休息咗幾日，
唔係偷懶，
而係可能前幾日(星期一)行山時，
自己鍛鍊不足，
攪到星期四朝早右邊身(近腰)痛到落唔到牀呀!
忍咗一日後終於頂唔順，
星期五去咗天水圍醫院睇急症，
醫生睇過唔似係坐骨神經痛，
大有機會係肌肉疲勞發炎，
打咗止痛針、食止痛藥和搽按摩膏，
今日已經好番好多啦!
呢幾日食咗幾餐飯盒，
今晚終於有番餐正常飯食啦!
清湯燉獅子頭，
好耐冇煮過呢個餸啦!
見今日屋企有齊材料，
煮番鍋嚟嘆下啦喂!
呢堂原本係1月初上堂的，
因為疫情關係，
推遲到兩星期先返呀!
今堂學搓麻糬芝麻方包和麻糬丸子黑豆包。
今日約咗大伯、大伯娘、姑奶、Amy、老公和我，
一行6人齊齊行屯門徑。
搭輕鐵614號車去景峰站落車，
行去怡樂花園旁邊樓梯，
出發行去置樂。
呢段屯門徑，
人哋行1個鐘左右，
我哋就行咗差不多2個鐘，
因為上樓梯我要行下抖下，
唔心急得呀!
好彩大家都好體諒我呀!
呢樽黃豆醬真係萬能，
蒸、煮、炆都得，
好方便呀!
平時用開柱候醬炆牛腩，
今日就試下用黃豆醬嚟炆，
配料有支竹和豆腐卜，
食落味道冇柱候醬咁濃味，
有黃豆香味；
支竹和豆腐卜索哂D汁，
認真好送飯架!
今次真係胡里胡淘(塗)啦!
20號天貓超市開始有優惠，
拿拿臨20號就落order，
今日下午就送到嚟喇!
淘咗一大堆嘢，
但點解好多都係重複咗???
最誇張係大碗麵，
本來每款淘兩個，
點知淘咗10個，
老公笑住話呢幾日早餐要捱杯麵呀!
睇番原來係我襟完又襟，
又冇再check單，
我認我錯了。
今日煮咗呢鍋燉排骨，
簡單好味又易做，
送飯真係一流架!
用呢個汁料，
煮排骨、牛腩或雞都可以架!
有包銀魚仔係雪櫃，
今日午餐就用佢嚟蒸豬肉餅，
老公超鐘意食銀魚仔，
佢話鮮味冇比喎!
之前買銀魚仔4兩$70，
依家應該仲貴D呀!
每次買鯇魚嚟蒸，
我都鐘意揀買近魚頭位嘅鯇魚的，
因為我覺得魚鮫位D魚肉好滑架!
另外，
我又鐘意加埋大頭菜又或梅菜嚟蒸魚，
夾埋一齊食特別惹味呀!
有冇人鐘意食魚泡???
我麻麻哋，
掉咗又可惜啊!
老公和小魔怪成日都話想食臘鴨髀，
今日終於買咗隻臘鴨髀返嚟，
加埋臘腸和鴨潤腸，
整咗呢煲臘味煲仔飯呀!
買咗1盒魚柳有3大條，
用嚟整炸魚柳就最啱喇!
小魔怪見到有炸魚柳食，
佢問我係咪自己炸，
仲問我成本高唔高???
我話魚柳廿蚊盒好平，
貴就貴在係用油炸呀!
靜靜話俾大家知，
3件魚柳炸起嚟太多了，
我分咗2餐嚟食，
即係10蚊左右食1餐呀!
終於清埋最後一份豬肉碎喇!
摷埋冰箱嘅魚肚出嚟，
解凍後就可以用嚟呢鍋粟米肉碎魚肚羹呀!
加埋隻蛋做蛋花，
快靚正，
唔使15分鐘就煮好，
開飯啦喂!
呢款係用豬肉碎整嘅第二道菜~黃豆醬豆角炆肉碎。
响街市買咗2扎豆角$10，
用咗其中一扎嚟炆豬肉碎；
咪睇好似好細扎，
呢度都有成三十條架，
每條再切開幾段，
炆埋就一大碟架啦!
呢個餸用嚟撈飯就最埋啦!
買咗1磅豬肉碎返嚟，
要諗下點用咗佢先得。
分咗幾次煮咗唔同菜式，
首先煮咗呢碟菜脯肉碎煎蛋。
今朝6點早起身得果3度，
真係凍到震；
好在8點幾9點開始出太陽，
先至冇咁凍咋!
中午煮咗碗熱辣辣嘅肉碎湯河粉食(加咗辣椒油)，
晚餐就煮咗煲南乳蓮藕木耳豆腐卜炆腩肉，
煲仔上枱熱辣辣，
食完飯好暖身架!
天氣咁凍，
係時候煮煲惹味煲仔飯食下啦喂!
雖然好耐冇煮煲仔飯，
但好在我都冇失手，
灼碟油菜就開得飯架啦!
今日靚湯~五指毛桃響螺湯。
我見今日凍凍哋，
摷個湯包出嚟
早早煲咗煲靚湯俾家人飲，
咁就中午和晚上都有得飲啦!
我係超市見到呢樽麻辣雞煲醬，
新出品未試過就買嚟試下啦喂!
今次唔整雞煲，
因為冰箱仲有1.5磅豬仔骨，
所以就整咗呢個麻辣排骨鍋喇!
個醬都幾濃味，
又麻又辣，
鐘意食麻辣嘅小魔怪和我，
食到lam lam脷，
但老公就話好麻辣囉!
响天貓超市淘咗包有機小米返嚟，
今日就用佢嚟煲咗鍋蕃薯小米粥做午餐；
老公話呢個蕃薯小米粥用嚟做早餐都唔錯喎，
仲叫我一齊食添呀!
吓，
咁我以後咪冇得落街嘆早餐囉!
屋企樓下菜檔賣嘅豆苗好靚，
條條都係豆胚冇莖架!
冬至時賣$40斤，
今日就賣$28斤，
見唔貴買咗1斤返屋企，
浸咗幾粒瑤柱嚟煮咗呢碟瑤柱扒豆苗喇!
一條蘿蔔分兩餐食，
真係超值呀!
噚日煮咗蘿蔔排骨煲，
今日就用蘿蔔嚟炒臘腸喇!
呢個餸由細食到大，
真係冇得輸呀!
正所謂~冬吃蘿蔔夏吃薑，
今日就買咗個蘿蔔返嚟煮蘿蔔湯喇!
用唐排嚟煮呢個蘿蔔湯，
真係好鮮甜，
加埋胡椒粒一齊煲，
好暖胃架!
老公話想食炆花生，
簡單啦!
買咗$6花生和1磅鳳爪返嚟，
炆咗一大碟花生炆鳳爪，
食到唔停得口呀!
今朝早去整頭髮，
所以冇去買餸，
午餐買個飯盒同老公兩份食，
晚餐食咩好???
摷下雪櫃睇下有咩可以煮嚟食先得。
之前收到奇華餅家公關送上的鮮肉臘腸和鮮鴨潤腸，
今日就用佢哋嚟炒大荷蘭豆呀!
平時食開扁扁細細嘅荷蘭豆，
第一次買咁大型嘅荷蘭豆嚟炒，
我問菜檔亞姐唔知好唔好食呢???
佢話食過就知係好嘢，
話我一定會番轉頭再買嚟食呀!
佢又講得冇錯喎，
大荷蘭豆真係好爽脆，
我應該會再買嚟食呀!
我哋一家四口子都鐘意飲呢個素湯，
因為全部材料都可以食番，
一D都唔會嘥架!
就連好硬嘅印度椰子，
老公和大魔怪都鐘意咬嚟食，
真係連湯渣都當飯食呀!
咁滋潤嘅素湯水，
平均每星期我都會煲一次架!
踏入2021年的第一天，
今日連寫兩篇blog呀!
在寒冷天氣警告下，
今日整咗支竹馬蹄羊腩煲嘆下啦喂!
圍爐取暖，
食住羊腩暖笠笠，
飲罐冰凍啤酒，
爽呀!
昨晚與家人一齊歡送2020，
迎接2021；
希望在明天，
明天會更好，
祝大家身體健康!
