一年一度朱家愛心糭又出爐喇!
今年總共包咗48隻客家咸肉糭，
8隻紅豆花生素糭，
今年豬肉平，
買咗3斤豬腩肉，
又用咗全隻咸蛋黃嚟包糭，
隻隻糭手掌咁大隻，
好重手呀!
青瓜炒肉片係用新鮮梅頭肉切片，
加咗少少甘筍絲一齊炒，
落咗少少蠔油調味，
簡簡單單，
又一餐囉!
今日見優品360有蔘雞湯賣，
$39包又唔貴喎!
買咗包返屋企同老公一齊試下味呀!
裡面有全隻雞，
人蔘(少少)、栗子(少少)、紅棗和糯米，
煲滾加蔥和少少鹽調味，
咁就食得架喇!
好耐冇得去韓國旅行，
飲番碗蔘雞湯止下癮先得。
第七堂~北海道包&日式菠蘿包
呢堂亞sir俾我哋選擇整腸仔包代替北海道包，
但亞sir做示範包就會做一個北海道包俾我哋呀!
老公鐘意飲清補涼湯，
佢係元朗元生堂買咗包清補涼返嚟，
要我煲湯俾佢飲呀!
又會咁啱架!
原本我買排骨煲猴頸菇湯，
依家就改煲清補涼湯，
湯渣超好食，
我鐘意呀!
今日小魔怪臨時WFH，
咁啱我又買咗舊五層肉$70，
於是整咗呢碟肉夾饃做午餐喇!
用咗印度手抓蔥油餅，
夾埋D鹵咗嘅五層肉和青瓜絲，
我食咗2件，
好滿足，
好味道呀!
黃豆醬肉豆炆腩排，
我其實都幾鐘意炆呢款肉豆嚟食，
炆到D肉豆腍腍哋，
送飯好正架!
今次用個煲仔炆，
原煲上，
碟都洗少隻呀!
噚日母親大人生日，
我哋終於可能出外慶祝喇!
選擇咗石門富臨酒樓食晚飯，
一行12人訂咗間廳房，
分咗二枱~8 人和4人呀!
姐姐親身去花墟買花，
親自插咗一束花送俾母親大人呀!
大魔怪在家工作，
我煮咗呢碟黑松露蘑菇炒意粉俾佢做午餐，
灑少少芝士粉係面，
大魔怪話更加好食呀!
我呢排好鐘意買福花菜炒嚟食，
鐘意佢爽爽脆脆，
今日加咗XO醬落去一齊炒，
好惹味架!
前兩日老公買咗6個檸檬返嚟($10)，
沖咗幾日檸檬水嚟飲，
吸收維他命C和增強抵抗力呀!
我見仲有檸檬係度，
今日就拎咗大半個嚟整檸檬雞翼呀!
今日去街市見到有勝瓜賣，
買咗2條$11，
加咗廿蚊豬肉碎落去一齊煮，
有菜有肉，
又一餐啦喂!
噚日買咗隻冰鮮雞，
用蒜蓉香草醃料醃佢一日一夜，
今晚焗雞之餘，
仲加咗D薯仔落去一齊焗，
燒烤醃料係天貓超市淘返嚟，
味道唔錯喎!
好有大陸食燒烤串燒嘅味道呀!
焗燒雞一D都唔乾，
好juice架!
今日煲冬瓜湯，
冬瓜粟米紅蘿蔔生熟薏米螺片瑤柱排骨湯，
有袪濕利尿、清熱解毒等功效；
買咗2棵超甜粟米$10，
1棵用嚟煲湯，
1棵就烚熟佢嚟食，
超甜粟米真係好鮮甜呀!
呢兩日香港落雨落到七彩，
又黃又紅雨，
朝早洗嘅衫晚上都唔乾呀!
上星期先收埋咗個摺疊乾衣機，
睇怕我都要攞番出嚟用先得喇!
今晚食黑椒洋蔥牛仔骨，
黑椒汁好惹味，
送飯一流呀!
之前係759亞信屋買咗幾包豬柳片，
今晚用佢嚟包金菇呀!
煎到D金菇豬柳卷差不多熟後，
加咗韓式牛肉醬2湯匙和少少水燴番佢，
煮到個汁濃和肉熟後，
咁就食得架喇!
呢個星期大小魔怪已經正常上班，
不需要在家工作了，
我又可以煮得簡單D喇!
今日炆咗一鍋冬瓜支竹炆排骨，
有瓜有排骨又有支竹，
夠哂營養啦!
星期日係佛誕兼母親節，
應下節整咗素腐皮卷，
一次過包咗16條，
分咗兩餐嚟食；
我食兩條素腐皮卷(點醋食)，
已經飽飽哋呀!
前排係爭鮮買壽司時，
見有急凍鮑魚賣，
$160有20隻(有殼)，
店員話可以做鮑魚刺身，
又可以炆嚟食呀!
我見唔太貴就買咗包試下喇!
鮑魚已經去咗內臟好乾淨，
今日就用鮑魚嚟整麻辣鮑魚海鮮雞煲呀!
噚晚好驚喜，
大魔怪送花俾我，
大個仔開竅喇!
識得送花俾亞媽，
好感動啊!💙💙💙
今晚晚餐食炸雞&pizza，
叫外賣，
東主有喜，
休息半天。
老公話要再飲木瓜湯，
今日就買咗個青木瓜返嚟喇!
平時我買開嘅木瓜係紅肉的(熟透的)，
今次第一次買呢款青木瓜，
木瓜肉青BB，
唔知啖湯好唔好飲呢???
今晚大魔怪係屋企食晚餐，
炆冬菇燴生菜、蒸水蛋和蠔油薯仔炆肉粒，
簡簡單單，
開得飯啦!
噚晚返學前，
又落咗元朗搵食喇!
飽飽哋唔太肚餓，
去食碗湯麵都唔錯架!
揀咗係學校附近嘅牛兄弟牛雜粉麵餐廳。
我食牛腩麵$32加$6凍飲，
朋友仔就食雲吞河$28加$6凍飲。
噚晚老公係雪櫃摷咗2條臘腸出嚟，
話今日想食臘味糯米飯呀!
好彩屋企有齊糯米、冬菇和蝦米，
只需要去買盒雞湯(小)返嚟就可以開工啦!
新鮮滾熱辣生炒臘味糯米飯，
出爐啦!
三色椒炒肉絲，
快靚正送飯菜式之一，
加少少辣豆瓣醬落去一齊炒，
今餐又要添飯呀!
炆排骨，
除咗用腩排有少少肥炆出嚟好食外，
其實飛排都好啱用嚟炆煮架!
因為呢個部位嘅排骨肉質較腍，
而且點煮都唔韌架!
可惜每隻豬只得兩塊飛排，
賣哂就冇，
所以一定要早早去街市買餸先會買到呀!
