留家抗疫~第一日

11月30日，

小魔怪中咗新冠病毒，

佢選擇入住竹篙灣；

到12月29日，

今次輪到大魔怪中新冠病毒，

噚日佢仲好哋哋帶女朋友仔返嚟食飯，

今日佢就發燒39度和喉嚨痛，

今次佢想居家隔離，

OK，

咁我哋朱家就齊齊留家抗疫啦!

好在依家抗疫政策有變，

我哋呢類密切接觸者不再需要進行居家檢疫(禁足)，

不過咁，

為己為人，

我哋冇必要都唔會周圍走，

買完餸就快快趣返屋企，

我連早餐都唔敢出街食，

其實我都驚自己帶病毒呀!

今日我仲講笑咁話，

我就係天選出嚟為佢哋煮飯嘅人，

依家我和老公暫時冇中招，

不過病毒圍繞住我哋身邊，

中招都係遲早嘅事呀!

準備咗退燒藥和消炎藥俾大魔怪食，

佢一路係咁瞓，

瞓到中午先起身食早餐兼午餐，

食咗一碗粥、少少蛋和午餐肉，

食飽又瞓，

連打機都冇力，

好在佢肯飲暖水，

唔會喉乾呀!

晚餐佢都係食粥，

加少少菜和排骨，

佢話想食雞尾包，

我明日落街先買俾佢食囉!

依家每次大魔怪去完廁所，

老公都會做深層大清潔，

大家齊齊努力，

希望可以大魔怪好快好番啦!

 

大家可以入嚟Facebook讚下我新開嘅Fans專頁呀! 

雀后(添飯)Facebook Fan Page