雲腿花膠雲吞雞

休息咗幾日，

唔係偷懶，

而係可能前幾日(星期一)行山時，

自己鍛鍊不足，

攪到星期四朝早右邊身(近腰)痛到落唔到牀呀!

忍咗一日後終於頂唔順，

星期五去咗天水圍醫院睇急症，

醫生睇過唔似係坐骨神經痛，

大有機會係肌肉疲勞發炎，

打咗止痛針、食止痛藥和搽按摩膏，

今日已經好番好多啦!

呢幾日食咗幾餐飯盒，

今晚終於有番餐正常飯食啦!

材料: 雞1隻、花膠2隻(已發)、雲腿(金華火腿)適量、瑤柱8粒、

雲吞餃子20隻、小棠菜適量、薑6片、水10碗、蔥花

做法: 雞洗淨去頭尾後，將雞、薑3片放入熱水鍋內出水5分鐘後沖水備用；

小棠菜洗淨；雲腿(金華火腿)切片後放入熱水灼一灼後撈起；瑤柱略浸；

燒熱10碗水落雞、花膠、雲腿(金華火腿)、瑤柱和薑3片用中火煮滾，

轉小火慢慢滾1.5小時；用另一個小鍋將雲吞餃子灼熟；

將小棠菜放入雞湯內煮至番滾後加鹽調味，

落埋灼熟嘅雲吞餃子滾多1分鐘後，灑上蔥花便成。

~預先將花膠浸軟後連同薑和蔥段，放入熱水鍋內滾15分鐘熄火，

焗至水涼後剪段，裝入盒放入冰盒，咁就隨時想食都得啦!

~蔬菜方面，可揀白菜、娃娃菜、小棠菜和津白都可以呀!

~雲吞餃子方面，我買咗灣仔碼頭大餃子~三鮮和韭菜豬肉呀!

     

 大家可以入嚟Facebook讚下我新開嘅Fans專頁呀!

 雀后(添飯)Facebook Fan Page