油豆腐粉絲鮮肉丸紹菜煲

原本呢鍋油豆腐粉絲煲係可以用豬肉碎嚟煮的，

但自己傻下傻下買咗舊梅頭豬肉返嚟，

就係咁，

今餐要自己剁咗舊豬肉呀!

希望剁豬肉聲(我放砧板地下剁架)，

唔好嘈親樓下嘅住客啦!

但話時話，

自己剁豬肉整豬肉丸，

食落又真係彈牙好多，

好味道呀!

材料: 豆腐卜10個、梅頭豬肉$30、粉絲適量、紹菜1個、蝦乾廿隻、

雞湯1公升、薑3片、蔥粒、胡椒粉適量

醃料: 豉油2茶匙、鹽少許、糖1茶匙、生粉1茶匙、麻油少許、水2湯匙

做法: 豆腐卜放入熱水鍋內出水30秒後撈起，揸乾水份切半；蝦乾浸軟；

梅頭豬肉剁碎後，落醃料醃30分鐘；粉絲用熱水灼熟撈起備用；紹菜切段；

將1公升雞湯、蝦乾、薑3片和1碗水煮滾後，加入自製小豬肉丸滾5分鐘；

落豆腐卜和紹菜煮多5分鐘後，落粉絲煮至翻滾，灑上蔥粒和胡椒粉便成。

~豆腐卜用熱水燙過先煮，咁就冇咁油膩喇；

~用熱水浸粉絲嘅原因係粉絲已經熟咗，咁煮起嚟就唔會吸哂D湯架啦!

(但煮螞蟻上樹嘅話，就要用凍水浸，因為咁粉絲先可以吸引哂D汁呀!)

~雞湯和醃豬肉時已經放咗調味，所以呢個油豆腐粉絲煲唔使調味都得呀!

 
 

  

大家可以入嚟Facebook讚下我新開嘅Fans專頁呀! 

 

雀后(添飯)Facebook Fan Page