冇出街食飯，
靜靜哋一家四口子叫外賣呀!
大小魔怪兩個人請我食四川菜，
而我就簡單煮咗2款涼拌菜，
仲焗多個現成Pizza，
飯後仲有綠豆海帶糖水添!
包咸蛋黃魚皮係小魔怪額外買俾我食架!
今晚食沙爹金菇肥牛粉絲煲，
用咗李X記沙嗲醬；
有冇人好似我咁，
肥牛會先灼一灼先(幾秒好喇)，
再落調味醃下佢，
咁樣做肥牛雪味和膻會冇咗架!
仲入味咗添!
麵豉蒸排骨，
真係每一個家庭主婦都識煮嘅家常餸菜之一；
今次加埋豆腐卜落去一齊蒸，
豆腐卜索哂D麵豉汁，
真係好送飯架!
5月份開始休魚期，
新鮮海魚買少見少了。
今日買咗一塊牙帶魚$4兩，
呢度$36又唔算太貴喎!
每次炒親飯，
我都鐘意加3隻蛋落去一齊炒，
因為我覺得多D蛋，
咁個飯先至有蛋香架!
今餐加埋蝦皮落去炒飯，
一個字~香!
記得預先要爆香D蝦皮，
每啖飯都有脆卜卜嘅蝦皮，
好好味道架!
木瓜豆腐魚尾湯；
木瓜係老公嘅單車友人自家種有機木瓜，
老公攞個木瓜返嚟時青BB，
擺咗成個星期先開始熟少少咋!
配埋豆腐和鯇魚尾一齊煲，
兩個字可以形容~鮮甜!
呢煲湯湯渣全部食哂，
一D都唔嘥呀!
今日整呢碟蜜味糖醋骨，
甜甜酸酸真係好送飯架，
一口氣食咗3條，
食到唔停得口呀!
其實每次上親天貓超市訂貨，
每次都會絞盡腦汁架。
點解???
因為次次訂貨要好精準地計算出所訂貨品，
扣哂所有優惠後滿249人民幣，
但又唔可以超過10kg，
咁就唔使收運費架啦!
可以算到咁準確，
對我嚟講係冇可能嘅事架!
(今次over 1kg大約收8人民幣。)
今次淘咗幾隻碟落嚟，
當時真係有D怕會打爛呀!
但天貓超市包到實一實，
抵讚呀!
最重要淘咗2包新彊提子乾俾老公，
咁要佢俾錢找數就話咁易啦!
嘻嘻!
好耐冇整茶葉蛋喇!
噚日我買咗30隻蛋返嚟，
唔使講咁多，
即刻開工整茶葉蛋啦喂!
噚日整今日食，
得咗!
今朝煲滾D茶葉蛋，
大小魔怪即刻食咗5隻，
剩番果5隻，
應該好快會食哂呀!
