雀后~歡迎!歡迎蒞臨朱家天地!: 蟲草花胡椒豬肚雞湯

2020年3月8日星期日

蟲草花胡椒豬肚雞湯

話說今朝有人半夜起身睇電視，

見到有個節目介紹煲胡椒豬肚湯，

就係咁，

當我起身後就話要飲呢個湯喎!

我見依家排骨和雞都係差不多價錢，

所以決定煲咗呢個蟲草花胡椒豬肚雞湯喇!

材料: 新鮮豬肚1個、雞1隻、蟲草花適量、粟米1條、馬蹄12粒、

胡椒粒1湯匙、杞子2茶匙、大紅棗8粒、薑6片、紹酒2湯匙

做法: 豬肚去肥膏後反轉，用粗鹽反覆洗3次，再用粟粉洗2次，

沖洗乾淨後，將豬肚、薑3片和紹酒1湯匙放入熱水鑊內出水5分鐘，

取出豬肚清除豬肚上內白模部份；

雞洗淨後斬件，放入熱水鑊內出水2分鐘後盛起備用；蟲草花和杞子略浸；

粟米去皮切件；馬蹄去皮；白胡椒粒略拍碎；大紅棗去核；

燒熱10碗水，加入所有材料煲1小時15分鐘(蟲草花和杞子除外)，

取出豬肚切片後，將豬肚、蟲草花和杞子放入煲內繼續煲多15分鐘，

最後加鹽調味便成。

~洗豬肚一定要洗得乾淨和去豬肚表面嘅白膜，唔係個湯就會有苦味；

~今日買呢個新鮮豬肚都係$55；

~至於雞呢，我係雞檔內買的冰鮮雞$70嚟架!

~冇去皮嘅雞都幾多油，不過用匙羹"畢"起佢就得。