香煎蔥油雞

 呢幾餐食埋雪櫃果D凍肉後，

又係時候要去入貨喇!

但雪櫃個冰箱唔大，

所以唔可以盡情入貨囉!

今餐就用雞扒嚟整呢碟香煎蔥油雞，

煎到D雞皮脆卜卜，

加埋蔥薑蒜油嘅香味，

真係絕配呀!

材料: 雞扒1塊、蔥粒、薑蓉、蒜蓉、炒香芝麻

醃料: 幼鹽半茶匙、胡椒粉適量

蔥油調味: 鹽少許、胡椒粉少許、麻油少許、水4湯匙

做法: 雞扒解凍後用廚紙索乾水份，係雞扒厚身位界幾刀，落醃料醃一陣；

燒熱鑊不需落油，放入雞扒先煎有雞皮果面，

慢慢煎出雞油後，反轉煎另一面，其間蓋上鑊蓋將雞扒煎熟；

重覆煎雞扒兩面至熟後，將雞扒切件放入碟內；

原鑊不需落油加入蔥粒、薑蓉和蒜蓉炒香，落埋蔥油調味和芝麻煮滾，

將蔥油汁淋在雞扒面或旁邊便成。

 

  

大家可以入嚟Facebook讚下我新開嘅Fans專頁呀! 

雀后(添飯)Facebook Fan Page