一年一度大閘蟹宴

噚晚又係老公同學一年一度大閘蟹宴，

每年都係錦繡花園俱樂部食晚飯；

今年大閘蟹重8兩左右，

連加工費每隻$155(其$40隻加工費)，

我和老公每人食咗1隻蟹，

拎咗一隻留俾細仔隻，

總共要咗3隻大閘蟹，

加埋其他餸菜，

我哋兩個人呢餐食咗$714。

蒸飯

前兩日涼涼哋，

老公話想食臘腸，

所以整咗兩餐蒸飯俾佢食，

臘腸膶腸肉片蒸飯和臘腸馬蹄魷魚蒸肉餅飯，

蒸飯真係好簡單，

快靚正架!

母親大人的近況

母親大人搬離舊居已經有十日，

今日我專登入馬鞍山新居探望佢，

佢話呢度空氣好好，

日日落街去公園做運動，

又行去附近街市買餸，

佢對新環境都好滿意呀!

中午同母親大人去烏溪沙飲茶，

呢餐食咗$177。

食飯盒

上兩星期忙於幫母親大人抹屋和搬屋，

攪到我都冇咩時間煮飯呀!

做到夜晚返屋企，

就順便買個飯盒同老公兩個人食；

早出晚歸返到屋企都唔想煮，

就買兩個餸返去，

預早叫老公洗定米煮飯，

咁又一餐架啦!

螞蟻上樹~冬菇蝦米肉碎炒粉絲

 

今日買咗1斤散裝粉絲，

浸咗部份用嚟炒粉絲，

我可以粉絲當飯食，

真係食極都唔厭架!

養生壺~竹蔗茅根雪梨湯

 

之前淘咗個竹蔗茅根雪梨湯包，

襯今日天氣乾燥，

兼細仔WFH，

就拿拿臨煲湯滋潤湯水俾大家飲啦!

呢個湯包有2小包，

材料好簡單，

竹蔗、茅根、雪梨乾、海底椰、無花果、和蜜棗，

我開咗其中一包加多4片雪梨乾，

落咗$35豬腱，

用養生壺煲湯功能煲70分鐘，

煲完落鹽調味就飲得啦!

冬瓜豬肉一鍋出

今日整咗冬瓜豬肉一鍋出，

首先買舊靚靚梅頭肉和1斤冬瓜，

然後先滾個冬瓜豬肉湯底，

撈起梅頭肉切片整蒜泥白肉，

再加幾粒豬肉丸和牛丸係冬瓜湯內煮滾，

加蔥粒、鹽和胡椒粉調味，

咁就有鍋冬瓜丸子湯飲啦!

呢個組合有湯有菜又有肉，

真係好方便我呢個懶人煮飯婆呀!

從未如此清爽過

 我幾個月冇去剪頭髮，

白頭髮長咗好多啦!

今早9點去到髮廊，

剪頭髮、顏色焗油、頭髮挑染等等，

差不多1點半左右完成呀!

今次決定再剪短髮，

好清爽架!

頭髮挑染我揀咗紫色，

整完幾靚喎!

養生壺~沙參玉竹蓮子百合淮山麥冬煲西施骨

 

今日用養生壺煲湯，

沙參玉竹蓮子百合淮山麥冬煲西施骨，

我仲加咗瑤柱、蜜棗、圓肉和杞子，

兩個人份量，

啖湯好濃郁，

好滋潤架!

蝦醬粉絲蒸豬肉

 

今朝去街市買咗舊靚靚梅頭肉，

帶有少少肥架!

我將佢一分為二，

肥肥嘅肉就用嚟蒸蝦醬，

加粉絲墊底，

嘩，

香噴噴到不得了，

唔添飯都唔得啦!

瘦肉都唔嘥，

用嚟蒸梅菜就最啱喇!

幫母親大人搬屋

 

今日姐姐姐夫、老公和我4個人，

幫母親大人搬屋；

我哋出發去沙田時沿途落大雨，

好彩我哋開始搬嘢時雨停了；

將所有嘢搬入屋後，

我哋就開始幫母親大人將物品放入衣櫃，

唔執都唔知母親大人好多衫褲，

仲要係好多款色都係差不多，

真係對格仔和花花情有獨鍾呀!

食飽飽又繼續幫母親大人執屋，

我哋攪到差不多黃昏先返屋企呀!

告別新翠&禾輋海港酒家

母親大人明天要搬屋啦!

新翠村陪伴我們黃氏一家人的成長，

有笑有淚；

離別之前，

齊齊影張大合照，

照片上有父親大人和我哋一家人，

充滿懷念和不捨。

南乳蓮藕木耳炆腩排

 

噚日炆咗一大鍋南乳蓮藕木耳炆腩排，

以為可以食兩餐，

點知有細仔係度，

食剩少少蓮藕和木耳，

哈哈，

佢名副其實係一位食肉獸嚟架!

雜菇炒牛肉

 

買咗少少杏鮑菇和秀真菇，

咁啱雪櫃牛仔肉，

用佢嚟炒牛肉都幾搭喎，

夠哂我和老公兩個人食。

全日等送家電

 

今日陪母親大人去新家等送家電，

真係一個好艱辛嘅任務嚟架!

因為等到家電送嚟又唔一定係今日安裝，

尤其今日要裝煤氣爐、煤氣錶、煮食爐、抽油煙機，

點知煮食爐和抽油煙尺寸有問題要換，

而煤氣錶位又唔夠位裝，

我哋拿拿臨落街搵其他裝修公司，

睇下有冇工人幫手拆櫃裝錶，

好彩有個裝修公司姐姐即刻幫我哋解決呢個大難題。

之後又要安排換煮食爐和如果解決裝抽油煙機嘅問題。

黃昏又要等送雪櫃和洗衣機，

今日整日都係等等等，

好攰架!

晚餐要食好D，

去咗沙田唐宮小廚。

(母親大人新家公園有野豬仔)

雪梨海底椰海星煲豬腱

 

每次去雲泉仙館買咗湯包

$50有3包，

真係好抵架!

今次我剩係買舊豬腱放落去一齊煲，

啖湯一樣咁甜呀!

呢個湯有化痰止咳，清熱潤肺，解毒散結等功效。

閒話家常

母親大人新居所已經裝修9成，

仲有少少工程要執手尾呀!

今日我、老公和母親大人3個人，

過去新屋做大清潔，

雖然屋仔細細，

但我哋忙咗幾個鐘就停手，

因為新裝修D塵越抹越有，

要慢慢做真係唔急得架!

呢個星期四我會陪母親大人等家電，

到時再做下清潔，

希望下星期就能由大圍搬到馬鞍山啦!

午餐就去新屋樓下餐廳食，

叫咗2份餐3個人食，

呢餐食咗$111；

我哋行咗去恆安街市買盆栽消甲醛，

又買咗個小型吸煙機吸塵，

可惜漏咗帶叉電插頭，

用唔到呀!

冬菇栗子炆雞

 

今日見到菜檔有桂林錐栗子賣，

用佢嚟炆雞或排骨就最啱喇!

咁啱細仔中午係屋企食午飯，

煮碟冬菇栗子炆雞俾大家食下啦!

蘑菇雞肉意粉

大仔和細仔去日本旅行，

我都會叫佢哋買意粉醬俾我做手信呀!

因為我鐘意食呢款意粉醬，

每次用一包，

整意粉就簡單又好味道喇!

湯包~石斛洋參煲西施骨

 

最近係淘寶淘咗D湯包，

今日就用佢嚟煲湯，

石斛洋參炖排骨湯料，

一包有100g，

都幾足料喎!

下次煲其他湯包先得。

全部材料加10碗水煲2小時(滾後中小火)，

湯包紅棗太細粒，

我轉咗落大紅棗因為易去核呀!

梅菜豬肉蒸飯

屋企個西施電飯煲都幾大個，

兩個人每餐食一杯米真係好難煮架!

又唔想食隔夜飯，

所以呢排我都係蒸飯嚟食，

今晚就煮咗梅菜豬肉蒸飯，

灼碟菜就食得喇!

幫手湊孫

10月17日~10月20日呢4日，

我入咗大埔幫手湊孫仔呀!

平日大仔和新抱仔返工，

孫仔都係婆婆湊的，

但由於婆婆近日有事，

大仔和新抱仔又各自有自己嘅事忙，

所以我就幫手照顧幾日喇!

晚餐第一次自己揸住條菜芯食，

哈哈，

佢總共食咗5~6條咁多呀!

(食菜莖唔食葉)

重陽登高&士林台灣麵

 

襯今日星期六，

我哋朱家約埋一齊重陽登高拜山，

舊居附近有工程，

搭咗鐵樓梯上山，

咁我哋就唔便爬山爬上去喇!

拜山後，

我、老公和細仔揸車落元朗食士林台灣麵，

真係好耐冇嚟食喇!

好彩都維持到應有水準。

惠州行4日3夜

10月13日星期二

今日我和老公搭大巴返惠州，

先係蓮塘口岸食早餐，

再係屋企附近食午餐。

粉嶺坪輋雲泉仙館&九寶海鮮酒家

今日大伯、大伯娘、老公和我，

4個人去粉嶺坪輋雲泉仙館，

為朱家祖先上牌位，

未開始儀式前，

我去咗後面檔口買湯包和零食；

之後，

我哋去咗錦绣花園附近間新酒樓飲茶，

呢餐4個人食咗$312。

五指毛桃海底椰螺頭豬腱湯

 

今日靚湯～五指毛桃海底椰螺頭豬腱湯，

配紅蘿蔔粟米南北杏蜜棗瑤柱，

呢個湯有有健脾潤肺、滋陰潤燥、化痰止咳等功效架!

豉汁排骨蒸飯

 

兩個人食懶得煮太多餸，

整個蒸飯就最方便喇!

之後用蒸飯嘅滾水嚟灼菜，

咁就唔使再開火啦!

外賣~雞少雞飯

 

今日細仔WHF，

老公又去咗踏單車，

嘻嘻，

我就懶得煮午飯啦!

細仔話叫外賣，

佢話想食清D喎!

揀咗叫Keeta~雞少雞飯，

海南雞拼豬頭肉餐包湯和菜，

豬頸肉蝦摻摻湯麵和凍檸檬茶，

呢餐有優惠$50，

總共食咗$132.3。

第一次叫呢間海南雞外賣，

我個人覺得好食喎!

雞好滑，

豬頸肉又爽口，

摻摻麵係油麵和米粉混合，

湯底有長豆腐卜

第一次食，

好特別呀!

豆角薯仔炆排骨

今日又係簡單一鍋煮，

豆角薯仔炆排骨，

我和老公都鐘意食炆到好腍嘅豆角和薯仔，

加埋腩排一齊煮，

咁就更有豐富啦!

尖沙咀稻香(恆星樓)

 

Antia由英國返咗香港，

今晚約咗12人，

出嚟一聚一聚，

Lingling揀咗去尖沙咀稻香(恆星樓)，

呢餐係廚師發辦嘅海鮮餐平均$350位，

汽水啤酒小食任飲任食，

最後連貼士總共$370位，

碟碟份量好足夠，

最後都係食唔哂，

要打包拎返屋企呀!

生菜魚肉湯

今日朝早我要去健康院覆診，

下午又要去屯門醫院睇婦科，

左等等右等等，

咁就一日時間冇哂啦!

簡單滾咗個生菜魚肉湯，

清清哋都唔錯架!

探孫仔

星期日入咗大埔探孫仔，

佢自從識行後，

佢鐘意爬梳化，

又鐘意捐嚟捐去，

依家咩都想擺落口，

真係睇少眼都唔得架!

晚餐我整咗南乳蓮藕炆豬腩肉，

順便整埋蒜泥白肉、菜脯炒蛋，

新抱仔就整咗蒜蓉粉絲大蝦煲，

加多碟灼西蘭花，

開飯啦!

大仔好耐冇食我煮嘅餸，

佢話呢餐好好食呀!

外食

國慶節去沙田之前，

我、老公和細仔3個人，

去屋企樓下新北江商場食先午飯，

細仔揀咗食印尼菜，

呢間舖仔細細得幾張枱，

細仔話係灣仔果邊食要成$80~$90左右，

呢度大約$50~$55左右，

呢餐食咗$187，

細仔和我都覺得好好食。

姨甥仔生日會

 

噚日國慶假期，

我哋齊齊入沙田慶祝姨甥仔亞諾28歲生日，

地點在妹妹妹夫家舉行；

姐姐和妹妹準備咗餐前小食；

大人打麻雀，

其他人就玩紙牌，

就連最小嘅朱鎧仁小朋友都有參與架!

晚餐叫外賣，

姐姐整咗滷水雞翼，

而我就整咗盆臘味糯米飯過去一齊食；

食生日蛋糕後，

大人繼續打牌，

其他人就入咗姨甥女祈祈房彈琴，

朱鎧仁小朋友又彈琴又跳舞，

玩得好開心呀!

鮮茄紅酒燴牛肋條

 

細仔晚上進修紅酒課程，

近排工作應酬和朋友聚會多，

所以佢間中會拎唔同牌子紅酒回家，

開蓋紅酒唔放得耐，

我就用佢其中支紅酒，

整咗鮮茄紅酒燴牛肋條。

今次用中西合壁做法，

冇專登去買茄膏又冇落香葉，

不過食落又真係幾好味道喎!

冬菇炆蠔豉

 

响冰箱摷到半包蠔豉，

應該係過年時買落嘅，

拿拿臨浸埋冬菇，

整咗呢碟冬菇炆蠔豉，

用埋生菜墊底，

哈哈，

好似食緊過年餸一樣呀!

炸雞

今日用咗2塊雞扒嚟整炸雞，

氣炸鍋整冇咩油煙，

感覺唔太熱氣添；

簡單用豉油、鹽、糖、生粉，

薑蓉和紹酒醃隔夜，

撲少少蕃薯粉落D雞扒度，

用氣炸鍋190度氣炸20分鐘，

反轉另一面氣炸多15分鐘，

最後點少少辣椒粉拌食，

真係好惹味架!

青紅蘿蔔粟米螺片煲西施骨

噚日中秋節和今日嘅追月日，

大仔細仔特別多節目，

由於之前已經食咗做節飯，

所以呢兩日，

我和老公靜靜留係屋企都唔錯架!

今日煲咗湯，

青紅蘿蔔粟米螺片煲西施骨，

滋潤又好味道呀!

生炒臘味糯米飯

老公話好耐冇食過糯米飯，

我見包糭時仲剩半包糯米，

即刻買齊材料，

整咗一大盆生炒臘味糯米飯。

近期食D咩

近期食D咩，

都係家常菜，

最緊要係簡單易做，

兩個人食飯，

唔使下下食得好豐富架!

沙爹牛肉粉絲煲

細仔噚日WFH，

晚餐整咗沙爹牛肉粉絲煲，

今次除咗加咗沙爹醬外，

我仲加咗花生醬和少少清雞湯，

咁個沙爹湯底就更加濃郁啦!

養生壺~雪梨乾無花果淮山湯

 

今日用養生壺煲咗呢個雪梨乾無花果淮山湯，

材料豬腱、雪梨乾、無花果、鐵棍淮山、

麥冬、南北杏和杞子，

呢個湯有清熱潤肺、止咳祛燥、健脾益氣等功效，

最適合秋天飲用架!

提早慶中秋

 

噚日，

我哋和親家奶奶兩家一共8 人，

齊齊提早慶中秋，

我炆咗一鍋鮑魚金蠔冬菇花膠鴨腳，

醉雞翼火雞腎，

新抱仔就煲咗個靚湯~花膠螺頭鷓鴣湯，

親家奶奶就買咗燒肉、蝦和魚，

加埋菜和酸齋添!

飯後有芝麻和花生湯丸、月餅和水果。

沙參玉竹蓮子百合淮山麥冬豬腱湯

 

今日煲咗沙參玉竹蓮子百合淮山麥冬豬腱湯，

配埋圓肉、蜜棗和瑤柱，

呢個湯有滋陰潤燥、健脾安神等功效，

最啱呢個時候飲架啦!

惠州3日兩夜

9月14日星期一

我和老公兩個人返惠州喇!

到惠州後，

簡單食咗個燒味飯就返屋企打掃啦!

入伙大吉

大仔和新抱仔新屋入伙，

我哋一家和親家奶奶齊齊去新屋慶祝下，

雖然佢哋間屋仍然笠笠亂，

但基本傢具和電器都有齊，

朱鎧仁小朋友最開心，

一盒檸檬茶都玩得好開心呀!

今晚晚餐叫外賣，

我就整咗盒醉雞翼過去一齊食。

食飯盒

呢排我好乖架!

差不多日日都有煮飯，

但總有偷懶嘅時候，

所以買兩餸飯係我哋最佳選擇呀!

朱鎧仁小朋友1歲生日

 

今日係朱鎧仁小朋友1歲生日喇!

我哋兩家人一齊食飯兼切蛋糕，

祝孫仔健健康康，

開開心心，

快高長大。

薯仔炆雞翼

細仔自己去咗日本旅行，

所以呢排都係得我和老公兩個人食飯，

炆咗一大碟薯仔炆雞翼，

炒多碟菜就開得飯喇!

養生壺~石斛淮山湯

 

今日又用養生壺煲湯，

石斛淮山湯有瘦肉、石斛條、淮山、麥冬、蓮子、

百合、茨實、龍眼肉、杞子和蜜棗，

呢個湯有健脾補腎、養生安神、滋陰潤燥等功效(AI資料)。