雀后~歡迎!歡迎蒞臨朱家天地!: 辣豆瓣魚

2020年5月4日星期一

辣豆瓣魚

今朝一早起身行去天瑞河旁散步做運動；

自疫情以嚟，

今日河畔人流較前兩個月多咗好多人，

可能大家都宅在家有一段日子，

係時候要出嚟曬曬太陽了。

行咗1個鐘出一身汗，

入咗天瑞冷氣街市涼冷氣兼買餸，

一份鲛魚$45，

咁抵梗係要買嚟食啦!

今晚就煮咗呢碟~辣豆醬魚。

材料: 鲛魚4件、薑6片、蒜蓉、蔥粒、辣椒仔3隻(切粒)、辣豆瓣醬2茶匙、

紹酒少許、生粉2湯匙、生粉水適量

醃料: 鹽2茶匙、胡椒粉適量

調味: 蠔油1湯匙、豉油半湯匙、老抽半湯匙、糖2茶匙、大半碗水

做法: 鲛魚洗淨後，用廚紙索乾水份，加入醃料醃2小時；

從雪櫃取魚待室溫半小時後，撲上生粉，

放入熱油鑊內炸至兩面金黃或脆身後上碟；

原鑊落薑片、蒜蓉和辣豆瓣醬炒至出紅油後贊酒，落埋調味煮滾後，

加入生粉水埋芡汁，加蔥粒炒勻後，將豆瓣汁淋上魚上面，

灑上辣椒粒裝飾便成。

~其實辣椒粒可以放入汁料度一齊炒，但老公唔食得好辣，

所以用嚟裝飾了。