麻辣大雜錦

今晚煮咗呢個麻辣大雜錦，

有鮑魚、蝦、雞髀肉、雜丸、薯仔、福花菜，

大小魔怪做咩今餐咁好餸，

我話呢D全部都係屋企已有物資嚟，

要清雪櫃就要食得豪D呀!

用埋呢半樽麻辣雞煲醬，

麻麻香香，

超正呀!

攞咗個11吋嘅大蘿蔔糕兜嚟裝呢個麻辣大雜錦，

我以為會食剩好多啦!

點知最後食剩一個飯碗左右嘅餸，

可想而知我哋幾大食呢!

材料: 雞髀2隻、蝦1磅、急凍鮑魚12隻、薯仔1個、福花菜半個、

雜丸1磅、薑5片、乾蔥頭3個(切片)、蒜蓉、辣椒乾、紹酒1湯匙、水少許

醃料: 豉油1湯匙、鹽少許、糖1茶匙、生粉1茶匙、麻油少許、紹酒少許

調味: 麻辣雞煲醬半樽、鹽適量、糖1.5茶匙、老抽(調色)

做法: 雞髀起肉切件後，落醃料醃1小時；蝦解凍後剪蝦鬚和挑蝦腸；

薯仔去皮切片；福花菜用鹽水浸15分鐘；將蝦煎至兩面轉色後盛起；

燒熱水先將雜丸灼熟後撈起備用；落薯仔片和福花菜灼2分鐘後撈起；

燒熱油鑊落薑、乾蔥片、蒜蓉和雞件，略煎兩面至微焦黃後，

贊紹酒炒勻，落麻辣雞醬和辣椒乾炒香後加大半碗水煮至雞肉熟(約5分鐘)，

加埋鮑魚、蝦、雜丸、薯仔片和福花菜炒勻，蓋上鑊蓋煮多3分鐘至汁濃，

按個人口味落鹽、糖調味和老抽調色便成。

大家可以入嚟Facebook讚下我新開嘅Fans專頁呀!
 

雀后(添飯)Facebook Fan Page