豉油雞

今朝早心血來潮入咗樓下間百佳超市，

睇下有冇筍嘢買，

點知俾我發現所有冰鮮雞(唔理有冇牌子)都係$23隻，

咁抵又點可以唔買呢!

於是揀咗2隻稻花雞返屋企囉!

拿拿臨將其中一隻整咗呢碟豉油雞喇!

材料: 冰鮮雞1隻、薑5片、蔥段

調味: 老抽5湯匙、豉油1湯匙、紹酒1湯匙、冰糖粒2~3粒

做法: 洗淨雞身後瀝乾水份備用；

將調味和2~3碗水放入鍋內煮滾後，加入雞再煮滾豉油汁，

其間需要用大匙不停將豉油汁淋落雞身，當豉油汁翻滾後，加蓋煮8分鐘；

反轉另一面雞身，又不停將豉油汁淋雞身，再翻滾後又加蓋焗8分鐘；

重覆反轉雞身和淋豉油共3次後(即已煮24分鐘)，

熄火唔好開蓋焗多10~15分鐘，取出豉油雞待涼斬件；

食前將豉油汁煮滾，慢慢將豉油汁淋在雞面，

豉油汁要淋多幾次，等雞回暖就可以食架啦!

~由於呢隻冰鮮雞唔係好大隻，所以煮嘅時間唔需要太耐，

如果冰鮮雞大隻嘅話，烹煮時間就要加多少少喇!

~豉油汁味道需要按個人口味調配，我個人口味鐘意豉油汁偏甜，

所以冰糖份量會落多少少呀!

大家可以入嚟Facebook讚下我新開嘅Fans專頁呀!

雀后(添飯)Facebook Fan Page