拜山日

噚日，

黃氏家族去拜祭父親大人，

之後就去沙田第一城飲茶~壹匯，

10個人食咗$1262，

都幾誇張呀!

蕃茄雞蛋煮豬肉碎

 

老公鐘意食蕃茄，

每次煮呢個餸，

一定要煮多少少飯，

因為佢鐘意撈埋蕃茄蛋送飯，

今次加埋豬肉碎落去煮，

一個餸有蔬果、雞蛋和肉，

夠哂營養啦!

簡單食

由於手腕傷口，

醫生話右手盡量唔好用力、屈曲和扭動，

所以好多嘢都唔做得；

大腿罅傷口附近開始瘀青嚴重，

仲有少少剌痛，

又唔似係發炎，

所以依家我連晨運都停咗，

只係落街買少少餸和食完早餐就返屋企，

依幾日煮下粉麵食就最簡單喇!

休養的一天

 

我做完心導管檢查後，

由於大腿罅個傷口每行一步路都感到好痛，

所以星期六我係床度瞓咗一日，

邊度都唔想去呀!

今日星期日，

傷口雖然仍有痛，

但都可以慢慢行呀!

大仔一家入嚟天水圍嚟探我，

先去會所餐廳飲茶，

晚上我煲咗西洋菜咸鴨腎湯和整咗碟雲耳拍青瓜，

外賣燒味道~燒肉和燒鴨，

仲有外賣pizza和雞翼。

細仔今日爭住抱朱鎧仁小朋友，

佢今日好乖，

完全冇喊，

食糊仔時仲好好笑容添呀!

好彩定唔好彩

 

今日去醫院做心導管檢查，

如果發現血管狹窄有阻塞嘅話就要即時做通波仔手術；

導管通常由手腕又或大腿罅穿刺插入，

唔好彩嘅係，

由手腕局部麻醉插入導管，

點知我嘅血管比較幼，

插入失敗，

於是再由大腿罅局部麻醉插入導管，

注射顯影劑再照X光檢查；

兩個傷口，

手腕唔痛，

但大腿罅就痛到行唔到路；

好彩嘅係，

醫生話我心臟血管阻塞約40%，

血液流通正常，

不需要做通波仔手術，

(通常高於70%就要即時做手術)

醫生建議繼續服藥、健康飲食、常做運動等。

早餐禁食，

12點食咗1.5份三文治，

出院後晚餐叫外賣食粥呀!

蒜頭豆豉炆釀苦瓜

 

响惠州買咗兩條幼身苦瓜，

整咗老公最鐘意嘅蒜頭豆豉炆釀苦瓜，

今次用全豬肉餡，

食落都唔錯架!

養生壺~花旗參蓮子百合麥冬煲豬腱

 

今日用養生壺煲花旗參蓮子百合麥冬煲豬腱，

配埋圓肉和蜜棗，

呢個湯有清熱降火、滋陰潤肺、補氣養陰等功效，

適量常常熬夜、虛火盛、口乾舌燥、乾咳少痰人士。

清明拜山日

今日朱家拜山日，

我留家休息，

順便買定午餐俾大家食，

之後就去大埔探朱鎧仁小朋友，

佢就嚟7個月，

開始認人喇!

見到我哋又喊又笑，

好攪笑呀!

難得3姐妹伉儷齊齊返惠州

4月3日(星期五)

原本呢個復活節假期，

約咗姐姐姐夫和妹妹妹夫一齊返惠州玩3日，

但因健康我和老公臨時取消返去惠州，

佢哋照原定計劃繼續行程；

但直至下午3點45分，

我見身體都冇咩問題，

決定和老公一齊返惠州，

經羅湖返到惠州已經7點左右，

約埋一齊食晚飯。

新形象，新髮型，短髮

 

今日我的起心肝去剪頭髮，

想轉轉新形象，

叫髮型師幫我剪個新髮型，

呢個髮型真係好未剪過~短髮，

兩耳鏟青，

髮尾留髮根但界出梯級造形，

原來我剪短髮都幾好睇喎!

冬瓜粟米肉粒湯

原本想滾冬瓜粒湯，

但唔記得買咸蛋，

即刻改煲冬瓜粟米肉粒湯，

一樣咁好飲呀!

摷到雪櫃有4隻雞腳，

加埋落去一齊煲，

食得唔好嘥；

細仔中午臨返工前飲完一大碗湯，

佢話好飲好好飲呀!

節瓜粉絲煮蝦米

 

上星期我係惠州買咗蝦米仔，

今日就用佢嚟煮節瓜粉絲煮蝦米，

我至愛食粉絲，

可以當飯食都得呀!

蕃茄炒蛋

 

由於仲有十零日我就要做通波仔手術，

所以呢排要食清D，

簡單一碟蕃茄炒蛋都可以餸到飯架!

緊急狀況

噚日我、老公和細仔返咗惠州，

佢第一次返新屋，

同佢辦咗屋苑門口嘅人面識別，

又加埋屋企門口指紋鎖，

咁佢就可以隨時帶朋友返去玩喇!

午餐去百合里牛肉火鍋，

叫咗個4人套餐，

美團團購價￥247.72，

再點多支王老吉￥20，

去大眾點評打咭送菊花茶1罐，

呢餐食咗￥266.72。

覆診的一天

  

因為遲下要做通波仔手術，

所以今日要去天水圍醫院覆診見醫生，

一早同老公去大快活食早餐，

8點前去到醫院登記，

護士話醫生冇咁早到，

我叫老公和細仔11點後再嚟過；

其間要抽血和做心電圖，

中間派水和三文治俾在場等見醫生嘅病人；

醫生嚟到差不多1點鐘，

我聽完醫生講解手術流程和風險，

攞埋藥和交費後，

細仔車我去食嘢~嘉湖刀削麵。

晚餐就簡單煮咗雲吞和餃子喇!

茄子炒肉碎

買咗1扎幼茄子$4，

真係好抵呀!

加埋肉碎炒埋一碟，

咁毫有菜有肉喇!

惠州一日遊

噚日3月24日，

我帶隊一行9人去惠州飲飲食食，

搭永東巴士去惠州康帝酒店落車，

第一個景點惠州西湖，

到此一遊，

仲食咗兩份煎包，

去到手信街又買咗4件亞嘛叫大家一齊食，

買咗唔少梅菜和海味。

韭菜豬肉雞蛋餃

我見好耐冇包餃子，

今日即刻買齊材料包咗52隻餃子嚟食，

咁啱細仔今日WFH，

佢有口福啦!

食剩咗嘅餃子放凍箱，

隨時都有得食喇!

自助餐~九龍海逸君綽酒店

 

噚日姐姐又請食自助餐，

我哋揀咗舊年去過嘅九龍海逸君綽酒店，

不過大家都覺得舊年嘅食品好食過今年呀!

適逢大仔、細仔和老公都係3月生日，

我哋噚日請酒店準備咗3個小蛋糕，

大家一齊唱生日歌，

好開心呀!

家常便飯

今日又係得我兩老食晚飯，

簡單煮咗兩個餸，

娃娃菜炒肉片和麵豉蒸排骨，

唔講咁多，

開飯啦!

雜錦粉絲鍋

今日整咗雜錦粉絲鍋，

全部都係屋企雪櫃有嘅丸丸

我買咗娃娃菜、瘦肉和粉絲，

再加半盒清雞湯，

煮起一大鍋，

簡單又好味道呀!

XO醬西蘭花炒蝦仁

 

今次買咗西蘭花苗嚟炒，

我個人覺得西蘭花苗比較爽口，

加埋XO醬蝦仁，

呢個餸好惹味呀!

黑椒洋蔥牛仔骨

 

我呢排冇咩胃口，

都唔知煮咩餸俾老公食，

摷到冰箱有牛仔骨，

即刻煮碟黑椒洋蔥牛仔骨，

做咗今日嘅晚餐呀!

養生壺~花旗參麥冬蓮子百合煲豬腱

細仔去咗韓國旅行，

得番我和老公兩個人食飯，

簡單用養生壺煲咗個湯，

花旗參麥冬蓮子百合煲豬腱，

配上龍眼肉、杞子和蜜棗，

呢個湯有滋陰潤肺、清熱降火、寧神安眠等功效呀!

家常便飯

姐姐好耐之前去新加坡公幹，

買咗幾包海南雞飯醬俾我做手信，

今日就用佢煲咗海南雞飯，

整埋豉油雞翼和灼菜芯，

咁又一餐喇!

親親芒

新年時去親家奶奶家食飯，

親家奶奶請我食咗呢個親親芒，

一個雪凍咗嘅芒果$10支，

佢真係一個芒果嚟架，

仲有核添架!

以我咁鐘意食芒果嘅人，

真係啱哂我口味；

聽親家奶奶講佢係惠康買架!

搵日我都要去惠康買嚟食先得。

雜菌炆排骨

 

今餐食得健康D，

整咗雜菌炆排骨，

用咗鮮冬菇、雞髀菇、秀真菇和白蘑菇，

加埋雲耳和甘筍絲一齊煮，

齋炒菇菇都好好食架!

養生壺~蓮子百合麥冬石斛沙參玉竹煲豬腱

响惠州返嚟好想飲湯，

拿拿臨去買舊豬腱番嚟，

摷下雪櫃有咩材料，

蓮子百合麥冬石斛煲豬腱，

配上淮山、龍眼肉、沙參、玉竹、瑤柱仔和蜜棗，

用養生壺煲湯功能，

煲好落少少鹽調味就飲得架喇!

呢個湯有滋陰潤燥、清熱養胃、潤肺安神等功效。

返惠州玩幾日

3月8日星期一

今日我和老公，

約埋大伯大伯娘和姑奶，

一行5人返惠州；

落車後即刻去隔離飯店食午飯。

38婦女節快樂

今日38婦女節，

我哋又抽時間去探朱鎧仁小朋友啦!

新抱仔話想食咖哩豬皮蘿蔔魚蛋，

我今朝整過一大盒拎過去大家一齊食，

去到大仔屋企，

又幫手醃咗雞翼整蜜糖煎雞翼，

嘻嘻，

大仔話好耐冇食過煎雞翼，

佢食唔停口添!

新抱仔妹妹整咗酸種麵包，

好成功，

好好味道呀!

食飯盒

 

依家我屋苑商場嘅雙餸飯$43盒，

如果想食原條魚就要加$5，

燒味雙拼就要$35，

已經算平架啦!

金銀菜咸鴨腎紅蘿蔔煲豬腱

我返咗惠州果幾日，

老公買咗1斤幾大白菜返嚟食，

食咗幾餐都食唔哂；

今日我就用佢嚟煲湯~金銀菜咸鴨腎紅蘿蔔煲豬腱，

呢個湯有清熱潤肺、健脾生津等功效。

帶母親大人返惠州

3月2日星期一

今日我自己帶母親大人返惠州，

我係上水火車站新開張嘅紅茶食早餐，

順便等母親大人過嚟集合呀!

返到惠州屋企放低行李，

我哋就去對面商場搵食喇!

綠茶餐廳，

香港都有開架!

呢度食咗￥119，

母親大人話如果係香港食，

呢度大約$300左右啦！

之後我帶母親大人行新街市，

母親大人話呢度又大又乾淨，

仲好多嘢賣添呀!

生果買咗￥17，

母親大人洗個頭￥30。

新春行大運~元朗錦田紅磚屋和吉慶圍

 

今年新春行大運，

我同老公和他的舊同學，

一行12人，

齊齊由元朗錦田出發，

經過紅磚屋和吉慶圍，

午餐就去錦上路爾巒翠湖飲茶。

紅燒薯仔排骨

 

屋企附近佳寶做緊8折優惠，

佢哋連新鮮豬肉檔都有8折，

太好喇!

平時買豬肉閒閒哋都7、80，

依家有8折，

緊係要食多D豬肉啦!

今日我就買咗一字排骨整紅燒薯仔排骨。

菜乾蠔豉瑤柱排骨粥

呢兩日，

我胃酸過多比較嚴重，

瞓覺時個胃特別唔舒服，

噚晚半夜仲要拿拿臨起身食抗胃酸藥，

攪到我冇覺好瞓呀!

今日諗住煲粥食，

菜乾蠔豉排骨粥，

老公話好多料，

但我煲完粥又冇胃口，

下午和晚上每餐食咗1碗粥，

都唔覺肚餓呀!

炒三絲

 

今日食炒三絲，

薯仔絲、紅蘿蔔絲和豬肉絲，

簡簡單單好餸飯架!

雪菜肉絲魚片炆米粉

今朝炒米粉做午餐，

雪菜肉絲魚片炆米粉，

加咗椰菜和甘筍絲一齊炒，

大大鑊，

食咗2餐呀!

加埋我至愛嘅辣醬，

我食咗2碗囉!

白背木耳絲蒸榨菜肉絲

之前買咗幾包榨菜返嚟，

見今餐得我和老公兩個人食飯，

簡簡單單蒸碟榨菜肉絲做餸，

加咗個白背木耳落去一齊蒸，

爽爽脆脆好送飯架!

朱氏團拜

今日大伯、大伯娘、姑奶、我和老公，

約埋一齊去飲茶，

互相派新年利是，

今年朱鎧仁小朋友大豐收，

收到好多利是呀!

我哋約咗去藍地翠湖(嘉爵)園林酒家，

呢餐5個人食咗$503。

西洋菜咸鴨腎紅蘿蔔粟米煲豬腱

响惠州返嚟好想飲湯，

見到菜檔有西洋菜賣，

買咗1斤半嚟煲湯，

加埋咸鴨腎落去一齊煲，

特別惹味架!

返惠州過年

2月19日星期四年初三

今日和老公食埋午飯後，

就準備返惠州喇!

返到屋企休息咗一陣，

就出街搵食喇!

大年初三

今日大年初三，

食埋午餐後，

我和老公下午會返惠州過年呀!

講番噚日，

我哋中午去完親戚家拜年後，

就齊齊去妹妹家團拜，

適逢姨甥女祈祈15歲正日生日，

好多blog友仔由BB剛剛出世睇到祈祈長大，

時間真係過得好快呀!

晚餐由姐姐和工人姐姐一齊煮，

大家都讚姐姐廚藝有好大進步添呀!

大年初二

今日大年初二，

我哋3個人簡簡單單食開年飯，

之後就要去親戚家拜年喇!

今午有3餸1湯，

魷魚蠔球冬菇豆苗、白切雞、XO醬三色椒炒腰果蝦仁，

雪梨竹蔗茅根紅蘿蔔粟米煲豬腱湯。

大年初一

今日大年初一，

我祝大家馬年行大運，

身體健康，

馬到功成，

萬事如意，

心想事成。

今日朱家全日素，

親家奶奶佢哋一齊嚟食午餐，

我準備咗5個素菜，

7個大人加朱鎧仁小朋友，

坐埋一齊食素午餐，

好開心呀!

糖醋排骨

今日年廿九，

明天已經係年初一(今年冇年卅十晚)，

我和老公分工合作，

我去買定餸準備明天初一煮齋菜，

而佢就慢慢收拾屋企，

等孫仔返嚟屋企食飯呀!

我摷到雪櫃有金沙骨，

就煮咗呢碟糖醋排骨做午餐呀!

四季豆煮肉片

今日食得簡單，

四季豆煮肉片，

5蚊扎四季豆，

加多十零蚊豬肉，

咁又一餐喇!

情人節快樂

今年情人節，

梗係要同我嘅新情人孫仔過啦!

順便攞埋我噚日整嘅蘿蔔糕過去俾大人和新抱仔試下；

朱鎧仁小朋友已經5個月大喇!

開始認人，

今日都唔例外，

好彩扭計扭咗10分鐘左右就收咗聲，

仲開始同我哋玩添，

玩完就瞓覺，

真係好抵打架!

我哋冇留係度食晚飯，

但煎咗D蘿蔔糕和芋頭糕食呀!

2026朱家蘿蔔糕

 

噚日我唔多舒服，

本來冇諗住整蘿蔔糕，

但買哂材料，

唔整好似嘥咗咁，

今日見有番D精神，

所以拿拿臨開工。

惠州3日2夜

2月9日星期一

我和老公兩個人又返咗惠州，

因為其中一間房間訂造嘅窗台牀，

安裝好啦!

買樓時銷售姐姐幫我哋搵埋裝修，

我哋只要講哂我哋要求，

傾啱價錢就拿拿聲開工，

裝修咗3個半月，

我和老公終於可以入住喇!

2026朱家團年飯

今日朱家提早團年，

母親大人和妹妹一家都入咗嚟天水圍齊齊團年呀!

朱鎧仁小朋友第一次返嚟爺爺嫲嫲屋企，

有D認地方喊咗一陣，

好彩我呢個做嫲嫲嘅氹得掂佢，

咁先有番D笑容咋!

今日6餸1湯，

白飯任裝。