排骨鴛鴦臘腸煲仔飯

天氣咁凍，

係時候煮煲惹味煲仔飯食下啦喂!

雖然好耐冇煮煲仔飯，

但好在我都冇失手，

灼碟油菜就開得飯架啦!

材料: 米2杯半、排骨$40、鴛鴦臘腸2條(鮮肉臘腸、鴨潤腸)、

蔥粒、臘味煲仔飯、油少許

醃料: 豆豉、蒜蓉、豉油1湯匙、鹽半茶匙、糖1茶匙、生粉1茶匙、麻油少許

調味: 煲仔飯豉油適量

做法: 臘腸用熱水沖洗後切片備用；排骨洗淨後，落醃料醃30分鐘；

洗2杯半米後浸10分鐘，將米放入鍋內加2杯半水(量米杯)，

用中火煲約4~5分鐘至冒煙或差不多乾水後(即飯表面有細孔)，

用筷子係飯面拮十幾個窿窿後，將排骨和臘腸片平均放係飯面，

轉最細火煲多20分鐘，期間需要將煲在煮食爐上下左右移動，

使飯焦平均分佈，熄火前，沿鍋邊灑上紹酒和油(等油和酒透入鍋內)，

熄火後唔好開蓋焗10分鐘，最後加蔥粒和調味，撈勻食得!

~P.S: 煮食爐火力大，飯焦就會燶D好味D；

又或可以在未落餸之前，攪攪煲底嘅飯，

咁就唔會有太多飯焦和濃底架啦!

~今之冇用LC煲，驚驚哋會黐底，所以搽咗少少油係鍋底先落米呀!

~點解要係飯面拮窿窿，係想D熱力容易蒸熟排骨和臘腸呀!

  

大家可以入嚟Facebook讚下我新開嘅Fans專頁呀!

 雀后(添飯)Facebook Fan Page