今日炆咗一大鍋柱候蘿蔔牛筋腩金錢肚，
因為呢個餸隔日食會更入味，
配飯配麵都冇問題；
放涼後入盒放冰箱，
咁就隨時想食都得啦!
不過蘿蔔就唔好入盒喇!
因為冰過嘅蘿蔔再煮會淋哂架!
材料: 急凍牛腩(牛肋條)1磅、急凍金錢肚1磅、急凍熟牛筋1磅、蘿蔔1條、
薑4大片、八角2粒、香葉3片、紹酒2湯匙、熱水5~6碗、冰糖適量
醬料: 柱候醬1.5湯匙、辣豆瓣醬1湯匙
調味: 豉油1湯匙、老抽1湯匙
做法:凍水落鑊加入牛腩、金錢肚、薑2大片和紹酒1湯匙，
煮滾出水10分鐘，取出沖洗後，牛腩切大粒；金錢肚切條；
熟牛筋切件；蘿蔔去皮切件；凍鍋落油，落薑2片和醬料先爆香，
加入牛腩和金錢肚炒勻後，沿鑊邊贊紹酒1湯匙，
加調味、八角、香葉、冰糖和熱水5~6碗煮滾，
轉小火慢慢炆1小時後熄火，唔好開蓋焗2小時；
再開中小火煮滾牛腩，加入蘿蔔和熟牛筋炆多1小時後熄火；
食前開火煮滾蘿蔔牛筋腩炆多15分鐘至收汁，按個人口味落鹽調味便成。
~呢個柱候蘿蔔牛筋腩金錢肚，隔日食仲入味，金錢肚會再腍身D呀!
~炆牛腩時如發現冇哂汁嘅話，可以加入適量熱水繼續煮呀!
好味😋
回覆刪除正呀!
刪除