花菇栗子排骨煲

今日香港天氣熱到爆呀!

我哋天水圍區中午最高有成36度，

好彩我一早落街買哂餸咋!

我坐係屋企都覺得熱，

所以唔夠10點半左右，

就開咗冷氣降溫喇!

講番今晚食呢個花菇栗子排骨煲，

我用咗豬仔骨嚟炆，

大大舊排骨，

我食2件都飽哂啦!

材料: 豬仔骨2磅、栗子半斤、大花菇5隻、紹酒少許、薑4片、蔥粒

醃料: 豉油1湯匙、鹽半茶匙、糖1茶匙、生粉1茶匙、麻油少許

調味: 蠔油1湯匙、老抽1湯匙、豉油1湯匙、冰糖粒適量

做法: 豬仔骨解凍後切件，用廚紙索乾水份後，落醃料醃排骨1小時；

花菇浸軟去蒂切片；栗子去衣備用；

燒熱鍋落油落豬仔骨略煎四面後盛起；

燒熱鍋落油加花菇片和薑片先爆香後贊紹酒少許，

加入豬仔骨、栗子、調味和水2碗煮滾後，

轉小火慢慢炆煮30分鐘，埋個生粉水芡汁後，最後灑上蔥粒便成。 

 

大家可以入嚟Facebook讚下我新開嘅Fans專頁呀! 

雀后(添飯)Facebook Fan Page