養生壺~蟲草花羊肚菌鹿茸菇石斛淮山湯

今日又係用養生壺煲湯，

蟲草花羊肚菌鹿茸菇石斛淮山湯，

加咗豬腱肉、茨實、蓮子和杞子，

呢個湯好香雜菌味，

好好飲呀!

瑞士汁豬手雞腳

瑞士汁豬手雞腳，

充滿骨膠原的一個餸；

今日買咗4磅豬手粒，

加埋8隻雞腳，

用咗半支瑞士汁，

鹵咗一大煲，

應該要分兩餐先食得哂呀!

鹿茸菇炒五花腩肉

呢排我好鐘意食鹿茸菇，

用嚟煲湯又或炒都好好食架!

今次就用佢嚟煮咗碟鹿茸菇炒五花腩肉喇!

我鐘意鹿茸菇脆脆嘅口感，

加埋五花腩肉，

真係好送飯架!

冬瓜粟米排骨湯

噚日大暑冇煲湯，

今日就買齊材料煲冬瓜湯喇!

買咗唐排和粟米嚟煲湯，

加埋瑤柱粒，

啖湯好清甜，

真係好消暑架!

今日大暑

今日大暑，

太熱我唔煲湯喇!

買咗個大西瓜$55，

切粒放雪櫃，

雪凍佢嚟食，

一樣咁消暑呀!

一家大細去旅行

7月20日星期六

我、老公、小魔怪和大魔怪連同佢女朋友仔，

5個人一齊返大陸大亞灣玩，

Book咗架7人車￥250，

舒舒服服由蓮塘過去大亞灣霞涌，

大約1小時10分就到啦!

首先返新屋放低行李，

再簡單打掃一下，

就去搵食啦!

家常便飯

今日大魔怪女朋友仔嚟食飯，

簡簡單單3餸1湯，

大部份都係蔬菜，

好健康架!

福花菜炒牛肉、XO醬西芹炒蝦仁、

煎三文魚和節瓜咸蛋肉片湯。

慶祝

今日小魔怪去考車牌(棍波)，

佢係駕駛學校上咗十幾堂架!

呢排佢都幾勤力補堂，

問佢有冇信心，

佢話打慣機，

好易喎!

今次佢一take過考到車牌，

老公都話佢叻仔。

中午叫咗佢鐘意食嘅台灣嘢食，

齊齊慶祝下，

不過舖頭送漏咗杯凍飲，

俾番張$20優惠劵，

下次幫襯就可以用啦!

冬瓜粉絲炆釀豆腐卜

 

呢個夏天，

食冬瓜節瓜就最啱喇!

今日就買咗1斤冬瓜，

嚟炆釀豆腐卜，

加埋我哋一家大細都鐘意食嘅粉絲，

真係好好食架!

節瓜鱆魚眉豆花生雞腳煲西施骨

今朝一早買齊材料煲湯，

煲完湯11點都未到，

飲咗碗頭啖湯，

啖湯好濃鱆魚味，

老公大讚呢個湯所有湯渣都食得，

好環保呀!

豆腐卜炆燒肉

屋企食剩半斤燒肉，

今晚用佢整咗呢碟豆腐卜炆燒肉，

豆腐卜索哂D汁，

送飯一流架!

家常便飯

今日天氣真係好熱，

下午3點幾竟然有成35.5度，

想話沖凍水涼咩，

D水喉水都熱熱哋架!

夜晚煮完餸我真心冇胃口，

下次都係唔煮好過喇!

雜記

噚日中午去咗天水圍銀座裡銀行辦事，

今日下午我又去咗染髮，

所以有兩餐我和老公都係食飯盒，

不過我都有煲湯架!

絲瓜雞蛋肉片湯

近日胃酸倒流令我感到好唔舒服，

成日個胃都頂住頂住，

瞓覺時又有火燒心嘅感覺，

平時我都盡量唔食藥，

今日終於頂唔順，

食咗粒藥希望可以舒緩下啦!

晚餐都冇咩胃口食嘢，

所以今晚簡單煮咗個絲瓜雞蛋肉片湯，

清清哋，

有湯有肉有菜有蛋，

啱哂我呀!

返惠州渡假去

噚日7月9日，

我和老公兩個人返咗惠州屋企，

經蓮塘口岸過關，

坐永東巴士返惠州，

再轉的士返到自己屋苑，

响樓下小店食個快餐，

涼瓜炒蛋飯￥15加豬雜湯飯￥15，

再加支冰紅茶￥5，

呢餐食咗￥35，

真係超抵呀！

又係叉燒

係呀，

今日又係叉燒呀!

上次整叉燒大魔怪冇食到，

今日專登整番餐俾佢食呀!

炒埋碟菜芯炒牛肉，

兩個餸好似好少，

嘻嘻，

大家陪我減肥，

張就下啦!

咖哩薯仔雞膇

今日買咗6隻雞膇，

用咗肥媽教整咖哩牛腩嘅食譜，

煮咗一鍋咖哩薯仔雞膇，

配埋小魔怪買嘅全麥薄餅嚟點咖哩嚟整，

唔食飯都冇問題呀!

小暑~冬瓜粟米紅蘿蔔煲西施骨

今日小暑，

又係時候煲冬瓜湯解解暑啦!

呢個湯有利尿、袪濕、健脾開胃等功效架!

養生壺~羊肚菌鹿茸菇石斛淮山湯

今晚得我和老公兩個撐枱腳，

我用養生壺煲咗羊肚菌鹿茸菇石斛淮山湯，

配瘦肉、去核紅棗和杞子，

加埋自家製氣炸叉燒和灼菜芯，

開得飯啦!

休閒的一天

今日上午我住果座要洗水箱，

所以中午果餐可以唔使煮飯喇!

我早上休休閒閒行咗公園幾個圈，

出咗一身汗，

返到屋企拿拿臨沖埋個涼，

冇幾耐就停水啦!

今日小魔怪WFH，

冇水唔使煮飯，

中午又係叫外賣呀!

今次叫咗台灣美食，

3個餐包飲品$220，

味道都唔錯，

小魔怪話個麻辣鴨血牛肉麵好好食，

應該會有下次呀!

71回歸晚餐

噚日7月1日回歸假期，

中午煮咗冷麵食，

晚餐大魔怪叫我唔好煮飯，

叫炸雞KFC做晚餐，

4人套餐加咗個雞皇飯和炸雞寶，

大約$380，

全部都係炸嘢，

哈哈，

啱哂D年青人啦!

涼拌雞絲冷麵

依家天氣咁熱，

大家都冇咩胃口食熱辣辣嘅飯餸，

所以今日中午我就整咗呢個涼拌雞絲冷麵做午餐呀!

雞髀肉加咗鹽、黑椒碎和胡椒粉嚟醃，

蒸熟待涼拆絲；

冷麵就用咗粗拉麵，

先煮熟後浸冰水，

待涼後隔水放雪櫃雪一陣；

而個冷麵汁係我自己調製，

加咗麻辣油、花生醬、蒸魚豉油、醋、蒜蓉、芝麻和水，

大小魔怪都話好味道，

仲話以後唔使買街外嘅冷麵汁呀!

冷麵加埋清清爽爽嘅青瓜絲一齊食，

特別爽口呀!

氣炸雞膇

今朝醃定咗D雞膇，

晚餐就用氣炸鍋整咗呢碟氣炸雞膇，

唔使開鑊炸，

廚房冇咁熱囉!

附上中午食嘅煎餃和意粉，

咁又過咗一日啦!

家常便飯

今日大魔怪女朋友仔嚟食飯，

4餸1湯，

白飯任裝，

天氣太熱，

開冷氣緊係唔少得啦!

食飯時我要開把風扇吹住自己，

先有胃口食飯呀!

食飯盒

呢兩日我和老公都係簡單煮食，

因為大小魔怪都唔返嚟食晚飯，

天氣咁熱，

兩個人就懶得煮，

所以買飯盒就最啱啦!

不過呢，

我有時都會煮D簡單餸，

呢碟XO醬蝦仁炒青瓜，

好送飯又惹味，

都唔錯架!

豉汁涼瓜炒牛肉

老公好鐘意食涼瓜，

所以就買咗個肥肥深綠色的涼瓜~雷公鑿；

今次唔炆排骨喇!

而係炒牛肉，

豉汁涼瓜炒牛肉，

好送飯架!

羊肚菌鹿茸菇淮山豬腱湯

今日煲羊肚菌鹿茸菇淮山豬腱湯，

加埋紅蘿蔔、粟米和蜜棗，

呢個湯水有提高免疫力、健脾胃、

增強體質、補腦提神等功效架!

唔好講笑，

呢個湯真係好清香有菇味，

而且所有材料都可以食落肚，

老公話好環保呀!

香煎黃立鯧

 

商場街市仔裝修重開，

魚檔多咗少少唔同種類嘅魚，

(不過都係普通嘢)

今日見有黃立鯧賣一條$35，

唔算貴啦!

所以買咗一條嚟煎，

煎香後淋上蒸魚豉油，

啖啖肉，

好味道呀!

涼拌麻辣牛腱金錢肚

噚日我已經鹵定牛腱和金錢肚，

今日就將佢哋切片，

加入我自己調味嘅麻辣汁，

整咗呢碟涼麻辣牛腱金錢肚，

天氣咁熱，

食呢個涼拌菜，

簡直正到冇朋友啦!

咸魚蒸肉片

今日又用大亞灣買嘅淡口大馬友，

蒸咗呢碟咸魚蒸肉片，

老公之前已經將咸魚斬件，

我就揀咗幾件咸魚肉，

加埋梅頭豬肉，

蒸完出嚟咸魚特別香，

睇嚟老公今日又要添飯啦喂!

鹿茸菇炒雞肉

上次去山姆買咗包有機鹿茸菇，

今日就浸咗少少嚟炒雞髀肉，

鹿茸菇食落爽爽脆脆，

老公都讚話好食呀!

天水圍新北江~Cookingnana

今日襯天氣好，

早上晨運我去咗天水圍公園和天水圍運動場，

30度行咗一個圈，

已經出一身汗，

真係好熱架!

晚餐得我和小魔怪食，

咁熱唔煮啦!

叫外賣算喇!

今次試下用美團KeeTa點外賣，

有好多優惠呀!

家常便飯

今晚大小魔怪都係屋企食飯，

簡單煮咗3個餸，

豉汁涼瓜排骨、燒腩仔和蝦仁炒蛋，

唔講咁多，

開飯啦喂!

霸王花紅蘿蔔煲西施骨

上星期返廣州，

堂妹買咗包霸王花俾我做手信，

今日就用佢嚟煲咗湯，

霸王花紅蘿蔔煲西施骨，

呢個湯有清熱、润肺、止咳除痰外，

仲有舒緩便秘、排毒等功效架!

父親節晚餐~新北江雲來川菜

 

今日父親節，

大小魔怪請我哋食晚飯，

原本諗住點外賣，

點知佢哋即興話要落街食呀!

叫咗6個餸、2碗飯、薯粉1碗和4杯豆漿，

店員話滿$360有碟小食送，

我哋叫咗碟沙薑豬腳，

呢餐食咗$396，

多謝大小魔怪。

2日1夜廣州探親之旅

噚日，

我和老公陪母親大人返廣州探親，

6年冇返去，

唔知廣州變成點呢???

我哋係羅湖搭10點火車直去廣州東站，

每位車費79.5人民幣。

呢架車唔停其他站大約1小時04分後就到啦!

堂姐和堂姐夫廣州揸車嚟表我哋，

首先我哋去食午飯。

黑椒洋蔥牛仔骨

今日中午有成34度，

真係熱到爆呀!

响廚房煮完飯真係冇咩胃口食嘢架!

好彩今晚我煮咗黑椒洋蔥牛仔骨，

用洋蔥和牛仔骨撈飯，

今餐我食咗半碗飯呀!

氣炸雞粒

噚日醃定呢盆雞粒，

今晚就用咗氣炸鍋嚟炸熟佢，

一滴油都冇落，

都有脆皮嘅效果，

真係好鬼正架!

我分咗2盆嚟氣炸，

未食完一盆，

另一盆就出爐喇!

麻辣香鍋

今日端午節，

襯大魔怪女朋友仔過嚟食飯，

順便慶祝埋父親節呀!

午餐煲粥食糭，

晚餐就整咗大家愛吃嘅麻辣香鍋，

有雞、豬肚、蝦、雜丸、芝士腸、豆角，

後加蕃薯粉和台灣公仔面呀!

叫外賣

老公晚上約咗朋友，

得番我哋3仔乸食飯，

我都懶得煮，

最方便盲係搵panda幫手啦!

小魔怪負責點餐，

大小魔怪負責食，

而我就負責俾錢呀!

氣炸叉燒&雞翼

 

今日買咗$35梅頭瘦肉諗住整叉燒，

見冰箱仲有8隻雞翼，

又攞埋出嚟一齊醃呀!

有叉燒又有雞翼，

今餐好多肉呀!

週五日記

呢排晨運我好鐘意行天水圍公園，

一來空氣清新D，

二來公園開咗唔少花，

好靚架!

2024愛心糭~客家咸肉糭

今日係一年一度包糭嘅大日子，

今年準備包廿零隻糭左右，

總共包咗24隻有咸蛋黃嘅客家咸肉糭，

包咗5隻冇咸蛋黃嘅糭俾小魔怪食呀!

食飯盒

每逢星期二、三晚，

大魔怪返夜學，

而小魔怪又唔返嚟食晚飯嘅話，

我都會偷懶唔煮飯，

叫老公下午做完運動後就買個兩餸飯返屋企，

俾我倆嘅晚餐喇!

每次老公都有選擇困難症，

佢話D餸款款都差不多，

一堆堆都睇唔清係咩嚟，

所以揀咗好耐都唔知揀咗咩呀!

司華力腸雞絲燴意粉

大魔怪和女朋友仔，

去日本旅行買咗好多意粉醬俾我，

平時我就用佢嚟整意粉做午餐，

今餐就整咗司華力腸雞絲燴意粉，

簡單又好味道呀!

氣炸薯角雞翼

今晚整氣炸薯角雞翼，

先氣炸薯角，

再氣炸雞翼，

加咗麻辣粉和燒烤料去焗，

特別惹味架!

家常便飯

今日又係家常便飯，

冬瓜粟米紅蘿蔔生熟薏米煲西施骨，

冬瓜支竹炆火腩和清蛋炒蝦仁。

打風返大亞灣

5月31日(星期五)

上星期已經約好朋友4個人去大亞灣玩，

點知撞正打風，

1號風球都照上啦!

我哋11點左右去到蓮塘口岸，

係口岸2樓簡單搵食後，

就call車返大亞灣霞涌喇!

群帶菜肉碎雞蛋湯

平日唔煲老火湯，

我就滾啖湯飲下啦!

群帶菜肉碎雞蛋湯，

呢個湯滾8~10分鐘就有得飲，

真係快靚正呀!

咸魚茄子肉碎

今日老公斬咗係大亞灣買嘅咸魚，

老公話D咸魚肉好香，

魚肉係實肉的，

但由於魚骨太硬有D難斬，

於是佢拆咗D碎咸魚肉出嚟，

我就用咗D碎咸魚肉，

整咗呢碟咸魚茄子肉碎喇!