香煎素腐皮卷

大魔怪話要食素腐皮卷，

所以今朝一早去街市買齊材料，

洗洗切切炒材料，

又要等個素餡料凍咗先可以包個腐皮卷，

攪下攪下都成兩個鐘呀!

總共包咗16條素腐皮卷，

咁呢兩日大魔怪就有嘢食啦!

材料: 椰菜1/2個、雜菌$10、金菇1包、甘筍半條、沙葛1個(小)、

冬菇8隻、木耳2朵、腐皮2塊

調味: 素食蠔油2湯匙、豉油1湯匙、胡椒粉、黑椒碎、鹽少許

做法: 椰菜切絲；甘筍去皮切絲；木耳浸軟切絲；

沙葛去皮切幼條；冬菇浸軟切絲；雜菌切條；金菇去蒂後切半；

用毛巾(少濕)抹腐皮兩面和修硬邊對摺一開八；

燒熱鑊不需落油先炒雜菌至出菇水，加入金菇炒勻，

落鹽和黑椒碎調味後盛起；原鑊加少許油先炒冬菇絲和黑木耳絲，

後加椰菜、甘筍絲和沙葛絲炒勻，落調味和雜菌炒勻，

煮至椰菜軟身後盛起，待涼後將餡料包入腐皮內；

燒熱易潔鑊落少許油，將有摺口先放入鑊煎，

用慢火煎腐皮卷至兩面金黃色便成。

(食時可點喼汁或蠔油埋獻都得o架!)

~做腐皮卷最理想係即包即煎，因為腐皮包餡後會好易受潮而變軟身；

但我嘅做法係通常會包定放雪櫃，煎腐皮卷前30分鐘從雪櫃取出待室溫，

之後放入油鑊用慢慢火煎。

大家可以入嚟Facebook讚下我新開嘅Fans專頁呀!

雀后(添飯)Facebook Fan Page