榨菜肉絲蒸米粉

 

今朝掛咗一號風球，

天氣熱到爆，

真係冇咩胃口食飯呀!

簡簡單單煮咗碟榨菜肉絲蒸米粉做晚餐，

我和老公兩個人食就啱啱好喇!

豉油雞髀手撕雞

 

今日買咗2隻雞髀整豉油雞髀，

鐘意啖啖肉嘅我，

去骨拆肉，

整咗一碟豉油雞髀手撕雞，

有豉油汁真係好餸飯架!

今次用慢火浸熟雞髀，

D雞肉真係好滑，

大家都可以試下架!

節瓜冬菇炆腩排

 

天氣真係熱，

攪到我都唔想煮飯添，

不過老公要食飯，

唔煮唔得呀!

今晚得一個餸，

就係節瓜冬菇炆腩排喇!

 

梅頭豬肉蒸吹筒仔(吊片)

係大亞灣買咗吹筒仔(吊片)，

一路放咗係大冰櫃，

都唔知放咗幾耐，

咁啱今朝我盤點緊冰箱裡，

仲有咩凍肉時發現咗佢，

拿拿臨攞出嚟蒸豬肉呀!

節瓜眉豆花生鱆魚雞腳煲豬腱

 

新抱仔下星期開始學校放12點，

親家奶奶話自己可以湊孫仔半日，

等新抱仔中午返嚟就多個人手湊亞B，

所以我就可以返咗屋企休息下，

等佢哋有事唔得閒時，

我就隨時返大埔幫忙湊B喇!

一星期冇煲湯俾老公和細仔飲，

所以今日就煲咗節瓜眉豆花生鱆魚雞腳煲豬腱，

呢個湯水適合夏天飲用，

有清熱解暑、健脾祛濕和強健筋骨等功效。(AI資料)

沙參玉竹蓮子百合麥冬螺頭煲豬腱

 噚日端午節我返咗天水圍，

休息幾日後星期日又要入大埔湊孫，

呢兩個星期，

我冇煲過湯俾老公和細仔飲，

所以即刻煲咗個沙參玉竹蓮子百合麥冬螺頭煲豬腱，

佢哋每人都飲咗2大碗，

好飲呀!

好勞氣

提早慶祝父親節

 

今日，

我哋兩親家，

齊齊去三聖食海鮮，

海鮮係關財記買咗$2150，

買完海鮮就去青山灣漁港食午餐，

加工費連其他小食$1758，

親家有9折咭，

呢餐總共食咗$3908。

養生壺~花旗參麥冬蓮子百合煲豬腱

 

每次細仔WFH，

我就拿拿臨想煲啖湯俾佢飲，

今次用養生壺煲咗花旗參麥冬蓮子百合煲豬腱，

配圓肉、蜜棗和杞子，

啱哂成日熬夜、虛火盛、口乾舌燥和乾咳少痰人士飲架!

母親大人77歲生日快樂

噚日，

我哋黃氏齊齊慶祝母親大人77歲生日，

今次都係訂咗禾輋海港酒家食飯，

一早訂咗個廳房、圍餐兼加隻燒鵝，

全部11人加朱鎧仁小朋友(姨甥去咗日本冇嚟到)呀!

冬瓜兩食

買咗1斤半多少少冬瓜，

整咗1個餸和1個湯，

冬瓜粉絲炆魚肉豆腐卜和冬瓜粒湯，

呢兩個餸最啱夏天食架喇!

香煎馬頭魚

 

好多人煎馬頭魚時，

反轉魚時好易煎到散哂；

今日我都煎馬頭魚，

首先洗淨魚身、去肚腸和去魚鱗，

用廚紙索乾水份，

落鹽和生粉醃魚，

全程開大火去煎魚，

記得落多少少油呀!

煎薑片就唔少得，

放魚後煎到魚香脆後，

先好反轉煎另一面，

咁馬頭魚就唔易散架喇!

裝起魚後，

爆一爆D蔥段放入魚面，

淋上煎魚豉油就食得啦!

馬頭魚係天瑞街市買$45。

小炒皇

今日去街市買菜，

買咗1斤菜芯$13，

見有韭菜花賣，

叫亞姐幫我秤$7韭菜花，

咁俾廿蚊就唔使找啦!

其實我平時買餸都係咁，

唔想要咁多散紙，

有碎銀就俾碎銀，

冇就買夠齊頭，

碎銀重，

唔想袋呀!

鮑魚麵

 

今晚老公話唔想食飯，

簡單啦!

嘻嘻，

整咗碗鮑魚麵佢嘆下，

爽唔爽呢???

薑蔥煎雞扒

 

屋企仲有兩塊雞扒，

即刻攞出嚟解凍，

整咗呢碟薑蔥煎雞扒，

咸咸香香，

好送飯呀!

佛誕補假

今日係佛誕補假假期，

我哋又入咗大埔探朱鎧仁小朋友喇!

冇見半個月，

佢已經坐得好穩陣，

仲爬得好快添，

至於企就啱啱學緊，

應該好快會學識呀!

見到佢成個大仔縮小版咁，

真係好攪笑呀!

晚餐我炆咗鍋支竹豬手排骨過去一齊食

新抱仔叫工人姐姐整咗蔬菜沙律、芝士明太子法包、

韓式烤肉泡菜和粟米紅蘿蔔螺頭煲瘦肉湯，

飯後甜品有雪糕。

蒜頭豆豉貝貝南瓜蒸排骨

 

今日買咗個貝貝南瓜$8，

用佢嚟蒸排骨就最啱喇!

貝貝南瓜有人鐘意連皮蒸，

但我就鐘意切皮喇!

不過切唔切皮都好，

南瓜蒸排骨，

點煮都咁好食呀!

腰果西芹雲耳炒肉片

呢幾日係惠州食得好復雜，

所以今晚晚餐就煮得簡單D，

炒咗碟腰果西芹雲耳炒肉片，

清清哋，

清下腸胃呀!

惠州hea玩4日

5月18日星期一

今朝要返惠州，

一早過咗蓮塘口岸食早餐，

食完早餐就搭9點半車返惠州。

養生壺~健脾祛濕湯

 

呢兩日細仔都冇係屋企食飯，

唯有今朝一早煲定呢個健脾祛濕湯，

材料有豬腱、五指毛桃、蓮子、茯苓粒、芡實、

淮山、陳皮、瑤柱、蜜棗，

等細仔飲完呢碗湯就可以出街喇!

呢個湯有健脾養胃、祛濕利水、

減輕水腫、消暑解毒等功效。

家常便飯

 

呢排天氣麻麻哋又成日落雨，

我隻風濕手又發作開始痛喇!

晚餐唔想煮得咁複雜，

簡單煮幾個家常菜，

香煎三文魚、麵豉蒸排骨、灼生菜，

開飯啦!

薑蒜薯仔煎雞翼

 

今日整咗個不一樣嘅雞翼，

就係薑蒜薯仔煎雞翼喇!

雞翼和薯仔係絕配，

點煮都咁好食架!

養生壺~麥冬石斛煲豬腱

 

响惠州買咗石斛條，

今日就用佢嚟煲湯，

麥冬石斛煲豬腱，

配蓮子百合、圓肉、杞子、淮山，沙參玉竹和蜜棗，

用養生壺煲，

好快有得飲架喇!

氣炸雞粒

我早一日醃定2塊雞扒，

部份雞扒煎咗嚟做噚日嘅雞扒蛋豬仔飽，

今日將其餘嘅雞扒氣炸鍋整成脆口雞粒，

簡單做咗今晚晚餐呀!

煎雞扒蛋豬仔飽

 

老公去咗旅行，

我一個人都好少煮飯食，

簡單買咗個豬仔飽，

煎咗塊雞扒和雞蛋，

加幾片生菜，

咁就做咗我嘅午餐喇!

母親節快樂

噚日去咗大仔家打邊爐，

兩家人齊齊慶祝母親節和朱鎧仁小朋友8個月生日；

朱鎧仁小朋友又大個仔咗，

佢手長腳長，

仲好重添呀!

蜜汁金沙骨

 

老公去咗馬來西亞玩，

我一個人就懶得煮喇!

今日就唔同，

細仔全日在家，

點都要煮餐飯俾佢，

所以一早醃定金沙骨，

放入氣炸鍋整熟佢就食得啦!

家常便飯

 

明天老公同朋友去馬來西亞玩7日，

剩番我和細仔係屋企，

細仔又唔係成日返嚟食飯，

咁我就懶得煮喇!

到時睇下有咩好食先得。

今日兩餸1湯，

蒜頭豆豉蒸排骨、灼菜芯和蓮藕馬蹄鱆魚綠豆煲排骨湯。

鮮沙薑手撕雞

 

今朝細仔食埋午餐先返工，

拿拿臨解凍2隻雞髀，

整咗碟鮮沙薑手撕雞和蒜蓉炒西蘭花苗，

簡單又一餐。

絲瓜雞蛋肉片湯

 

我有時冇咩胃口，

就會煮呢個絲瓜雞蛋肉片湯，

有瓜有肉又有蛋，

做湯飯就very good喇!

清清哋真係唔錯架!

XO醬蜜糖豆炒蝦仁

今日買咗半斤蜜糖豆$10，

煮咗呢碟XO醬蜜糖豆炒蝦仁，

加咗少少甘筍絲和XO醬一齊炒，

特別惹味架!

提早慶祝母親節~灣仔會展薈景餐廳

噚晚，

我哋兩家人，

一行8個大人連1小朋友，

齊齊提早慶祝母親節，

大仔訂咗灣仔會展薈景餐廳食自助餐，

呢度真係好多嘢食，

食物供應源源不絕，

食物質素真係好掂，

我有好多熱食都冇食到，

都已經飽飽喇!

食力真係減少咗好多囉!

香煎單骨雞翼

 

雪櫃仲有幾隻大雞翼，

用嚟整香煎單骨雞翼就最啱喇!

簡單用薑、蒜做配料，

加鹽、糖、豉油和紹酒醃2小時，

用慢火慢慢將雞翼煎熟佢就食得架啦!

芥菜蝦乾瑤柱咸排骨煲

 

噚日返到嚟天水圍，

買咗1份生菜和1份芥菜$18，

1份芥菜有8棵，

都唔錯喎!

今日買咗豬尾骨醃咸佢，

整咗一鍋芥菜蝦乾瑤柱咸排骨煲，

一煲過有菜有肉有蝦乾，

啱哂我呢個懶人呀!

返惠州hea咗4日3夜

4月26日星期日

今日食完午餐，

我同老公返咗惠州hea幾日，

返到新屋放低嘢就去搵食，

呢餐超級碳水餐，

好飽呀!

食完嘢去walmart買麵包零食。

沙參玉竹蓮子百合麥冬煲螺頭湯

 

呢排我好想飲湯，

最近就煲咗沙參玉竹蓮子百合麥冬煲螺頭湯，

加埋淮山、杞子、圓肉、瑤柱、蜜棗和豬腱；

螺頭係新抱仔過年前買俾我嘅，

不過今次佢冇份飲，

下次等佢哋返嚟，

我再煲俾佢飲呀!

蜜汁燒排骨

今日買咗2磅金沙骨，

揀咗6條薄薄哋嘅排骨，

整咗呢碟蜜汁燒排骨，

加蜜糖和熟芝麻，

好惹味架!

香煎粟米墨魚餅

好耐買過墨魚滑喇!

今日係街市買咗$35墨魚滑，

加咗2匙羹罐頭粟米粒，

煎咗8件粟米墨魚餅，

做咗我和老公嘅晚餐。

拜山日

噚日，

黃氏家族去拜祭父親大人，

之後就去沙田第一城飲茶~壹匯，

10個人食咗$1262，

都幾誇張呀!

蕃茄雞蛋煮豬肉碎

 

老公鐘意食蕃茄，

每次煮呢個餸，

一定要煮多少少飯，

因為佢鐘意撈埋蕃茄蛋送飯，

今次加埋豬肉碎落去煮，

一個餸有蔬果、雞蛋和肉，

夠哂營養啦!

簡單食

由於手腕傷口，

醫生話右手盡量唔好用力、屈曲和扭動，

所以好多嘢都唔做得；

大腿罅傷口附近開始瘀青嚴重，

仲有少少剌痛，

又唔似係發炎，

所以依家我連晨運都停咗，

只係落街買少少餸和食完早餐就返屋企，

依幾日煮下粉麵食就最簡單喇!

休養的一天

 

我做完心導管檢查後，

由於大腿罅個傷口每行一步路都感到好痛，

所以星期六我係床度瞓咗一日，

邊度都唔想去呀!

今日星期日，

傷口雖然仍有痛，

但都可以慢慢行呀!

大仔一家入嚟天水圍嚟探我，

先去會所餐廳飲茶，

晚上我煲咗西洋菜咸鴨腎湯和整咗碟雲耳拍青瓜，

外賣燒味道~燒肉和燒鴨，

仲有外賣pizza和雞翼。

細仔今日爭住抱朱鎧仁小朋友，

佢今日好乖，

完全冇喊，

食糊仔時仲好好笑容添呀!

好彩定唔好彩

 

今日去醫院做心導管檢查，

如果發現血管狹窄有阻塞嘅話就要即時做通波仔手術；

導管通常由手腕又或大腿罅穿刺插入，

唔好彩嘅係，

由手腕局部麻醉插入導管，

點知我嘅血管比較幼，

插入失敗，

於是再由大腿罅局部麻醉插入導管，

注射顯影劑再照X光檢查；

兩個傷口，

手腕唔痛，

但大腿罅就痛到行唔到路；

好彩嘅係，

醫生話我心臟血管阻塞約40%，

血液流通正常，

不需要做通波仔手術，

(通常高於70%就要即時做手術)

醫生建議繼續服藥、健康飲食、常做運動等。

早餐禁食，

12點食咗1.5份三文治，

出院後晚餐叫外賣食粥呀!

蒜頭豆豉炆釀苦瓜

 

响惠州買咗兩條幼身苦瓜，

整咗老公最鐘意嘅蒜頭豆豉炆釀苦瓜，

今次用全豬肉餡，

食落都唔錯架!

養生壺~花旗參蓮子百合麥冬煲豬腱

 

今日用養生壺煲花旗參蓮子百合麥冬煲豬腱，

配埋圓肉和蜜棗，

呢個湯有清熱降火、滋陰潤肺、補氣養陰等功效，

適量常常熬夜、虛火盛、口乾舌燥、乾咳少痰人士。

清明拜山日

今日朱家拜山日，

我留家休息，

順便買定午餐俾大家食，

之後就去大埔探朱鎧仁小朋友，

佢就嚟7個月，

開始認人喇!

見到我哋又喊又笑，

好攪笑呀!

難得3姐妹伉儷齊齊返惠州

4月3日(星期五)

原本呢個復活節假期，

約咗姐姐姐夫和妹妹妹夫一齊返惠州玩3日，

但因健康我和老公臨時取消返去惠州，

佢哋照原定計劃繼續行程；

但直至下午3點45分，

我見身體都冇咩問題，

決定和老公一齊返惠州，

經羅湖返到惠州已經7點左右，

約埋一齊食晚飯。

新形象，新髮型，短髮

 

今日我的起心肝去剪頭髮，

想轉轉新形象，

叫髮型師幫我剪個新髮型，

呢個髮型真係好未剪過~短髮，

兩耳鏟青，

髮尾留髮根但界出梯級造形，

原來我剪短髮都幾好睇喎!

冬瓜粟米肉粒湯

原本想滾冬瓜粒湯，

但唔記得買咸蛋，

即刻改煲冬瓜粟米肉粒湯，

一樣咁好飲呀!

摷到雪櫃有4隻雞腳，

加埋落去一齊煲，

食得唔好嘥；

細仔中午臨返工前飲完一大碗湯，

佢話好飲好好飲呀!