今日買咗盒豆腐，
落多少少油煎豆腐兩面，
再灑少少五香淮鹽係豆腐面，
咁就一個餸，
咸咸香香，
係咪好簡單呢!
由於仲有十零日我就要做通波仔手術，
所以呢排要食清D，
簡單一碟蕃茄炒蛋都可以餸到飯架!
呢個係一個素菜，
我好鐘意煮嚟食架!
因為椰菜、粉絲和雞蛋都係我至愛，
炒埋一齊好好食架!
仲可以當飯食添呀!
小魔怪係薯仔控，
佢話薯仔白烚都咁好食呀!
今日我就整咗碟麻辣拌土豆(素)，
先蒸熟薯仔後到煎到薯仔金黃色，
加埋粟米粒、蒜蓉和蔥粒，
調味有麻辣油、豉油、糖、醋、鹽和少少凍滾水，
之後壓散撈勻，
最後加上炸花生便成。
噚晚打邊爐，
食剩咗一條樹記鮮腐竹，
今晚就用佢嚟整咗碟鮮腐竹蒸甜梅菜，
簡單又好味道，
送飯一流架!
噚晚除咗叫咗份土耳其餐，
其實仲有個焗雜菌粉絲鍋(氣炸)，
簡單又好味道，
我和小魔怪大啖大啖咁食，
食得好爽呀!
今日大年初一，
我祝大家兔年行大運，
身體健康，
萬事如意，
心想事成!
朱家傳統初一食全日齋，
今日大魔怪女朋友仔嚟食飯，
簡單4個素菜，
冬菇生菜、南乳炆齋、粟米芝士煎餅和蒸水蛋，
開飯啦!
茄子雞蛋醬(素食)，
做法真係好簡單，
用咗黃豆醬、蠔油、豉油、老抽和糖嚟炆茄子，
炆到茄子淋哂後
加埋滑蛋撈佢，
灑上蔥花炒勻，
撈飯、撈麵和拌粥食都唔錯架!
打第4針的第三日，
今日終於冇發燒喇!
但就好似俾人打咗一身咁，
燒咗兩日，
針口紅腫兼赤赤痛，
瞓覺唔敢側身瞓，
掂到都覺痛呀!
今日不停冰敷，
希望快D好呀!
今日整咗白汁蘑菇意粉(素)做午餐，
我和大小魔怪3個人食，
所以煮咗半包意粉(約250g)，
加罐大嘅白汁蘑菇湯，
啡菇和西蘭花，
煮起一大鍋全部食哂，
清盆行動完成。
前兩日買嘅農場蛋，
雖然冇湖北蛋個蛋黃咁深色，
但奇就奇在呢兩日打嘅蛋都係雙黃的，
噚晚打果3隻蛋有6個蛋黃，
今朝煎雙蛋就有4個蛋黃，
連打5隻雞蛋有10個黃，
睇嚟我要買六合彩先得囉!
天氣熱，
朱家涼拌菜又出爐啦!
今日整咗碟涼拌麻辣青瓜，
爽爽脆脆，
冰涼開胃，
麻辣惹味，
送飯一流呀!
大魔怪在家工作，
我煮咗呢碟黑松露蘑菇炒意粉俾佢做午餐，
灑少少芝士粉係面，
大魔怪話更加好食呀!
星期日係佛誕兼母親節，
應下節整咗素腐皮卷，
一次過包咗16條，
分咗兩餐嚟食；
我食兩條素腐皮卷(點醋食)，
已經飽飽哋呀!
今晚大魔怪係屋企食晚餐，
炆冬菇燴生菜、蒸水蛋和蠔油薯仔炆肉粒，
簡簡單單，
開得飯啦!
夏天將至，
又係時候開始煮涼拌菜嘅好時機喇!
今日見到D幼身茄子好靚，
買咗2條$6，
用嚟整手撕涼拌茄子呀!
荷蘭豆炒素魚片，
素魚片造型好得意，
真係成條魚嘅造型咁架!
好攪笑呀!
呢碟餸調味好簡單~鹽、糖、香菇粉，
炒熟就食得，
清清哋都唔錯架!
今日食蔥油拌素麵；
雖然睇好似好簡單，
其實一D都唔易架，
炸蔥油要好留心，
一過火蔥油燶咗就會變苦，
用蔥油拌素麵特別好味，
充滿蔥油香味，
食慾會大增架!
今次整咗個兩款汁料，
有香醋汁和蠔油汁呀!
真姬菇、本菇、蟹味菇，
呢幾款菇其實都好似樣架!
今日就整咗呢碟素菜~香煎豆腐燴真姬菇，
先煎咗D豆腐，
再將真姬菇煮熟，
落少少蠔油、豉油、鹽、糖和麻油調味，
簡簡單單又好送飯，
唔錯架!
