啤酒紅燒肉

噚日買咗舊腩肉諗住炆紅燒肉，

點知小魔怪唔返嚟食飯，

所以冇煮到成條腩肉放咗入冰箱，

等到今日先攞出嚟煮呀!

想問老公攞罐啤酒嚟煮紅燒肉，

喜力貴嘢話唔好啦!

黑啤又話小魔怪鐘意飲，

最後只係俾我用罐燕京啤酒，

佢嘅理由係~平!

材料: 腩肉1條、薯仔2個、啤酒1罐、薑6片、紹酒2湯匙、

辣椒乾8隻、香葉3塊、八角1粒、冰糖碎2茶匙、蔥花、炒香芝麻

調味: 豉油1湯匙、老抽2湯匙、冰糖適量、鹽少許

做法: 腩肉從冰箱取出解凍30分鐘，切成粒狀後沖洗乾淨，

放入鍋內加入水、薑3片和紹酒1湯匙煮滾出水5~8分鐘後，沖水備用；

薯仔去皮切件後，放入油鑊中略煎至微焦後上碟；

原鑊落腩肉和薑3片煎香後贊紹酒1湯匙，加入冰糖碎2茶匙與腩肉炒勻；

煎至腩肉有焦香後，落辣椒乾、香葉和八角略炒後落啤酒1罐，

煮滾後轉小火炆30分鐘後，加入薯仔再炆至薯仔腍及收汁，

最後灑上蔥花和炒香芝麻便成。

~今次買嘅腩肉太瘦，冇半肥肉咁甘香；

~落咗1罐啤酒可能會唔夠水份，可以落多罐啤酒或用水代替都得。

 

大家可以入嚟Facebook讚下我新開嘅Fans專頁呀!

雀后(添飯)Facebook Fan Page