留家抗疫~第三日

今日除夕夜，

歡送2022，

迎接2023。

祝願大家身體健康，

快快樂樂，

世界和平!

大魔怪中招後冇哂胃口，

噚晚晚餐都冇食到，

今朝早餐我準備咗咖啡卷蛋糕和蜜糖水俾佢，

而我就食午餐肉蛋三文治。

留家抗疫~第二日

留家抗疫~第二日，

大魔怪噚日話想食雞尾包，

今朝我買咗3款麵包等佢揀，

雞尾包、菠蘿包和朱古力包$20有4個，

檸檬$10有3個，

都唔平呀!

我嘅早餐係車仔麵，

超邪惡，

唔可以成日食呀!

留家抗疫~第一日

11月30日，

小魔怪中咗新冠病毒，

佢選擇入住竹篙灣；

到12月29日，

今次輪到大魔怪中新冠病毒，

噚日佢仲好哋哋帶女朋友仔返嚟食飯，

今日佢就發燒39度和喉嚨痛，

今次佢想居家隔離，

OK，

咁我哋朱家就齊齊留家抗疫啦!

好在依家抗疫政策有變，

我哋呢類密切接觸者不再需要進行居家檢疫(禁足)，

不過咁，

為己為人，

我哋冇必要都唔會周圍走，

買完餸就快快趣返屋企，

我連早餐都唔敢出街食，

其實我都驚自己帶病毒呀!

今日我仲講笑咁話，

我就係天選出嚟為佢哋煮飯嘅人，

依家我和老公暫時冇中招，

不過病毒圍繞住我哋身邊，

中招都係遲早嘅事呀!

家常便飯

今日大魔怪女朋友仔嚟食飯，

咁啱得咁橋，

樓上陳老太整咗隻正宗海南雞請我哋食，

大魔怪女朋友仔今次有口福了。

今餐食: 海南雞、日式氣炸雞件、韓式芝士粟米餅、雜錦鍋。

咸菜黃豆胡椒豬肚排骨湯

今日去天水圍食平D買澳洲冰鮮豬肚，

豬肚最污糟嘅部份已經洗得好乾淨，

買返嚟用鹽擦一擦佢，

剪咗啲肥膏就得，

原本買一個豬肚$35，

亞姐話買多個計平我$5，

$65有2個冰鮮豬肚呀!

沙茶牛仔骨金菇粉絲煲

 

响冰箱摷到牛仔骨，

拿拿臨攞出嚟解凍，

整咗呢個沙茶牛仔骨金菇粉絲煲，

粉絲和金菇索哂D沙茶汁，

好正，

好送飯呀!

韭菜豬肉餃子

今日聖誕節，

大小魔怪都出哂街去玩，

我和老公係屋企太得閒冇嘢做，

老公話會自己出街踩單車喎!

咁我就襯佢哋全部都唔係屋企，

包定D餃子放入冰箱，

係呢個聖誕假期都有得食嘛!

今次總共包咗66隻韭菜豬肉餃子。

2022平安夜

2022平安夜，

又係得我和老公兩個人撐枱腳，

每年平安夜都有雞髀食，

原本今年都係架，

我以為冰箱有雞髀，

點知冇喎，

摷到有豬仔骨，

於是改整燒排骨呀!

聖誕平安夜大餐:

燒排骨&雞翼、炸吉列蝦、烚粟米和蘑菇粟米汁燴意粉配西蘭花。

一個人的晚餐~天水圍新北江森堡美食

今晚得我一個人食晚餐，

唔想煮就落街搵食喇!

嚟咗森堡食焗鴛鴦海鮮豬扒意粉+凍檸茶，

埋單$61，

我揀咗白汁和黑椒汁配意粉，

豬扒、炸魚柳和海鮮都唔少，

但意粉就淋咗少少，

我就麻麻哋，

叫炒飯底應該會好食D呀!

冬至快樂~雙冬羊腩煲

我前幾日已經買定3磅幾急凍羊腩，

準備今日食羊腩煲過冬至；

噚日已經炆定呢煲羊腩，

小魔怪今日WFH，

等到大魔怪放工後，

一家四口齊人，

開得飯喇!

家常便飯~春菜咸排骨蝦乾瑤柱仔煲

噚日係愉景灣買嘅有機菜，

春菜$20和韭菜$10，

今晚用佢哋嚟煮晚餐，

春菜咸排骨蝦乾瑤柱仔煲&韭菜炒蛋，

潮洲紅桃粿(綠豆餡)係大魔怪女朋友仔請我哋食架!

愉景灣至梅窩

今日我和老公約埋大伯大伯娘和姑奶，

一行5人由愉景灣出法行去梅窩；

我哋由天水圍出發，

搭屯馬線去南昌，

轉迪士尼線去欣澳站外搭巴士DB03R去愉景灣巴士總站落車。

我哋冇去白色教堂，

只去咗聖母神學院果邊，

慢慢沿海邊行，

行斜路上山，

再落千級樓梯到梅窩銀礦灣泳灘，

我哋全程行咗3個小時呀!

家常便飯，三餸1湯

小魔怪仲有幾聲咳，

今日再煲多次海底椰海星雪梨豬腱湯俾家人飲，

晚餐三餸1湯，

白飯任裝。

拜山&過冬

噚日我哋黃氏家族去拜父親大人；

一行9人拜完山後(大魔怪女朋友仔都有嚟)，

齊齊去石門彩福皇宴飲茶食午餐，

我哋9個人太有食力，

午茶都食咗$1375，

勁呀!

其實妹妹、妹夫和姨甥仔佢哋有嘢做，

已經冇嚟到，

如果嚟齊哂，

哈哈，

呢餐肯定仲貴呀!

咖哩蘿蔔炆牛腩

天氣凍凍哋，

食番D辣嘢就最啱啦!

由於老公唔食得太辣，

所以用秘撈魚蛋醬煮咗鍋咖哩蘿蔔炆牛腩，

就最啱喇!

雜錦煲

屋企個煮食爐又壞壞哋啦!

其實今年4月已經換咗個新爐頭，

點知噚日又係拆唔到出嚟洗，

即刻搵咗煤氣公司維修技術員整，

今日嚟睇咗喇!

可以免費幫我再換個新爐頭，

呢個煮食爐用咗6年，

爐頭都換咗好幾次，

每次換都約$500~600，

老公話如果下次再壞，

買個新煮食爐好過喎!

今晚得番一個爐頭煮飯，

又見依家天寒地凍，

整煲熱辣辣嘅雜錦煲嚟食，

一煲過，

快靚正呀!

好殘忍呀~臘味煲仔飯

 

今日香港天氣好鬼凍，

而且仲落埋雨，

全日氣溫都係11~12度左右(天水圍)，

聽講週末仲會再凍D十度或以下；

今日我落街已經著重裝備，

睇嚟要摷番條冷頸巾出嚟保暖先得。

天氣咁凍，

梗係要整個超級殘忍嘅煲仔飯嚟嘆下啦!

臘味煲仔飯有臘腸、潤腸和臘鴨髀，

全部都係老公至愛呀!

灼埋碟菜就開得飯喇!

鹽酥雞扒

鹽酥雞扒，

炸到脆卜卜，

真係會食得唔停得口架!

椒鹽豬頸肉

今日去急凍舖買咗2塊豬頸肉，

揀咗比較薄身嘅豬頸肉，

因為易煎熟呀!

屋企仲有幾個彩椒仔，

用嚟佢嚟整呢碟椒鹽豬頸肉；

哈哈，

個人覺得彩椒好食過豬頸肉呀!

海底椰海星雪梨豬腱湯

自從小魔怪感染新冠病毒後，

佢總有幾聲咳，

冇痰乾咳!

襯今朝大小魔怪都係屋企食午飯，

一早煲咗呢個海底椰海星雪梨豬腱湯，

呢個湯有化痰止咳，清熱潤肺，解毒散結等功效，

啖湯超甜香濃，

正呀喂!

白汁蘑菇雞絲意大利寬麵

 

今日午餐食白汁蘑菇雞絲意大利寬麵，

煮咗一大鍋，

我哋一家四口子竟然食得哂，

哈哈，

可見我哋真係好大食，

不過唔包括我，

其實我好細食架!

茄子雞蛋醬(素食)

茄子雞蛋醬(素食)，

做法真係好簡單，

用咗黃豆醬、蠔油、豉油、老抽和糖嚟炆茄子，

炆到茄子淋哂後

加埋滑蛋撈佢，

灑上蔥花炒勻，

撈飯、撈麵和拌粥食都唔錯架!

小魔怪返屋企啦!

今日，

小魔怪終於可以返屋企啦!

好彩我一早買定材料煲湯，

仲炒咗個雪菜肉絲炆米粉俾佢做午餐；

晚餐就叫番上次食過嘅漢堡，

佢係竹蒿灣冇啖好食，

瘦咗一個碼，

要食番D好嘢補番先得。

今日出關啦!

今日係居家檢疫第七日，

一早我哋自我檢測陰性後，

就可以出關啦!

隔離期間大魔怪係WFH，

今朝就拿拿臨去返工，

佢出去走動走動都好嘅，

不過我提醒佢要注意衛生，

我唔想再俾人困係屋企7日呀!

今朝我要去健康院覆診，

早早落街呼吸新鮮空氣，

好爽呀!

七日居家檢疫~第六日

 

今日係居家檢疫第六日，

我哋3個人自我檢測陰性，

只要明天我哋自我檢測都係陰性嘅話，

就可以出關喇!

由於我明天要去健康院覆診攞藥，

所以我專登打居家抗疫熱線~1833019，

問清楚只要我哋連續有兩日陰性報告，

就可以離開檢疫地方和家居，

熱線工作人員叫我放心，

我哋可以自由出街時，

聽到個心都安樂哂；

不過小魔怪就冇咁好彩，

佢今日自測都係兩條線~陽性，

冇得離開竹蒿灣，

唔知佢仲要捱多幾多日先可以出得番嚟。

七日居家檢疫~第五日

居家檢疫第五日，

仲有兩日如果大家平平安安健健康康嘅話，

我哋就可以出關架喇!

堅持住，

加油呀!

早餐~餐肉蛋三文治+美祿。

午餐~黃芽白炒肉片+蕃茄炒蛋。

七日居家檢疫~第四日

今日係居家檢疫第四日，

姑奶幫忙買嘅新鮮物資到家了，

真係唔該哂呀!

菜芯、蕃茄、薯仔、豬肉、提子、香蕉、薑，

仲有麵包和豬肉乾(好想食)。

七日居家檢疫~第三日

我平時7點左右就會落街晨運、買餸和食早餐，

依家就咩都冇得做，

唯有係屋企fing手fing腳、郁身郁勢呀!

今朝早餐食快熟通粉，

都唔錯架!

七日居家檢疫~第二日

小魔怪噚日入咗竹蒿灣，

今朝食完早餐後，

我和老公即刻拿拿臨，

入佢房間做大清潔，

洗哂佢間房外掛嘅衫、牀上用品，

抹完成間房後，

我又要洗埋個廁所，

真係攰到唔想郁呀!

午餐簡單煎午餐肉和西蘭花炒蝦仁，

大魔怪仲笑我咁快食戰爭物資呀!

早餐~焗菊花茶+炒滑蛋(2隻)+白麵包

七日居家檢疫~第一日

噚日小魔怪確診後，

佢即刻上報衛生署，

我哋一家四口隔咗2個鐘頭後就收到居家檢疫令，

未來七日我哋要進行自我健康監察，

而小魔怪今日下午五點半左右，

衛生署安排佢入咗竹篙灣呀!

屋企適合佢帶入隔離營嘅物資(食物)唔多，

我已盡力了。

黑色星期三

2022年11月30日，

今日係我嘅黑色星期三，

今朝落街攞免費報紙時，

竟然俾我遇到人生第一次困𨋢，

被困30分鐘後，

感覺心力交瘁呀!

點知，

小魔怪下午3點幾4點話發燒38.5度，

快速抗原測試陽性，

佢嘅病症係發燒、咳和喉沙，

我、老公和大魔怪就暫時都仲有一線生機；

唔理咁多，

老公和我即刻分頭去入貨，

未來七日要困係屋企，

加油呀!💪💪💪

生病晚餐~薯絲炒肉碎

今日唔知發生咩事，

大小魔怪兩個人都攞咗半日病假返屋企，

拿拿臨即刻幫佢哋做快測，

好彩佢哋都係一條線；

晚餐煲咗咸蛋皮蛋瑤柱肉碎粥，

炒埋一大碟肉碎炒薯絲，

簡簡單單又一餐呀!

滷牛腱牛肚

星期六已經滷定呢煲牛腱牛肚，

噚日已經分咗2餐嚟食，

今朝將食剩嘅牛腱牛肚(連汁)，

煮咗一大碗河粉，

終於食得哂喇!

豆卜魚腩魚頭煲

 

上次炆魚頭，

小魔怪話冇魚肉食喎!

所以今日買咗1舊魚腩和1個魚頭，

炆咗個豆卜魚腩魚頭煲，

大小魔怪食哂D魚腩，

而我和老公就食魚頭，

各有所好呀!

金銀蛋菠菜燴肉碎

 

今日菠菜苗$16斤，

買咗$10嚟煮金銀蛋($11有4隻)，

再加多$15豬肉碎和1小盒清雞湯，

煮埋一大碟都唔使$40，

但出街食嘅話起碼要$100蚊，

講到底都係自己煮慳好多呀!

清補涼豬腱湯

今晚得我和老公兩個食飯，

煲咗老公至愛嘅清補涼豬腱湯，

買咗$50豬腱肉，

落咗1包清補涼，

加咗圓肉1湯匙、瑤柱5粒和蜜棗2粒，

煲1.5小時，

落鹽調味後就有得飲喇!

我食咗一大碗薏米，

飽哂呀!

沙薑雞

今日去佳寶買嘢，

啱啱見冰鮮雞到貨，

揀咗隻清遠雞$60，

隻雞有成3磅幾，

一D都唔細隻呀!

去雜貨舖買包沙薑粉，

今晚食沙薑雞!

蒸到啱啱好，

隻雞都幾滑架!

瑤柱腿蓉燴旺菜

記得上次用咗8粒瑤柱嚟整碟瑤柱腿蓉燴旺菜，

老公話好好食但好敗家囉!

今次就用咗2粒瑤柱嚟煮，

而且冇落清雞湯煮菜，

唔知仲好唔好味呢???

豉油皇煎蝦

摷到雪櫃仲有磅幾蝦係度，

簡單煮咗碟豉油皇煎蝦，

我唔敢食太多，

因為最迎濕疹又發作，

好鬼痕呀!

客家蔥油鹽焗手撕雞

我見好耐冇整手撕雞嚟食，

今朝買咗隻冰鮮雞$60，

用鹽焗雞粉醃佢大半日，

蒸完拆肉，

淋上客家蔥油，

炒埋碟菜就開得飯架啦!

一年一度大閘蟹宴

一年一度大閘蟹宴又嚟喇!

噚晚入咗錦綉花園會所食大閘蟹；

每年大閘蟹都係老公舊同學訂架!

今年嘅蟹有7兩重，

約$130隻加工費$30，

呢餐我和老公兩人食咗3隻蟹，

加埋晚飯$750。

冬菇蝦米肉碎炒粉絲(螞蟻上樹)

 

我都好耐冇整炒粉絲，

見今日有碗豬肉碎係雪櫃，

拿拿臨搵齊材料整嚟食囉!

我哋成家都鐘意食粉絲，

所以今次我浸咗好多粉絲呀!

蘿蔔蝦皮雞蛋湯

呢排街市有幼身蘿蔔賣，

買咗1條嚟煮蘿蔔雞蛋湯，

加咗少少蝦皮落去一齊滾呀!

我和老公2個人，

連湯連渣，

每人飲咗2碗，

簡單、鮮甜又美味呀!

雜糧&外賣

平時如果得我和老公兩個人食飯，

我好多時都會簡簡單單煮粉麵食架!

所以冰箱通常都會有雜丸，

而雪櫃就一定有菜芯，

肉就未必成日有喇!

冇肉咁點算???

落街去商場買盒兩餸飯囉!

$41盒唔貴喎，

最鐘意食佢哋嘅酸菜豬肚，

佢哋嘅酸菜豬肚唔係咸，

而係甜架!

好惹味好送飯架!

咖哩洋蔥薯仔炆雞翼

雪櫃仲有十幾隻雞翼，

一次過煮哂佢好似好多咁，

留番幾隻我又唔想，

到最後我都係煮哂佢，

食唔哂留明天食物，

到時我就可以煮少樣餸啦!

沙茶肥牛金菇粉絲煲

今晚食番噚晚打邊爐食剩嘅嘢；

專登買咗樽沙茶醬嚟打邊爐，

沙茶醬係打邊爐必備嘅調味醬之一，

我好鐘意沙茶嘅香味，

用嚟左溝溝右溝溝(麻辣油、豉油、麻油)，

整碟美味調味嚟打邊爐就very good!!!

今日就用佢嚟整咗個沙茶肥牛金菇粉絲煲，

加埋白灼蝦和灼菜芯，

開得飯啦!

烚下烚下

今晚大魔怪帶埋女朋友仔一齊返嚟食飯，

佢哋話想打邊爐，

大魔怪女朋友仔仲專登去大埔買咗振興牛丸請我哋食呀!

今朝我去街市買哂所有材料，

 

煲埋煲五指毛桃海底椰粟米紅蘿蔔做湯底，

開得飯喇!

紅燒花生豬手

今朝我去街市買咗隻冰鮮豬手$45，

摷下屋企仲有半碗花生，

加埋罐啤酒，

炆咗一大鍋紅燒花生豬手。

豉汁排骨蒸飯

噚日我掛住上網打機，

攪到唔記得煮飯呀!

為咗加快有飯食，

拿拿臨整個蒸飯，

飯餸一齊煮，

蒸完飯嘅熱水就用嚟灼菜，

一D都唔嘥呀!

粟米蛋花肉碎湯

大魔怪放工返嚟話想飲湯，

罐頭粟米湯都話OK呀!

好彩屋企仲有半碗醃咗嘅豬肉碎，

加埋隻雞蛋，

熱辣辣粟米蛋花肉碎湯有得飲喇!