客家南乳蓮藕炆腩肉

迎月夜得我哋兩公婆撐枱腳，

簡單炆咗鍋客家南乳蓮藕炆腩肉，

灼多碟油鹽水菜芯，

咁又一餐囉!

明天有咩節目???

姨甥仔亞諾生日，

我哋會去姐姐家開生日會兼慶祝中秋節呀!

麵包製作精選實習高班~第四堂

 

第四堂學整裸麥包和英式鬆餅。

亞sir加咗豬柳扒俾我哋夾英式鬆餅，

返到屋企一陣已經食哂，

冇得留隔夜了。

奶油雲腿津白

買咗舊雲腿，

緊係要用嚟整奶油津白啦!

今次我用咗肥肥的大白菜嚟煮呢個餸，

唔用大白菜，

可以改用長津白、娃娃菜或旺菜煮都得架!

講咁多，

其實全部菜都係同一品種嚟架!

鮮淮山粟米紅蘿蔔栗子排骨湯

 

今朝偷懶冇去做運動，

哈哈，

咁就行遠少少村隔離村買餸啦!

雖然行去隔離村唔係好遠，

但一來一回都用咗成個鐘頭嚟買餸架!

今日買咗唔少肉和菜，

仲買埋材料嚟煲湯，

見到D橙又大又靚，

又唔抵得買咗幾個，

每樣少少都拎到死死下呀!

咖哩雞

 

其實之前好鐘意用利川咖哩醬嚟煮餸的，

但自從各大超市和街市雜貨舖，

都唔見有呢個牌子咖哩醬賣後，

我唯有改用其他品牌嘅咖哩醬啦!

好彩係教我整麵包嘅Miss幫我係牛頭角搵到呢款咖哩醬，

仲幫我買咗2樽添!

呢款咖哩醬香而帶有微辣(個人口味)，

煮起咖哩特別香濃架!

就連唔食得辣嘅老公都話好味道呀!

呢個餸真係可以添多幾碗飯架!

馬蹄蒸豬肉餅

我好鐘意食馬蹄蒸豬肉餅，

鐘意馬蹄爽爽脆脆，

加埋豬肉餅嘅軟軟腍腍，

送飯一流架!

雖然今次唔係自己親手剁肉餅，

但買咗舊新鮮梅頭豬肉攪成肉碎，

食落有豬肉嘅鮮甜味，

冇雪藏味架!

飲茶~恆香海鮮酒家(元朗)

 自香港新冠肺炎疫情第三波出現後，

我和老公真係好少出門，

除買餸外就係去做運動，

留家抗疫。

近日疫情有明顯改善，

都係大家努力保持社交距離嘅成果，

有病徵就去睇醫生，

早發現、早隔離、早醫治，

希望大家繼續努力抗疫，

病毒快D遠離，

我哋就可以過番正常生活了。

麵包製作精選實習高班~第三堂

 第三堂學整香草薯仔包和藍莓鬆餅(美式muffin)。

原本香草薯仔包係冇餡的，

亞sir太知我哋心意喇，

加咗火腿和芝士俾我哋，

正到冇朋友呀!

淘淘淘

星期日晚7點幾去天貓超市落單，

今日中午12點半左右到屋企，

哈，

真係好方便啊!

今次係人生第一次自己一手一腳去天貓超市訂貨兼俾錢，

意義好重大架，

雖然我係淘寶新手，

(之前淘嘅嘢全部都係朋友幫手的)

有好多嘢都唔係好識，

但我知熟能生巧，

淘多幾次就熟架啦!

哈，

唔知老公會唔會開始驚驚哋呢???

花膠雲吞雞

 今日係我舊曆生日，

煮咗鍋花膠雲吞雞，

生日嘅朋友有雞髀食，

仲有大大塊花膠，

正啦喂!

啤酒骨

見屋企有幾罐啤酒，

擺咗好耐都冇飲到，

咁不如用嚟煮餸啦!

啤酒骨，

配菜就加咗蓮藕片和金菇，

仲有幾隻勁辣嘅辣椒乾，

嘩，

好鬼惹味呀!

XO醬雙花菜炒雞柳

 

之前係佳寶買咗呢樽XO醬，

煮餸時加D落去吊味都唔錯架!

今日就用佢嚟炒咗呢碟XO醬雙花菜炒雞柳，

好惹味啊!

氣炸孜然雞膇

買咗pack雞膇返嚟，

拿拿臨溶雪嚟整孜然雞膇，

今次整咗4隻，

老公和我每人食2隻呀!

油豆腐粉絲鮮肉丸紹菜煲

原本呢鍋油豆腐粉絲煲係可以用豬肉碎嚟煮的，

但自己傻下傻下買咗舊梅頭豬肉返嚟，

就係咁，

今餐要自己剁咗舊豬肉呀!

希望剁豬肉聲(我放砧板地下剁架)，

唔好嘈親樓下嘅住客啦!

但話時話，

自己剁豬肉整豬肉丸，

食落又真係彈牙好多，

好味道呀!

雜菌燴雞柳

雜菌燴雞柳，

一個超級易煮嘅家庭餸；

買咗10蚊雜菌(小雞髀菇、柳松菇、白菇)配埋雞扒1塊，

灼多碟菜，

晚餐又攪掂，

哈哈，

我係咪好慳家呢???

麵包製作精選實習高班~第二堂

 第二堂學整綠茶方包、玉桂果子包和牛油排包；

綠茶方包加咗亞sir自製紅豆蓉做餡，

而玉桂果子包就加咗冧酒提子乾和果皮，

兩款味道都好夾啊!

黑椒茄子洋蔥燴豬扒(健康版)

今日煮咗呢碟健康版黑椒茄子洋蔥燴豬扒；

茄子唔落油炸改用先蒸後煮，

豬扒就用半煎焗方法，

食落茄子和豬扒都冇咁油膩；

人老咗，

就要開始食得健康呀!

鹽焗手撕雞(配青瓜絲)

 噚日買嘅另一隻雞，

我用咗鹽焗雞粉嚟醃，

今日攞出嚟蒸熟拆絲，

加埋青瓜絲撈勻佢嚟食，

清清爽爽，

啖啖肉，

好鬼正架!

豉油雞

今朝早心血來潮入咗樓下間百佳超市，

睇下有冇筍嘢買，

點知俾我發現所有冰鮮雞(唔理有冇牌子)都係$23隻，

咁抵又點可以唔買呢!

於是揀咗2隻稻花雞返屋企囉!

拿拿臨將其中一隻整咗呢碟豉油雞喇!

南乳蓮藕木耳豆腐卜炆排骨

呢排街市買嘅蓮藕好瘦弱，

唔粉又唔起絲，

用嚟炒就最啱喇!

但我已經買咗豆腐卜和排骨，

所以都係用嚟炆算囉!

靜靜話俾大家知，

豆腐卜係呢個餸嘅主要食材，

靈魂首選呀!

因為佢索哂D南乳汁，

食落好juice，

超正呀!

香煎蔥油雞

 呢幾餐食埋雪櫃果D凍肉後，

又係時候要去入貨喇!

但雪櫃個冰箱唔大，

所以唔可以盡情入貨囉!

今餐就用雞扒嚟整呢碟香煎蔥油雞，

煎到D雞皮脆卜卜，

加埋蔥薑蒜油嘅香味，

真係絕配呀!

稻香外賣~波士頓龍蝦伊麵&炆元蹄

偷懶咗幾日，

今日終於拎起心肝~做運動；

行到攰唔想煮晚餐，

走咗去天瑞稻香買外賣，

波士頓龍蝦伊麵$78，

炆元蹄$48，

另加$1.5外賣包裝費，

灼碟生菜咁又一餐囉!

其餘餸菜睇落都唔錯咁喎!

搵日再偷懶唔煮買外賣先得。

麵包製作精選實習高班~第一堂

呢個麵包高班原本係8月11日開課的，

但又係因疫情關係，

所以改到9月1日先開班呀!

第一日上課超興奮，

因為我可以出外行下，

唔使留係屋企悶呀!

呢堂學搓英式方包、法式蒜蓉軟包和肉鬆包。

胡椒芥菜黃豆咸排骨煲

生日會上煮咗呢個胡椒芥菜黃豆咸排骨煲，

雖然芥菜有佢獨特嘅苦澀味，

但估唔到家人們都好鐘意食呀!

今次買咗1斤幾(2大條)新鮮唐排嚟餚呢個湯底，

啖湯鮮甜好飲，

芹菜煲到淋哂，

啱哂冇咩牙嘅母親大人食呀!

50而已

今年真係好難得係我正日生日，

母親大人、姐姐和妹妹一家人，

齊齊入嚟天水圍慶祝我嘅生日。

原本想去酒樓大吃一餐，

可惜限聚令及禁晚市堂食令下，

唯有留家自家煮啦!

不過老公下命令唔想我煮得咁辛苦，

所以今年我只係簡單煮咗幾樣菜，

其餘的都係外賣呀!

魚香茄子(健康版)

今日整咗碟健康版嘅魚香茄子，

就係冇將茄子走油喇!(懶)

雖然煮出嚟茄子顏色唔靚，

但好味道就得啦!

客家菜~客家釀豆腐卜

客家釀豆腐卜嘅精髓，

就係個豬肉餡除咗要加乾蔥和咸魚外，

仲有唔少得嘅就係胡椒粉啦!

呢個客家釀豆腐卜煲，

咸咸香香超級惹味，

送飯一流呀!

西洋菜咸鴨腎粟米紅蘿蔔豬腱湯

今日早早落街買餸，

見菜檔有西洋菜賣不過要成16蚊斤，

買咗1.5斤返屋企，

襯朝早冇咁熱就拿拿臨煲定湯；

今日下午天氣真係好熱，

我果邊(天水圍)有成差不多36度，

熱死我咩!!!