清湯燉獅子頭

清湯燉獅子頭，

好耐冇煮過呢個餸啦!

見今日屋企有齊材料，

煮番鍋嚟嘆下啦喂!

材料: 豬肉碎1磅(半肥瘦)、娃娃菜2棵、蛋1隻、清雞湯2碗、蔥粒、

薑3片、生粉適量

醃料: 豉油1湯匙、鹽半茶匙、糖1茶匙、麻油、生粉、水2湯匙、胡椒粉

做法: 將豬肉碎放入大碗內，加入雞蛋和醃料攪勻，

撻下D豬肉至起膠狀，放入雪櫃內雪1小時；

娃娃菜切去菜頭，洗淨後瀝乾水份；

將豬肉碎分成4份後搓成大肉丸，係肉丸面撲少許生粉，

放落油鑊炸至微微金黃色上碟(肉丸炸至表面定型便可)；

將2/3份娃娃菜舖入鍋內，加入大肉丸、薑3片、清雞湯2碗和水1碗，

再舖埋其餘1/3份娃娃菜係大肉丸面，

開火煮滾後，轉小火慢慢燉30分鐘，最後灑上蔥粒便成。

~豬肉碎最好用半肥瘦豬肉，咁個肉丸會滑溜好多架；

~仲有豬肉丸可能拌入馬蹄和冬菇做餡料，咁個大肉丸食落層次更豐富呀!

   

 

 

大家可以入嚟Facebook讚下我新開嘅Fans專頁呀!

 雀后(添飯)Facebook Fan Page