歡送2024，
喜迎2025，
除夕食得簡單，
一鍋大雜燴，
好暖笠笠啊!
今晚得我和老公兩個人食晚飯，
唔想煮飯，
所以煮咗碟菜芯肉碎雞蛋炒河粉，
炒完一大鑊，
兩個人都係食唔哂呀!
呢個聖誕假期話咁快就過咗，
諗諗下，
呢排我都冇咩正正經經煮餐飯，
今日簡單就煮咗兩個餸，
氣炸叉燒&雞膇，
仲有XO醬西蘭花炒蝦仁，
開得飯喇!
之前响惠州超市買咗盒薑汁雙皮奶，
老公試整失敗收場，
完全水狀唔成形；
今日輪到我試整，
成功失敗就睇下得唔得啦!
先用少少凍滾水開勻D粉，
再沖熱水落去，
等咗10分鐘，
呢盒薑汁雙皮奶偏甜，
熱食凍食都可以呀!
12月24日
我哋一行4人返惠州過聖誕，
首先緊係要搵食啦!
第一餐食客家菜。
話時話，
我都好耐冇煮呢個餸喇!
所以今日專登買齊材料，
煮咗呢碟豉汁煎釀三色椒呀!
噚日忙於準備冬至晚餐，
我下午都冇煮飯，
試新嘢叫外賣，
自取抵食好多架!
買咗個燒雞餐，
有燒雞、薯條和薯格，
仲配2罐汽水$72，
叫多兩個套餐，
肉醬雞蛋意粉和咖哩牛腩飯，
配埋2罐汽水，
每份$36，
夾埋都係$144咋!
超抵食，
不過佢嚟逢星期日休息呀!
今日係冬至，
我哋一家四口和大魔怪女朋友仔一齊過節，
呢餐冬至晚餐噚日開始準備，
一早醃定雞和煲湯材料，
今日就買埋魚和其他菜；
鮑魚瑤柱花膠冬菇炆鴨腳、
玉露雞、
XO醬炒西蘭花、
瑤柱燴豆苗、
蒸珍珠立魚、
榨菜蒸牛肉、
蓮藕鱆魚馬蹄紅蘿蔔綠豆煲西施骨，
6餸1湯，
白飯任裝。
話說我噚晚開始唔係咁舒服，
攪肚痛兼肚瀉，
痛到伸直唔到個身添!
之後食咗粒止痛藥，
先可以瞓到一陣咋!
今日就冇肚痛，
但仍然有瀉，
我食咗成日粥水，
希望可以快D好番啦!
呢個雙菇炆腩排(冬菇&鹿茸菇) ，
係噚晚嘅餸嚟，
我食咗D菇，
都唔錯呀!
我唔知係咪凍親呢，
今晚煮完飯後，
突然間覺得好唔舒服，
肚痛又作嘔，
沾寒又沾凍，
攪到我冇哂胃口添!
不過咁，
我都有食少少煎牙帶魚，
好味架!
不過唔敢食太多，
我驚會嘔呀! >.<
噚日摷雪櫃，
見仲有6片小土魷乾，
今日就用嚟蒸豬肉餅，
加埋馬蹄落去一齊蒸，
呢個餸最啱撈飯食呀!
連食咗幾餐燒烤包食物，
老公都話食到厭，
見到雞翼豬扒牛扒都驚驚囉!
今日拿拿臨買條桂花魚返嚟蒸俾佢食，
哈哈，
佢見到有蒸魚食
即刻開心哂呀!
噚日我哋黃氏一家去拜祭父親大人，
之後就去咗妹妹妹夫家打牌玩樂，
夜晚就參加佢哋屋苑攪嘅聖誕燒烤晚會，
$128有燒烤、唱K和抽獎，
我哋全部有13人，
有13個燒烤包和汽水飲品外，
我哋自己又買咗鱔、帶子、鮑魚、象拔蚌、
雞翼、咖哩魷魚和羊架。
大魔怪話冇買麵包唔似燒嘢食，
於是又外賣咗幾袋方包和蒜蓉醬過嚟，
佢哋話燒完麵包就完美喇!
今次大抽獎，
我哋13人有9份獎品，
真係皆大歡喜呀!
我將食剩6個燒烤包和其他燒咗嘅食物，
全部攞哂番屋企，
呢幾日都係食佢哋呀!^.^
前兩日約咗今日換煮食爐，
至於抽油煙機呢就換唔到喇!
因為依家煤氣公司指定所有抽油煙機要安裝係牆上，
我哋裝係廚櫃嘅抽油煙機就不合資格安裝呀!
不過煤氣公司送咗200分俾我响網上換禮品。
今晚用新煮食爐，
開爐有少少唔就手，
希望遲下會習慣啦!
我呢兩日牙骹有D痛，
擘大口食嘢都有少少困難，
所以呢兩日唔係食粉麵，
就係食魚，
今日蒸咗梅菜鯇魚，
有魚肉和魚汁撈飯濕濕哋，
先可以慢慢食啖飯呀!
今日見到街市有竹芋賣，
之前返惠州，
堂弟婦好鐘意用佢嚟煲湯，
網上查過竹芋有清肝、潤肺、
清熱、止咳和利尿等功效，
所以今日就買咗幾條嚟煲湯，
五指毛桃竹芋粟米紅蘿蔔煲西施骨，
唔講咁多，
襯熱飲湯啦!
屋企個煮食爐，
用咗8年，
換零件都換咗5次左右，
老公話今次壞咗就唔整喇!
買過新嘅好過啦!
之前買嘅係Simpa台灣牌子，
今次換嘅係TGC日本牌子，
原價$6130，
依家優惠$5930，
不過如果原價買嘅話，
可以加送一個Simpa抽油煙機，
好抵喎!
老公話一次換哂佢喎，
仲揀咗呢個藍色添!
就係咁，
明天師傅過嚟睇位，
啱裝嘅話就一次過換哂兩個廚房用品，
其實屋企洗衣機和冷氣機都夠期換架啦!
排緊隊囉!
今日終於買咗豆豉啦!
即刻買鳳爪和腩排，
煮咗呢碟豉汁排骨炆鳳爪，
用埋豉汁撈飯就更加正，
睇嚟又要添飯啦喂!
今日我見天氣涼涼哹，
係時候要整番煲煲仔飯嚟食下喇!
今日整咗臘味煲仔飯，
有埋飯焦，
正呀喂!
其實依家我都好鬼懶，
每當大小魔怪兩個都唔係屋企食飯時，
我都會叫老公買兩餸飯，
慳水又慳力，
好過自己煮呀!
今日又用咗個養生壺煲湯，
石斛麥冬淮山紅蘿蔔煲瘦肉，
材料有瘦肉、石斛、麥冬、淮山、蓮子百合、
茨實、龍眼肉、瑤柱仔、蜜棗和杞子，
煲完啖湯好甜架!
噚日我同老公返惠州攪D嘢，，
辦完事後老公話想去大亞灣食海鮮，
我哋返到去都已經成5點，
打掃完畢就去食晚餐啦!
菜芯牛肉碎蛋炒飯，
簡簡單單，
都幾正架!
唔講都唔知，
原來客家人鐘意用菜芯炒飯，
嘻嘻，
我呢個客家新抱都幾稱職架!
今晚有好嘢食，
我煮咗花膠雲吞雞，
有湯、有雞、有菜和有雲吞餃子，
好豐富呀!
屋企仲有半樽麻辣雞煲醬，
好彩仲未過期，
即刻攞出嚟煮咗呢碟麻辣薯仔洋蔥炆雞膇，
辣辣哋，
好送飯架!
今朝同老公去天水圍百老匯睇早場~破地獄，
長者$25，
成人$60，
唔好話香港電影冇人睇，
今朝早場全院滿座，
套戲都幾感人，
我都有少少眼濕濕呀!
早上買咗靚靚梅頭肉，
醃咗今晚做叉燒。
今日佳寶有急凍魷魚鬚賣，
我見好耐冇食過，
於是買咗3隻魷魚鬚炒嚟食；
咁啱大小魔怪都係屋企食飯，
啱哂佢哋食啦!
今日買咗老公至愛嘅涼瓜，
炒牛肉就最啱Key，
雪櫃仲有半個甘筍，
切幾片嚟做配料，
紅紅綠綠都幾靚架!
响惠州買咗舊煙燻五花肉，
切咗一半嚟炒荷蘭豆，
煙燻五花肉咸咸哋，
我剩係加咗少少蠔油和糖落去一齊炒，
真係好惹味，
超級好送飯呀!
今日靚湯，
五指毛桃螺片煲西施骨，
配淮山、蓮子、百合、茨實、蜜棗和瑤柱仔，
呢個湯有滋陰補腎、健脾補肺、止咳化痰等功效。
11月21日星期四，
我、老公和朋友一行4人，
齊齊返惠州吃喝玩樂呀!
返到惠州屋苑附近食午飯，
食飽飽攞埋我訂嘅貨就返屋企啦!
我終於食哂前幾次响惠州買嘅梅菜啦!
好彩我仲有新存貨咋!
上次我買梅菜俾母親大人時，
留咗一半份量俾自己；
不過聽母親大人講，
佢差不多食哂啦!
佢鐘意用梅菜嚟蒸魚和蒸茄子，
睇嚟下次我去見母親大人，
我要分D梅菜俾佢先得啦!
今晚我趕住睇TVB台慶，
所以簡簡單單煮咗兩個餸，
麵豉蒸排骨和灼生菜，
開得飯啦!
大小魔怪鐘意食魚，
尤其鐘意食三文魚，
所以今日一次煎兩塊，
等佢哋食過夠呀!
我落少少鹽和胡椒粉醃一陣，
煎好三文魚扒後，
淋少少蒸魚豉油點嚟食，
真係好正架!
我前日已經買咗4磅羊腩，
問大小魔怪星期六日邊日得閒，
因為佢哋週末好多節目，
所以要一齊食飯都要約好時間呀!
今晚食支竹馬蹄羊腩煲。
冬菇栗子炆雞，
今次用咗冇骨雞扒嚟做，
哈哈，
啱哂我食肉唔想𦧲骨嘅性格呀!
2024年11月8日(星期五)
食完早餐後，
我哋就去參觀品茶~龍井，
飲完杯龍井，
廁所都去得好順暢呀!
2024年11月7日(星期四)
今朝又係6點morning call，
8點半就要離開上海佘山世茂洲際酒店，
所以我哋早早落去食個豐富早餐，
未集合前就落14樓地下平台影相。
2024年11月6日(星期三)
今朝食完早餐後，
即刻去咗參觀指定購物點，
紫砂茶壺博物館和珍珠展覽館。
午餐食太湖風味餐。
2024年11月5日(星期二)
今朝6點morning call，
落酒店食咗個豐富早餐，
好多款食品，
真係唔錯呀!
食飽飽就出發去~南京大報恩寺。
2024年11月4日(星期一)
今朝8點半係機場集合，
我哋匯合母親大人後，
寄完行李後，
就去食早餐啦!
11月4日~11月9日，
我、老公和母親大人3個人，
跟團去咗華東玩咗6日，
行程非常緊迫，
冇咩時間去買手信呀!
所以有部份係導遊哥哥推銷俾我哋的，
我哋試過又覺得價錢啱就買咗少少；
去到上海南京路步行街，
先買咗大小魔怪鐘意嘅鴨腎、蝴蝶酥等等，
仲有咸肉和鹵豬腳就今日先買，
仲有大白兔糖係童年至愛呀!
買下買下又爆喼了。
明天，
我、老公和母親大人參加關鍵旅遊，
去華東(南京無鍚上海杭州)玩6日呀!
團費$2599+機場稅項$875+保險$319，
導遊費每日$120。
專登淘咗個新喼~側開行李箱，
裝咗半滿咋，
仲有半個喼可以買嘢呀!
又到咗老公同學一年一度大閘蟹宴嘅大日子啦!
今年蟹價$116隻，
我和老公總共食咗3隻蟹，
連晚飯和蒸蟹加工費$40，
呢餐食咗$752。
今日大魔怪女朋友仔嚟食飯，
簡單3餸1湯，
香草焗燒雞、荷蘭豆炒臘腸膶腸、煎荷包蛋，
仲有羅漢果菜乾粟米紅蘿蔔煲豬骨湯，
加咗南北杏、瑤柱和蜜棗。
今晚又係簡易晚餐，
氣炸雞扒和肉碎腸仔意粉，
快靚正，
又夠飽，
啱哂我啦!
雪櫃冰箱仲有10隻大蝦，
所以今日要清嘅係蝦；
我哋一家都鐘意食粉絲，
加埋棵娃娃菜落個煲仔度，
呢個粉絲蝦煲就更豐富啦!
下星期，
我、老公和母親大人會出外玩幾日，
所以今日要開始清冰箱物資呀!
今日要清嘅係雞扒；
茄子燴雞絲，
唔記得加咸魚添，
唔係仲惹味呀!
其實我好鐘意食呢個肉碎蒸雞蛋架，
將滑蛋和肉碎撈埋落D飯度一齊食，
簡直係人間美味呀!
真係要添飯先得啦!
星期五响大亞灣買咗兩個新彊饢返嚟，
當時熱辣辣好想食，
點知小魔怪話要等埋佢先食喎；
所以等到今日，
我就整咗大大鍋咖哩牛筋腩，
用新彊饢點咖哩一齊食，
真係絕配呀!
