入大埔探孫仔

 

今日入咗大埔探朱鎧仁小朋友，

呢排新抱仔放暑假，

日日由媽媽湊佢，

又成日帶佢出街，

所以變得好黐身，

遲下新抱仔要開學，

佢肯會喊死囉!

晚餐由我負責煮，

沙薑豬手、涼拌茄子、蝦膏蒸豬肉、烚西蘭花，

仲有雞腳眉豆花生煲西施骨湯。

木耳榨菜蒸米粉

今晚食得簡單，

整咗木耳榨菜蒸米粉，

我和老公兩個人食3個米粉，

份量啱啱好，

每人食咗2碗，

好飽架!

亂棍打死牛魔王~豆角炒牛肉

亂棍打死牛魔王即係豆角炒牛肉，

雖然呢個名字由來我唔知，

但我剩係知道我鐘意食呢個餸囉!

蓮藕紅蘿蔔粟米煲豬尾骨

仲有1節蓮藕係屋企，

用佢嚟煲湯就最啱喇!

蓮藕紅蘿蔔粟米煲豬尾骨，

全程煲1.5小時，

落少少鹽調味就好好味道架啦!

蠔油薯仔炆排骨

 

今日買咗2條腩排$60，

買多兩個薯仔，

整咗大大鍋蠔油薯仔炆排骨，

專登落多少少水，

多D汁，

好送飯呀!

家常便飯

 

今日要去政府牙科洗牙，

洗牙我係怕怕架，

因為怕痛囉!

不過唔洗又唔得，

唯有頂硬上啦!

今晚煮埋噚日半份蓮藕餅(冇加冬菇)，

仲有西蘭花苗炒蝦仁，

煮完先發覺呢兩碟餸都係要咬架!

洗完牙牙軟軟，

要慢慢食先得啦!

香煎蓮藕餅

 

好耐冇整過蓮藕餅，

今日買咗2節蓮藕，

攞咗其中一節嚟整蓮藕餅呀!

呢份我加咗一隻大冬菇落去(切粒)，

一碟有8件。

黃氏家聚

 

 噚日黃氏家聚，

我一早整咗沙薑雞腳拎過去一齊食，

早午母親大人、妹妹一家3口、我和老公，

一齊去禾輋海港酒家飲茶，

姐姐佢哋有事做下午先會到妹妹家；

去到妹妹家部入人開枱打麻雀，

我、姐姐和妹夫就唱K；

晚餐方面，

妹妹佢哋係中山買咗兩隻窑雞落嚟，

吩咐工人姐姐整咗手撕雞，

灼雲吞餃子、沙薑雞腳、節瓜瑤柱、蟹柳炒蛋、白灼蝦，

仲有祈祈就自整嘅牛肉漢堡包，

美女廚房，

整得真係好好味道呀!

輕食~榨菜肉絲鮮蝦蟹籽雲吞米粉

呢兩日係惠州食咗好多嘢，

係時候要食番清D喇!

所以今日就嚟煮輕食，

榨菜肉絲鮮蝦蟹籽雲吞米粉，

袁記雲餃嘅鮮蝦蟹籽雲吞真係冇得輸，

配埋自煮嘅榨菜肉絲，

呢餐真係好好食呀!

惠州3日兩夜

8月3日星期一

今日我、老公和姑奶3個人係蓮塘口岸食早餐後，

就返咗惠州，

中午約咗親戚一行7人，

齊齊去我家附近老牌酒樓飲茶，

堂妹買咗團購卷108套餐，

我哋叫多籠蝦餃，

呢餐食咗￥141，

超抵食呀!

沙薑雞腳雞翼

今日去大埔探朱鎧仁小朋友，

佢啱啱上玩playgroup返嚟，

又攰又眼瞓，

好扭計呀!

好彩瞓醒食飽後又變返活潑可愛咋!

襯佢瞓覺，

我整咗沙薑雞腳雞翼，

而晚餐就由新抱仔煮，

沙爹粉絲牛肉煲、涼拌海藻菜和小米斧飯。

柱候蘿蔔牛腩

老公話好耐冇食牛腩，

見佳寶做緊8折，

所以買咗包牛肋條嚟做蘿蔔牛腩喇!

煲仔飯

其實兩個人食飯真係都幾難，

都唔知煮咩食好，

又唔想成日食舊飯舊餸，

最好餐餐清哂就最perfect喇!

今日就煮咗臘腸梅菜豬肉煲仔飯，

1杯半米我和老公全部食哂，

真係啱啱好呀!

有飯焦，

千祈唔好同我爭呀!

節瓜咸蛋肉片湯飯

今晚得我兩老食晚餐，

咁啱有碗黎麥飯係雪櫃，

咁就簡單啦!

滾個節瓜咸蛋肉片湯做湯飯，

餸都唔使煮呀!

青瓜雲耳炒雞粒

 

青瓜雲耳炒雞粒，

簡簡單單嘅家常餸，

呢個餸清清哋，

常常煮嚟食都唔怕肥呀!

打風餐

 噚晚嘅9號風球真係好勁呀!

我住天水圍吹正西南風，

成晚風聲呼呼聲，

我真係驚個冷氣機吹落街呀!

甚至驚佢吹爛個窗添!

攪到我成晚都瞓唔著，

差不多天光先瞓番咋!

中午煮咗一大鍋雲吞肉片魚蛋湯米粉，

3個人都食唔哂，

唯有連食兩餐，

嘻嘻，

慳番D錢呀!

蝦醬粉絲蒸豬肉

 

今日上午掛1號風球時，

天朗氣清，

仲熱到35度添呀!

但當中午掛3號風球後，

香港天氣突然變差，

大風又大雨，

好彩壞天氣好快又過咗，

希望個風破壞力唔好咁大啦!

豬肉檔話明天休息，

所以買定舊梅頭豬肉做存貨，

切咗D肥肥哋嘅豬肉嚟蒸粉絲蝦醬，

好惹味架!

絲瓜雞蛋肉丸湯

 

今日大暑，

我買咗半邊西瓜，

準備切粒入盒落雪櫃，

雪凍佢等夜晚先食呀!

好似話就嚟打風，

所以呢幾日日日熱到爆炸，

晚餐就煮咗個絲瓜湯做湯飯，

咁就更易入口啦!

香辣豆腐燴肉碎

 

今日買咗磚板豆腐返嚟$6，

再加埋$15豬肉碎，

整咗呢碟香辣豆腐燴肉碎，

呢個餸真係好送飯架!

炒埋碟蒜蓉芥蘭，

開飯啦!

輕食~榨菜甘筍肉碎蔥油餅

中午熱辣辣都唔想煮飯，

簡單炒碟菜，

煎幾塊蔥油餅，

卷埋佢就食得啦!

真係簡簡單單又一餐呀!

其實炒咩菜係冇問題架!

全部都係自己鐘意食嘅嘢。

節瓜眉豆花生鱆魚煲豬腱

 

噚日買咗隻雞嚟整燒雞，

剪咗D雞腳、雞頸和雞脊骨，

用嚟煲湯就最啱喇!

節瓜眉豆花生鱆魚煲豬腱，

老公話雞好食，

湯好飲，

正呀喂!

蒜蓉黑椒香草燒雞

噚晚細仔點名要食燒雞，

拿拿臨今朝即刻去天盛街市買隻雞番嚟，

醃咗唔夠2個鐘就話中午要食，

又唔早講，

等我早一日醃定隻雞仲入味呀!

閒話家常

大仔和新抱仔話星期六帶朱鎧仁小朋友，

入嚟爺爺家玩一陣，

然後晚上就去屯門同新抱仔親戚食生日飯；

咁啱我煲咗綠豆海帶糖水，

雪凍咗俾佢哋消消暑氣呀!

晚餐我都唔願煮，

買咗1個兩餸飯盒$43，

我和老公兩個人食，

雖然有少少貴，

但呢間餸都比較多，

我和老公兩個人係食唔哂D餸架!

客家梅菜炆腩肉

 

响惠州買嘅甜梅菜仲有1包未開，

今日就買咗1斤豬腩肉嚟炆梅菜，

老公話今日呢碟梅菜腩肉真係好好食，

送飯一流，

佢仲添咗2碗飯呀!

黑椒牛肉炒意粉

今日細仔WFH，

佢話唔想食飯，

咁食意粉就至啱佢喇!

今日整咗黑椒牛肉意粉，

配西蘭花苗和甘筍絲，

有菜又有肉，

都唔錯架!

健康燕麥香蕉蛋糕

 

屋企有幾隻出哂梅花點嘅香蕉，

老公話香蕉可以用嚟整咩食，

簡單啦!

今日就整咗呢個健康燕麥香蕉蛋糕喇!

家庭聚會

噚日黃氏一家有聚會，

我整咗涼拌沙薑豬腳過去一齊食；

我哋聚會唔係為咗食嘢，

而係為咗見朱鎧仁小朋友呀!

母親大人係屋企執嘢時，

摷到個套杯玩具出嚟，

呢個玩具有廿年幾歷史，

唔知係佢爸爸定係表叔玩過，

依家輪到佢玩，

佢超鐘意玩囉!

沙薑豬腳

今日黃氏又有聚會喇!

我簡單整咗盒涼拌沙薑豬腳過去一齊食，

買咗2隻豬腳$64，

又唔貴喎，

整起有一大盒，

應該夠食掛!

惠州3日兩夜

7 月9日星期四

今朝我去完健康院抽血後，

就同老公返咗惠州，

簡單買咗個西瓜、飲品和零食，

就返上屋企打掃喇!

做完打掃簡單叫份外賣做午餐。

西芹兩食

我買咗棵西芹$8，

分咗兩餐嚟食，

一餐西芹炒牛肉，

一餐西芹炒雞柳，

我和老公兩個人食飯，

真係簡單又好味道呀!

豉汁涼瓜炆腩排

 

今日小暑，

除咗煲咗冬瓜湯外，

我仲有煮咗碟豉汁涼瓜炆腩排嚟食，

涼瓜有清熱降火、降血糖等功效架!

氣炸蜜汁叉燒

 

噚日買咗1斤多少少梅頭肉，

肉檔叔叔話如果買帶皮和肥肉嘅梅頭肉就$48斤，

全瘦嘅梅頭肉就要$58斤，

今日買咗1斤多少少帶皮梅頭肉$58，

如果買瘦梅頭肉就要成$6X以上喇!

雖然我會叫肉檔叔叔幫我切走大部份肥肉，

但計落都係帶皮梅頭肉抵少少囉!

梅頭肉有少少肥唔怕喎，

用嚟整蜜汁叉燒就最啱啦!

氣炸完嘅叉燒一D都唔肥，

又腍又滑，

叉燒一Ｄ都唔柴呀！

涼拌青瓜雲耳

 

天氣熱，

又係食涼拌菜嘅時候喇!

今日準備整涼拌青瓜雲耳，

爽爽脆脆，

真係會食唔停口架!

香煎紅衫魚

 

今朝行完晨運，

慢慢行咗去天瑞街市買魚，

買咗2條大紅衫魚$60，

老公和細仔話好耐冇食過紅衫魚，

煎香少少俾大家食，

差D連魚骨都食埋呀!

榨菜肉絲蒸米粉

 

今朝掛咗一號風球，

天氣熱到爆，

真係冇咩胃口食飯呀!

簡簡單單煮咗碟榨菜肉絲蒸米粉做晚餐，

我和老公兩個人食就啱啱好喇!

豉油雞髀手撕雞

 

今日買咗2隻雞髀整豉油雞髀，

鐘意啖啖肉嘅我，

去骨拆肉，

整咗一碟豉油雞髀手撕雞，

有豉油汁真係好餸飯架!

今次用慢火浸熟雞髀，

D雞肉真係好滑，

大家都可以試下架!

節瓜冬菇炆腩排

 

天氣真係熱，

攪到我都唔想煮飯添，

不過老公要食飯，

唔煮唔得呀!

今晚得一個餸，

就係節瓜冬菇炆腩排喇!

 

梅頭豬肉蒸吹筒仔(吊片)

係大亞灣買咗吹筒仔(吊片)，

一路放咗係大冰櫃，

都唔知放咗幾耐，

咁啱今朝我盤點緊冰箱裡，

仲有咩凍肉時發現咗佢，

拿拿臨攞出嚟蒸豬肉呀!

節瓜眉豆花生鱆魚雞腳煲豬腱

 

新抱仔下星期開始學校放12點，

親家奶奶話自己可以湊孫仔半日，

等新抱仔中午返嚟就多個人手湊亞B，

所以我就可以返咗屋企休息下，

等佢哋有事唔得閒時，

我就隨時返大埔幫忙湊B喇!

一星期冇煲湯俾老公和細仔飲，

所以今日就煲咗節瓜眉豆花生鱆魚雞腳煲豬腱，

呢個湯水適合夏天飲用，

有清熱解暑、健脾祛濕和強健筋骨等功效。(AI資料)

沙參玉竹蓮子百合麥冬螺頭煲豬腱

 噚日端午節我返咗天水圍，

休息幾日後星期日又要入大埔湊孫，

呢兩個星期，

我冇煲過湯俾老公和細仔飲，

所以即刻煲咗個沙參玉竹蓮子百合麥冬螺頭煲豬腱，

佢哋每人都飲咗2大碗，

好飲呀!

好勞氣

提早慶祝父親節

 

今日，

我哋兩親家，

齊齊去三聖食海鮮，

海鮮係關財記買咗$2150，

買完海鮮就去青山灣漁港食午餐，

加工費連其他小食$1758，

親家有9折咭，

呢餐總共食咗$3908。

養生壺~花旗參麥冬蓮子百合煲豬腱

 

每次細仔WFH，

我就拿拿臨想煲啖湯俾佢飲，

今次用養生壺煲咗花旗參麥冬蓮子百合煲豬腱，

配圓肉、蜜棗和杞子，

啱哂成日熬夜、虛火盛、口乾舌燥和乾咳少痰人士飲架!

母親大人77歲生日快樂

噚日，

我哋黃氏齊齊慶祝母親大人77歲生日，

今次都係訂咗禾輋海港酒家食飯，

一早訂咗個廳房、圍餐兼加隻燒鵝，

全部11人加朱鎧仁小朋友(姨甥去咗日本冇嚟到)呀!

冬瓜兩食

買咗1斤半多少少冬瓜，

整咗1個餸和1個湯，

冬瓜粉絲炆魚肉豆腐卜和冬瓜粒湯，

呢兩個餸最啱夏天食架喇!

香煎馬頭魚

 

好多人煎馬頭魚時，

反轉魚時好易煎到散哂；

今日我都煎馬頭魚，

首先洗淨魚身、去肚腸和去魚鱗，

用廚紙索乾水份，

落鹽和生粉醃魚，

全程開大火去煎魚，

記得落多少少油呀!

煎薑片就唔少得，

放魚後煎到魚香脆後，

先好反轉煎另一面，

咁馬頭魚就唔易散架喇!

裝起魚後，

爆一爆D蔥段放入魚面，

淋上煎魚豉油就食得啦!

馬頭魚係天瑞街市買$45。

小炒皇

今日去街市買菜，

買咗1斤菜芯$13，

見有韭菜花賣，

叫亞姐幫我秤$7韭菜花，

咁俾廿蚊就唔使找啦!

其實我平時買餸都係咁，

唔想要咁多散紙，

有碎銀就俾碎銀，

冇就買夠齊頭，

碎銀重，

唔想袋呀!

鮑魚麵

 

今晚老公話唔想食飯，

簡單啦!

嘻嘻，

整咗碗鮑魚麵佢嘆下，

爽唔爽呢???

薑蔥煎雞扒

 

屋企仲有兩塊雞扒，

即刻攞出嚟解凍，

整咗呢碟薑蔥煎雞扒，

咸咸香香，

好送飯呀!