噚日炆咗一大鍋南乳蓮藕木耳炆腩排，
以為可以食兩餐，
點知有細仔係度，
食剩少少蓮藕和木耳，
哈哈，
佢名副其實係一位食肉獸嚟架!
屋企個西施電飯煲都幾大個，
兩個人每餐食一杯米真係好難煮架!
又唔想食隔夜飯，
所以呢排我都係蒸飯嚟食，
今晚就煮咗梅菜豬肉蒸飯，
灼碟菜就食得喇!
兩個人食懶得煮太多餸，
整個蒸飯就最方便喇!
之後用蒸飯嘅滾水嚟灼菜，
咁就唔使再開火啦!
今日又係簡單一鍋煮，
豆角薯仔炆排骨，
我和老公都鐘意食炆到好腍嘅豆角和薯仔，
加埋腩排一齊煮，
咁就更有豐富啦!
蒸肉餅，
我最鐘意就係加馬蹄和魷魚乾落去一齊蒸架喇!
食落爽口又鮮味，
肉餅要半肥瘦先夠滑，
好送飯呀!
每次諗唔到煮咩餸，
我都會煮呢碟黑椒洋蔥豬扒，
因為簡單囉，
黑椒汁又好餸飯，
簡直係朱家家常菜之一呀!
今日去肉檔買咗條五花腩肉，
叫肉佬幫我起埋塊豬皮，
腩肉都幾厚身，
有肥有瘦，
底部仲有少少軟骨添，
分開切咗佢出嚟一齊炆，
炆出嚟腩肉就唔使咁大件喇!
今日煮咗個好送飯嘅餸~魚香茄子，
加咗梅香咸魚，
呢個餸特別惹味呀!
老公又要添飯喇!
今晚又係得我和老公兩個人食飯，
簡單一個餸有蕃茄、雞蛋和豬肉碎，
煮起連鍋一齊上，
碟都洗少一個呀!
今晚食得簡單，
整咗木耳榨菜蒸米粉，
我和老公兩個人食3個米粉，
份量啱啱好，
每人食咗2碗，
好飽架!
今日買咗2條腩排$60，
買多兩個薯仔，
整咗大大鍋蠔油薯仔炆排骨，
專登落多少少水，
多D汁，
好送飯呀!
好耐冇整過蓮藕餅，
今日買咗2節蓮藕，
攞咗其中一節嚟整蓮藕餅呀!
呢份我加咗一隻大冬菇落去(切粒)，
一碟有8件。
其實兩個人食飯真係都幾難，
都唔知煮咩食好，
又唔想成日食舊飯舊餸，
最好餐餐清哂就最perfect喇!
今日就煮咗臘腸梅菜豬肉煲仔飯，
1杯半米我和老公全部食哂，
真係啱啱好呀!
有飯焦，
千祈唔好同我爭呀!
今日上午掛1號風球時，
天朗氣清，
仲熱到35度添呀!
但當中午掛3號風球後，
香港天氣突然變差，
大風又大雨，
好彩壞天氣好快又過咗，
希望個風破壞力唔好咁大啦!
豬肉檔話明天休息，
所以買定舊梅頭豬肉做存貨，
切咗D肥肥哋嘅豬肉嚟蒸粉絲蝦醬，
好惹味架!
今日買咗磚板豆腐返嚟$6，
再加埋$15豬肉碎，
整咗呢碟香辣豆腐燴肉碎，
呢個餸真係好送飯架!
炒埋碟蒜蓉芥蘭，
開飯啦!
中午熱辣辣都唔想煮飯，
簡單炒碟菜，
煎幾塊蔥油餅，
卷埋佢就食得啦!
真係簡簡單單又一餐呀!
其實炒咩菜係冇問題架!
全部都係自己鐘意食嘅嘢。
响惠州買嘅甜梅菜仲有1包未開，
今日就買咗1斤豬腩肉嚟炆梅菜，
老公話今日呢碟梅菜腩肉真係好好食，
送飯一流，
佢仲添咗2碗飯呀!
今日黃氏又有聚會喇!
我簡單整咗盒涼拌沙薑豬腳過去一齊食，
買咗2隻豬腳$64，
又唔貴喎，
整起有一大盒，
應該夠食掛!
今日小暑，
除咗煲咗冬瓜湯外，
我仲有煮咗碟豉汁涼瓜炆腩排嚟食，
涼瓜有清熱降火、降血糖等功效架!
今朝掛咗一號風球，
天氣熱到爆，
真係冇咩胃口食飯呀!
簡簡單單煮咗碟榨菜肉絲蒸米粉做晚餐，
我和老公兩個人食就啱啱好喇!
