咖哩雜錦炒米粉

近日小魔怪要清假，

所以噚日開始放假至下星期一先返工，

冇得去旅行又冇得出去玩，

佢唯有係屋企打機啦!

不過佢都會抽時間去跑步架!

中午食炒米粉，

浸咗3塊米粉(天鵝牌米粉)，

點知炒埋係好大碟，

哈哈，

可以夠食2餐呀!

柱候蘿蔔牛筋腩金錢肚

今日炆咗一大鍋柱候蘿蔔牛筋腩金錢肚，

因為呢個餸隔日食會更入味，

配飯配麵都冇問題；

放涼後入盒放冰箱，

咁就隨時想食都得啦!

不過蘿蔔就唔好入盒喇!

因為冰過嘅蘿蔔再煮會淋哂架!

薯仔炆排骨

薯仔炆排骨，

真係朱家家常餸嚟架!

唔炆排骨，

炆雞翼都一樣咁好食呀!

今次買咗唐排嚟炆，

唐排肉味香濃，

用嚟蒸和炆都好食架!

孜然牙籤牛肉

去佳寶見到冰鮮牛肉啱啱落貨，

所以就揀咗盒牛肉嚟整孜然牛肉，

想食得有特式，

用牙籤串起D牛肉，

整得靚靚咁上碟呀!

小魔怪真係好攪笑，

食得心急但又懶用手拎起條牙籤，

叫我下次唔好串起Ｄ牛肉喎；

唉，

亞仔以你咁食法，

一陣間就已經俾係食哂Ｄ牛肉啦！

呢個餸辣辣哋，

最啱用嚟招呼朋友，

一邊飲啤酒，

一邊食牛肉串，

吹吹水，

唔抹咀呀！

Boxing Day晚餐

呢兩日聖誕假期，

我同老公都冇周圍去，

我只係去行晨運和買餸咋!

今日大小魔怪都係屋企，

簡單叫外賣食算喇!

傍晚6點左右想order個pizza做晚餐，

點知間間(pizza XX)都要成8點幾9點先送到嚟，

最後小魔怪上咗deliveroo搵咗呢間~Glasshouse，

叫咗雜菌黑松露芝士薄餅、松露焗豬腩肉飯、

炸薯條配黑松露醬和小食拼盆。

2020平安夜

2020平安夜，

祝大家聖誕平安快樂!!!

新冠肺炎疫情下，

我哋兩老唔打算出街囉!

留係屋企過一個平平安安嘅平安夜!

簡易聖誕大餐:

香草黑椒烤雞髀、吉列蝦、白汁蘑菇意粉配西蘭花

蠔油肉碎燴豆腐

之前淘咗個新煎pan，

襯仲係新嘢冇刮花唔黐底，

用嚟煎豆腐真係好鬼正；

今次整呢碟蠔油肉碎燴豆腐，

老公話好耐冇食，

肉碎好撈飯，

又要添飯囉!

麵包製作精選特別班~第二堂

呢堂係上星期二學的，

今個星期和下星期二都放假，

要到出年1月頭先返學呀!

今堂學搓~牛油綠茶奶酥包和朱古力蛋糕豆沙方形麵包。 

蠔皇鮑魚冬菇炆鴨腳

噚日同家人食咗冬至飯，

今日冬至正日食咩好呢???

去佳寶見到有大鴨腳賣，

於是買咗幾隻返屋企炆冬菇，

再加埋罐cheap cheap鮑魚仔，

真係超正呀!

冬至快樂

2020年，

在新冠肺炎疫情下，

能夠與家人齊齊整整食餐冬至飯，

真係來得不易架!

祝大家身體健康!

歲晚收爐，明年請早

哈哈，

當老公見到D淘寶箱嘅時候話:

"吓，妳又買咗咩嘢呀???"

我同佢講，

今年內唔再淘寶架啦!

不過咁，

我已經儲咗幾件寶貝，

等2021年重新出發。

咸菜胡椒豬肚排骨湯

今日第一次買澳洲冰鮮豬肚，

比起新鮮豬肚，

最污穢嘅洗豬肚程序已經處理好，

買返嚟只係簡單用鹽和生粉清洗一兩次，

冇咩難聞氣味，

而且又唔貴$30個，

都幾抵食架!

買埋排骨頭和汕頭咸菜，

加埋胡椒粒，

煮咗呢煲驅寒首選~咸菜胡椒豬肚排骨湯。

一個人的午餐~雜錦叻沙麵

前排見百佳超市呢包新加坡叻沙拉麵有特價，

好似$18.x有1包，

我問姐姐妹妹呢個價錢抵唔抵買，

佢哋兩個話超抵啦!

平時要成$28.x先有1包架!

想買多幾包都冇，

最後兩包俾我買埋。

提提大家，

餸係自己加的，

唔係包埋架!

冬菇栗子炆排骨

今朝又係得11度，

噚日我已經偷懶冇落街買餸，

今日唔落唔得囉!

我著咗大風褸加埋帽，

包到實一實先出門口，

我冇行去街市，

就咁係附近買咗D冰鮮排骨和栗子，

炆咗煲~冬菇栗子炆排骨。

XO醬粟米粒炒肉碎

今朝起身得11度，

凍到唔想落街買餸，

摷下屋企冇咩存貨，

可以用嚟煮個簡單午餐食先得。

啤酒紅燒肉

噚日買咗舊腩肉諗住炆紅燒肉，

點知小魔怪唔返嚟食飯，

所以冇煮到成條腩肉放咗入冰箱，

等到今日先攞出嚟煮呀!

想問老公攞罐啤酒嚟煮紅燒肉，

喜力貴嘢話唔好啦!

黑啤又話小魔怪鐘意飲，

最後只係俾我用罐燕京啤酒，

佢嘅理由係~平!

香煎素腐皮卷

大魔怪話要食素腐皮卷，

所以今朝一早去街市買齊材料，

洗洗切切炒材料，

又要等個素餡料凍咗先可以包個腐皮卷，

攪下攪下都成兩個鐘呀!

總共包咗16條素腐皮卷，

咁呢兩日大魔怪就有嘢食啦!

娃娃菜粉絲釀豆腐卜煲

 

冬天食煲仔菜就最啱喇!

一嚟煲仔菜熱辣辣上枱，

食完個煲仲暖嘅；

二嚟我又可以洗少隻碟，

哈哈，

真係幾正架!

麵包製作精選特別班~第一堂

4年前(2016)學過呢個課堂，

今年(2020)再次上呢個麵包製作精選特別班呀!

黑麥煙肉大蔥包和健康燕麥樹枝麵包。

雜錦鍋

上星期日，

小魔怪已經話想打邊爐架啦!

但屋企咩材料都冇呀!

襯今日要去入貨，

買定多凍肉和蔬菜，

咁就可以幾日都唔使落街啦!

以我哋食嘢咁心急，

打邊爐真係唔係好啱我哋架(懶就懶啦)!

所以整咗呢個雜錦鍋，

全部煮熟哂，

慳時間之餘，

又可以洗少個碟添架!

材料有肥牛、墨魚丸、牛丸、貢丸、魚角、魚滑、蝦餃、

魚皮餃、娃娃菜、薯粉等等。

芥菜咸排骨蝦乾煲

屋苑附近開咗間果欄先生(賣菜和生果)，

由於貨源充足，

價錢自然平好多啦!

所以開業初期吸引好多人去買嘢，

人和貨爭路(貨物擺哂出街)，

攪到周圍衛生特別差，

我見到咁多人都怕怕呀!

但當熱潮過後，

我見噚日冇咩人排隊(俾錢)，

咪入去行咗一轉囉!

D菜和生果又真係幾平，

我買咗娃娃菜(3個)和翠肉瓜(2條)，

兩款$12，

芥菜(3棵)和油麥菜(3棵)，

兩款$10，

夾埋4種菜都係$22，

所以吸引咗好多師奶(如我)去買嘢囉!

拆禮物

雖然未到聖誕節，

但都可以拆禮物架!

上星期五晚係淘寶天貓超市落order，

今日中午送到貨嚟屋企；

老公見到問佢有冇份，

有架，

包裝紙巾應該啱佢用囉!

仲有之前煲爛咗個細鍋，

今日就買咗個返嚟啦!

拜山

在2人限聚令下，

噚日我哋一行十人分成5組，

去拜祭父親大人；

午餐食麥記，

晚餐就部份叫外賣，

部份自己煮，

每家人準備一、兩個餸，

好快有得食啦!

XO醬青瓜粟米馬蹄炒雞粒

 

之前買咗1大包馬蹄，

噚日攞咗部份嚟馬蹄蒸豬肉，

剩番幾粒就用嚟炒粒粒啦!

呢個餸簡單快靚正，

材料每款少少，

炒埋炒埋就一大碟啦!

燕麥馬蹄蒸豬肉餅

網上有人問點解蒸肉餅會咁"鞋"口???

原因好簡單，

蒸肉餅最理想係用上肉嚟蒸，

肥瘦肉係3:7比例；

不過咁肥嘅肉餅唔係人人啱食，

想用瘦肉蒸肉餅其實都得架，

加2~3湯匙燕麥(麥皮)落去一齊撈勻嚟蒸，

咁碟肉餅就唔會好"鞋"口架啦!

客家蘿蔔蛋角煲

 

客家蛋角蘿蔔煲，

係客家名菜之一；

呢排冇得返惠州食，

唯有自己整嚟食啦!

涼拌麻辣雞腳

呢排香港疫情又再嚴峻，

我屋企個雪櫃冰箱又被塞爆了；

之前買咗2磅雞腳煲湯，

用剩咗10隻雞腳，

為咗令個雪櫃慳少少位嚟再塞多D嘢，

今日拿拿臨攞D雞腳出嚟，

整咗呢盒涼拌雞腳做餐前小食呀!