2022年5月30日 星期一

2022愛心糭~客家咸肉糭&紅豆花生素糭


一年一度朱家愛心糭又出爐喇!

今年總共包咗48隻客家咸肉糭,

8隻紅豆花生素糭,

今年豬肉平,

買咗3斤豬腩肉,

又用咗全隻咸蛋黃嚟包糭,

隻隻糭手掌咁大隻,

好重手呀!

2022年5月29日 星期日

青瓜炒肉片


青瓜炒肉片係用新鮮梅頭肉切片,

加咗少少甘筍絲一齊炒,

落咗少少蠔油調味,

簡簡單單,

又一餐囉!



2022年5月28日 星期六

蔘雞湯

 

今日見優品360有蔘雞湯賣,

$39包又唔貴喎!

買咗包返屋企同老公一齊試下味呀!

裡面有全隻雞,

人蔘(少少)、栗子(少少)、紅棗和糯米,

煲滾加蔥和少少鹽調味,

咁就食得架喇!

好耐冇得去韓國旅行,

飲番碗蔘雞湯止下癮先得。

2022年5月27日 星期五

日式麵包製作實習初班~第七、八堂


第七堂~北海道包&日式菠蘿包

呢堂亞sir俾我哋選擇整腸仔包代替北海道包,

但亞sir做示範包就會做一個北海道包俾我哋呀!

2022年5月26日 星期四

清補涼排骨湯


老公鐘意飲清補涼湯,

佢係元朗元生堂買咗包清補涼返嚟,

要我煲湯俾佢飲呀!

又會咁啱架!

原本我買排骨煲猴頸菇湯,

依家就改煲清補涼湯,

湯渣超好食,

我鐘意呀!



2022年5月25日 星期三

肉夾饃


今日小魔怪臨時WFH,

咁啱我又買咗舊五層肉$70,

於是整咗呢碟肉夾饃做午餐喇!

用咗印度手抓蔥油餅,

夾埋D鹵咗嘅五層肉和青瓜絲,

我食咗2件,

好滿足,

好味道呀!

2022年5月23日 星期一

黃豆醬肉豆炆腩排

 

黃豆醬肉豆炆腩排,

我其實都幾鐘意炆呢款肉豆嚟食,

炆到D肉豆腍腍哋,

送飯好正架!

今次用個煲仔炆,

原煲上,

碟都洗少隻呀!


2022年5月22日 星期日

母親大人生日快樂


噚日母親大人生日,

我哋終於可能出外慶祝喇!

選擇咗石門富臨酒樓食晚飯,

一行12人訂咗間廳房,

分咗二枱~8 人和4人呀!

姐姐親身去花墟買花,

親自插咗一束花送俾母親大人呀!


2022年5月20日 星期五

素食~黑松露蘑菇炒意粉


大魔怪在家工作,

我煮咗呢碟黑松露蘑菇炒意粉俾佢做午餐,

灑少少芝士粉係面,

大魔怪話更加好食呀!

2022年5月19日 星期四

XO醬福花炒肉絲


我呢排好鐘意買福花菜炒嚟食,

鐘意佢爽爽脆脆,

今日加咗XO醬落去一齊炒,

好惹味架!


2022年5月18日 星期三

檸檬雞翼


前兩日老公買咗6個檸檬返嚟($10),

沖咗幾日檸檬水嚟飲,

吸收維他命C和增強抵抗力呀!

我見仲有檸檬係度,

今日就拎咗大半個嚟整檸檬雞翼呀!

2022年5月16日 星期一

勝瓜燴豬肉碎


今日去街市見到有勝瓜賣,

買咗2條$11,

加咗廿蚊豬肉碎落去一齊煮,

有菜有肉,

又一餐啦喂!


2022年5月15日 星期日

蒜蓉香草焗燒雞配薯角

 

噚日買咗隻冰鮮雞,

用蒜蓉香草醃料醃佢一日一夜,

今晚焗雞之餘,

仲加咗D薯仔落去一齊焗,

燒烤醃料係天貓超市淘返嚟,

味道唔錯喎!

好有大陸食燒烤串燒嘅味道呀!

焗燒雞一D都唔乾,

好juice架!

2022年5月14日 星期六

冬瓜粟米紅蘿蔔生熟薏米螺片瑤柱排骨湯

 

今日煲冬瓜湯,

冬瓜粟米紅蘿蔔生熟薏米螺片瑤柱排骨湯,

有袪濕利尿、清熱解毒等功效;

買咗2棵超甜粟米$10,

1棵用嚟煲湯,

1棵就烚熟佢嚟食,

超甜粟米真係好鮮甜呀!

2022年5月13日 星期五

黑椒洋蔥牛仔骨

 

呢兩日香港落雨落到七彩,

又黃又紅雨,

朝早洗嘅衫晚上都唔乾呀!

上星期先收埋咗個摺疊乾衣機,

睇怕我都要攞番出嚟用先得喇!

今晚食黑椒洋蔥牛仔骨,

黑椒汁好惹味,

送飯一流呀!

2022年5月12日 星期四

韓式金菇豬柳卷


之前係759亞信屋買咗幾包豬柳片,

今晚用佢嚟包金菇呀!

煎到D金菇豬柳卷差不多熟後,

加咗韓式牛肉醬2湯匙和少少水燴番佢,

煮到個汁濃和肉熟後,

咁就食得架喇!

2022年5月11日 星期三

冬瓜支竹炆排骨

 

呢個星期大小魔怪已經正常上班,

不需要在家工作了,

我又可以煮得簡單D喇!

今日炆咗一鍋冬瓜支竹炆排骨,

有瓜有排骨又有支竹,

夠哂營養啦!

2022年5月10日 星期二

素腐皮卷


星期日係佛誕兼母親節,

應下節整咗素腐皮卷,

一次過包咗16條,

分咗兩餐嚟食;

我食兩條素腐皮卷(點醋食),

已經飽飽哋呀!

2022年5月9日 星期一

麻辣鮑魚海鮮雞煲


前排係爭鮮買壽司時,

見有急凍鮑魚賣,

$160有20隻(有殼),

店員話可以做鮑魚刺身,

又可以炆嚟食呀!

我見唔太貴就買咗包試下喇!

鮑魚已經去咗內臟好乾淨,

今日就用鮑魚嚟整麻辣鮑魚海鮮雞煲呀!

2022年5月8日 星期日

母親節快樂

 

噚晚好驚喜,

大魔怪送花俾我,

大個仔開竅喇!

識得送花俾亞媽,

好感動啊!💙💙💙

今晚晚餐食炸雞&pizza,

叫外賣,

東主有喜,

休息半天。

2022年5月6日 星期五

青木瓜眉豆花生雞腳排骨湯


老公話要再飲木瓜湯,

今日就買咗個青木瓜返嚟喇!

平時我買開嘅木瓜係紅肉的(熟透的),

今次第一次買呢款青木瓜,

木瓜肉青BB,

唔知啖湯好唔好飲呢???

2022年5月5日 星期四

家常便飯


今晚大魔怪係屋企食晚餐,

炆冬菇燴生菜、蒸水蛋和蠔油薯仔炆肉粒,

簡簡單單,

開得飯啦!

2022年5月4日 星期三

元朗牛兄弟牛雜粉麵餐廳


噚晚返學前,

又落咗元朗搵食喇!

飽飽哋唔太肚餓,

去食碗湯麵都唔錯架!

揀咗係學校附近嘅牛兄弟牛雜粉麵餐廳。

我食牛腩麵$32加$6凍飲,

朋友仔就食雲吞河$28加$6凍飲。

2022年5月3日 星期二

生炒臘味糯米飯


噚晚老公係雪櫃摷咗2條臘腸出嚟,

話今日想食臘味糯米飯呀!

好彩屋企有齊糯米、冬菇和蝦米,

只需要去買盒雞湯(小)返嚟就可以開工啦!

新鮮滾熱辣生炒臘味糯米飯,

出爐啦!


2022年5月2日 星期一

三色椒炒肉絲


三色椒炒肉絲,

快靚正送飯菜式之一,

加少少辣豆瓣醬落去一齊炒,

今餐又要添飯呀!


2022年5月1日 星期日

豉汁涼瓜炆飛排(排骨)


炆排骨,

除咗用腩排有少少肥炆出嚟好食外,

其實飛排都好啱用嚟炆煮架!

因為呢個部位嘅排骨肉質較腍,

而且點煮都唔韌架!

可惜每隻豬只得兩塊飛排,

賣哂就冇,

所以一定要早早去街市買餸先會買到呀!