即興家庭聚會

今午母親大人和妹妹一家突然話入嚟天水圍打麻雀，

好彩我屋企都準備咗少少餸菜，

妹妹就買咗芒果糯米糍和燒味，

晚餐就五餸1湯，

白飯任裝!

客家咸雞

噚日半邊雞整咗蟲草花冬菇雲耳蒸雞，

其餘半邊雞就整咗客家咸雞喇!

加埋我至愛嘅薑蓉，

正到呢，

添飯呀!

蟲草花冬菇雲耳蒸雞

 

今日買咗1隻雞，

半邊醃咸嚟做咸雞，

另一邊就整咗呢碟蟲草花冬菇雲耳蒸雞。

豆豉鯪魚炒椰菜

雪櫃仲有半個椰菜，

開咗罐豆豉鯪魚嚟炒，

睇唔出兩樣加埋一齊炒又幾夾喎!

香煎蔥油雞扒

每次我整親雞時，

無論白切雞、豉油雞，

又或煎雞扒，

我哋一家都好鐘意點薑蔥蓉嚟食；

另外用D薑蔥蓉嚟撈麵和撈飯食，

嘻嘻，

真係要添飯架!

菜乾瑤柱咸排骨粥&韭菜花小炒皇

噚日大魔怪個肚又唔舒服，

瀉咗幾次，

所以今晚大家齊齊食粥清清腸胃，

今日食菜乾瑤柱咸排骨粥。

除咗煲粥，

我仲炒咗碟韭菜花小炒皇嚟送粥添呀!

(韭菜花、虎蝦乾、吊片、炒肉絲、腰果)

雪菜肉絲炒烏冬

今日小魔怪WFH，

午餐我哋三個人就食得簡單D，

雪菜肉絲炒烏冬，

炒咗3個烏冬全部食哂，

啱啱好呀!

加少少是拉差辣椒醬撈勻食，

好正架!

沙田萬怡酒店momo cafe週末自助午餐

 噚日，

我哋黃氏一家齊齊去拜父親大人，

之後就去咗沙田萬怡酒店momo cafe食週末自助午餐，

多謝姐姐請大家食自助餐，

11大人2長者，

原本姐姐訂位時有七折，

但現在只要有2位人士登上佢哋集團做新會員，

咁就全單5折；

呢間中午自助餐有生蠔、龍蝦、魚生、壽司、熱食、冷盆海鮮，

甜品、雪櫃、粥粉麵飯樣樣齊，

嘻嘻，

有咁嘅價錢$3530.4(13人)，

都好抵食呀!

生菜魚肉湯

今晚煮生菜魚肉湯，

清清哋有菜有魚肉，

加胡椒粉和麻油撈勻嚟食，

真係好鬼正架!

蝦醬海鮮炒飯

今日食蝦醬海鮮炒飯，

用咗蝦醬粉嘅飯特別香噴噴，

不論用海鮮、雞粒又或豬肉碎炒，

都一樣咁惹味架!

蔥油手撕雞

今日用咗2塊雞髀肉嚟整手撕雞，

呢個餸真係簡單又好味道，

鐘意食薑蓉嘅朋友仔一定鐘意食架!

滷豬手

屋苑附近原本賣澳洲冰鮮豬肉嘅舖頭，

依家轉咗賣新鮮豬肉，

除有特價優惠外(每斤$32起)，

買滿$50送2隻土雞蛋，

買滿$100就送5隻土雞蛋；

嘻嘻，

咁抵買，

我都唔執輸先得，

買咗豬手、排骨和梅頭瘦肉呀!

噚日已經滷定隻豬手，

今日先食好入味呀!

蒜頭豆豉南瓜炆排骨

上星期買咗片南瓜，

擺咗係雪櫃差D唔記得咗，

好彩老公提我，

唔係又嘥咗架啦!

老公鐘意食南瓜，

差不多大部份嘅南瓜都俾佢食哂呀!

拜山&元朗過橋麵檔

今日天朗氣清，

最啱返元朗舊屋拜山喇!

之後我哋就落元朗搵食；

小魔怪帶我、老公和姑奶，

4個人去元朗大坑渠旁邊果間過橋麵檔食雞，

呢度嘅咸雞係用新鮮雞整所以價錢比較貴少少，

我試過咸雞雞肉好滑，

係唔錯嘅；

小魔怪叫咗巴辣雞，

辣得嚟好惹味；

我和老公就叫咗海鮮豉油皇炒麵和干炒牛肉烏冬，

估唔到兩碟都大大碟，

好彩食得哂咋!

我哋仲叫咗兩款小食，

炸魷魚鬚和麻辣豬耳，

埋單$378呀!

屯門三聖食海鮮

今日，

我哋一家四口連同大仔女朋友和姑奶，

6個人齊齊去三聖食海鮮，

同埋慶祝姑奶生日呀!

我哋去咗關財記買海鮮，

再拎去附近青山灣漁港加工煮嚟食呀!

吉列炸魚柳

買咗1大包魚柳返嚟，

攞咗其2塊嚟整吉列炸魚柳，

炸到脆卜卜，

點沙律醬食就最啱喇!

節瓜鱆魚眉豆花生豬腱湯

噚晚大魔怪和女朋友仔係韓國返嚟啦!

嘻嘻，

有女朋友一齊去玩真係唔同D，

佢買咗好多手信俾我哋呀!

見佢一星期都冇飲過湯，

今日我買齊材料煲節瓜鱆魚眉豆花生豬腱湯。

咖哩薯仔雞翼

大魔怪同女朋友仔去韓國玩咗成個星期，

今日終於返嚟啦!

佢請咗5日假，

就可以由4月5日放到4月16日，

真開心呀!

開飯喇

呢排買餸對我嚟講真係好有驚喜，

菜和肉都好平呀!

$10有3個大節瓜，

菜芯大約$12斤，

雞蛋(湖北蛋)$40有30隻，

豬肉就因為商場內檔口開得比較多，

所以越賣越平!

節瓜粉絲煮蝦米&木耳榨菜蒸肉片，

呢度餐買餸錢加埋都唔使$50，

嘻嘻!

打虎頭錢有著落了。

冬菇雞肉煲仔飯

今日我突然好想食有味飯，

摷到冰箱有雞扒，

浸埋幾粒冬菇，

煮咗呢個冬菇雞肉煲仔飯，

不過小魔怪話爭咗少少嘢，

就係爭咗條臘腸呀!

蒜泥白肉

 

今朝買餸時落大雨，

我又冇帶遮，

所以求求其其買咗舊五花腩肉和菜就返屋企喇!

簡簡單單整咗碟蒜泥白肉做晚餐，

哈哈!

蒜香味好濃，

食完感覺個口好臭呀!

說走就走的港島遊~鴨脷洲

話說我同老公講我未去過鴨脷洲，

襯今日和明日搭港鐵有半價優惠，

老公就帶我去鴨脷洲行下喇!

老公用樂悠咭$1搭港鐵由天水圍去利東，

而我就用咗$14.3呀!

沙參玉竹蓮子茨實百合豬腱煲雞腳

我有一個習慣，

就係每次買雞返嚟整白切雞又或手撕雞時，

都會留起2隻雞腳雪係冰箱；

今次儲埋6隻雞腳，

就用咗佢哋嚟煲湯，

今日就煲咗沙參玉竹蓮子茨實百合豬腱煲雞腳。

蕃茄雞蛋燴牛肉碎

 

3個月冇整過頭髮，

我D白頭髮麵標哂出嚟喇!

今日花咗3個半鐘頭整頭髮呀!

返屋企前買咗個腸粉餐$18做下午茶，

同老公兩份食，

好味道呀!

晚餐就煮咗呢個蕃茄雞蛋燴牛肉碎，

大人細路都啱食，

撈飯一流架!

家常便飯

原本諗住今日清明節會返元朗舊屋拜山，

點知朝早落雨，

考慮到爬山會比較危險，

所以到最後都係取消了，

大家要遲D先再約時間再去拜山呀!

夜晚大魔怪女朋友仔嚟食飯，

佢哋聽日會去韓國首爾玩，

好開心呀!

金羅漢果菜乾排骨湯

大魔怪病咗成個星期後，

唔只有咳和鼻塞塞外，

講嘢仲沙沙哋好sexy添呀!

我見屋企仲有個金羅漢果，

即刻煲金羅漢果菜乾排骨湯，

俾佢潤下喉嚨呀!

酸菜魚

今晚整酸菜魚，

大小魔怪話仲咩咁好餸喎!

嘻嘻，

月頭嘛，

梗係手鬆少少架啦!

月尾就難講D喇!

欖菜肉碎炒豆角

第二道肉碎菜式係~欖菜肉碎炒豆角，

今次買咗長豆角嚟炒，

加咗十幾隻辣椒乾落去一齊炒，

少少辣，

好送飯呀!