麻辣雜錦煲

2022年第一煮~麻辣雜錦煲!

小魔怪初頭話唔辣呀!

點知當個麻辣汁越煮越濃味後，

佢終於食到口水鼻涕都出哂嚟，

最後要飲罐冰凍啤酒嚟解辣呀!

話時話今次係廳度炒呢個麻辣煲，

D辣味辣到老公和大魔怪都頂唔順，

佢哋要入房避一避呀!

材料: 豬肚、肥牛、蝦仁、雜丸、福花菜、蓮藕、薯仔、洋蔥、

薑片、蒜蓉、乾蔥頭、辣椒乾適量、紹酒

調味: 麻辣雞煲醬半樽、清雞湯300ml、豉油1湯匙、老抽適量、鹽適量

做法: 急凍豬肚放入鍋內加水，落薑2片、紹酒1湯匙、鹽和白胡椒粒，

出水45分鐘後，取出沖水切開豬肚去肥膏後切絲；蓮藕和薯仔去皮切片；

洋蔥去皮切絲；將雜丸、福花菜和肥牛先灼熟備用；

燒熱鍋落油，加入蒜蓉、薑片、乾蔥、辣椒乾和洋蔥炒香後，

落豬肚絲和麻辣醬炒勻後，加蓮藕、薯仔片、清雞湯、調味和水煮滾，

 

煮15分鐘後，落埋肥牛、雜丸、福花菜、蝦仁煮至翻滾便成。

~呢度買咗$150左右材料，煮起一大煲，抵食過出街食呀!

 

  

大家可以入嚟Facebook讚下我新開嘅Fans專頁呀! 

雀后(添飯)Facebook Fan Page