吉列炸魚柳

今晚炸咗一大碟吉列魚柳，

小魔怪見到食香口嘢緊係興奮~一陣咁多啦!

佢話喎，

炸魚柳緊係要配埋炸薯條架啦!

點解唔炸埋薯條喎!

妳哋話，

佢係咪想激C我吖!

五指毛桃湯

是咁的，

話說今日煲呢個五指毛桃湯包，

買咗排骨、粟米和甘筍一齊煲；

見粟米$10有3條，

睇都冇睇就買咗返屋企，

點知返到屋企拆開煲湯先知原來係糯米粟，

口感較"煙韌"，

應該冇超甜粟咁好食架囉!

不過我見落緊雨兼懶唔想再落街，

唯有照煲可也。

蜜汁香草焗雞扒配露筍炒本菇

天氣開始熱，

真係冇咩心機開鑊煮餸，

簡單開個焗爐嚟焗雞扒，

跟手炒埋個蒜蓉露筍炒本菇，

開飯囉!

邪惡誘惑~黃金蝦

小魔怪買咗盒越南大蝦返嚟，

問我點煮好???

哈哈，

我見好耐冇食過黃金蝦，

一於今日煮佢啦!

一碟超級邪惡誘惑~黃金蝦，

出爐啦!

素煮意~露筍雜菌芝士汁燴意粉

今日大魔怪的素午餐~露筍雜菌芝士汁燴意粉，

用咗 mozzarella&cheddar 芝士碎，

大魔怪話唔夠香濃喎，

咁我下次用番片裝芝士煮個汁先得。

西洋菜羅漢果紅蘿蔔咸鴨腎豬腱湯

今日好想飲西洋菜湯，

買個豬腱嚟煲就最啱喇!

因為豬腱肉冇骨，

所以飲湯食西洋菜時就唔怕食到骨碎啦!

今次加多半個羅漢果落去一齊煲，

有清熱潤肺、化痰止咳等功效。

氣炸鍋回歸~芝士焗大啡菇(素)

買咗1pack2個大啡菇返嚟$12，

簡單用氣炸鍋焗咗2個芝士焗大啡菇俾大魔怪做午餐；

由於煮素嘅關係，

焗啡菇餡料我冇落煙肉，

而係改咗落啡菇蒂粒和紅黃椒粒，

第一次用氣炸鍋焗呢個大啡菇，

睇落同焗爐焗都冇咩分別，

一樣咁juice呀!

滷水蛋、豆腐&雞翼

一次過買咗1盆30隻雞蛋放係雪櫃，

緊係要搵D嘢攪下啦!

原本諗住用10隻嚟整滷水蛋，

點知整完後有人話想試食喎，

試下試下又話食得唔夠喉，

於是又加多5隻雞蛋，

滷豆腐和雞翼落去一齊滷喇!

紅燒小排骨

買咗較薄身嘅排骨返嚟，

用嚟蒸好似冇咩肉食，

所以就用咗紅燒嘅方法嚟煮，

排骨酸酸甜甜食落幾惹味，

除滿足口福外

對成日話減肥唔食咁多肉嘅我嚟講，

排骨細細粒，

食多幾粒都唔怕肥啦!

露筍炒牛肉

依排D露筍好嫩好爽脆，

又唔係貴喎，

一扎10條(幼)大約$5左右，

今次就買咗2扎嚟炒牛肉，

近排多咗買牛肉嚟食，

因為平過食豬肉呀!

青紅蘿蔔粟米花膠螺頭排骨湯

朱家老火湯又出爐啦!

今日煲青紅蘿蔔粟米花膠螺頭排骨湯，

見冰箱仲有花膠和螺頭，

放埋落去一齊煲，

滋陰、養顏又充滿骨膠原，

啖湯美味到不得了啊!

媽媽休息日

今日大小魔怪25歲正日生日，

除慶祝佢哋生日外，

亦都係媽媽(我)嘅休息日，

晚餐唔煮飯，

叫外賣pizza食呀!

茶葉蛋

大魔怪話好耐未食過茶葉蛋，

呢個易啦!

雖然整出嚟個樣唔係咁靚，

但咸咸香香都幾好味架!

扮上菜~蠔皇海螺片冬菇蠔豉燴鴨腳

母親大人係星期六攞咗樽蠔豉俾我，

雖然唔係好大隻，

但用嚟煲冬菇鴨腳都唔錯架!

加埋罐蠔皇海螺片落去，

哈哈，

真係可以出得廳堂扮上菜架!

大小魔怪&祈祈生日會

由於肺炎疫情嘅關係，

祈祈取消了上個的生日會，

推遲到今個月聯同大小魔怪一齊開生日party呀!

話時話，

祈祈9歲，

而大小魔怪已經25歲喇!

氣炸鍋回歸~燒豬仔骨

响佳寶買咗1.7磅豬仔骨返嚟，

整咗呢碟燒排骨，

有燒排骨食但冇啤酒飲，

好失敗啊!

吹筒仔蒸肉片

依家真係百物騰貴，

食得或唔食得都加價加得好犀利呀!

見到有吹筒仔賣，

買咗4兩($70)返屋企慢慢食，

今日午餐就攞咗幾隻嚟蒸肉片喇!

豉汁芋頭蒸排骨

小魔怪鐘意食芋頭，

今日就買咗半個芋頭嚟蒸排骨；

揀芋頭要揀輕身和內裡紫紋多嘅，

咁通常呢類芋頭會較粉甜呀!

家常便飯

今日呢餐好簡單，

青瓜炒牛肉和氣炸CP辣雞翼；

平時我會買牛柳肉嚟炒，

今次就多口同牛肉佬話買$30牛肉用嚟炒嘅，

就係咁，

佢切咗呢舊牛肉俾我，

份量緊係比牛柳肉多啦!

素煮意~野生竹笙雜菌燴脆麵

大魔怪話想食竹笙和脆脆麵，

拿拿臨買材料煮俾佢食。

今次買咗包冇漂白嘅野生竹笙，

睇個樣啡啡黑黑有點怪，

但食落好爽口，

又唔錯喎!

蟲草花胡椒豬肚雞湯

話說今朝有人半夜起身睇電視，

見到有個節目介紹煲胡椒豬肚湯，

就係咁，

當我起身後就話要飲呢個湯喎!

我見依家排骨和雞都係差不多價錢，

所以決定煲咗呢個蟲草花胡椒豬肚雞湯喇!

蜜汁叉燒

之前係燒臘舖買咗半斤叉燒要成$50，

好似好貴咁喎!

而且份量都唔係多，

食到到喉唔到肺；

噚日就去咗天盛營火買咗冰鮮梅頭肉，

咁大舊都係$55，

用嚟整蜜汁叉燒就最啱喇!

芥蘭炒牛肉

今日去街市買咗斤芥蘭苗$10，

真係嫩口過我呀!

而芥蘭配牛肉就真係絕配喇!

簡單炒埋一碟，

開飯囉!

食椒抗疫~黑椒三色椒炆排骨

記得之前三色椒都係十一、二蚊左右，

但依家要賣成十五蚊呀!

今日簡單煮咗碟小菜~黑椒三色椒炆排骨，

三色椒營養豐富，

除咗有維他命A、C外，

仲有好多好處架，

想知更多click入去睇下啦~三色椒營養價值。

等我哋齊齊食椒抗疫啦!

咖哩薯仔洋蔥炆雞翼

買咗包BB薯仔$5返屋企，

1包都有成8粒BB薯架!

用嚟炆雞翼就最啱喇!

但係咁，

BB薯仔太細粒，

去皮真係有少少煩啊!

(我見有人唔去皮成個BB薯仔就咁煮呀!)

材料: 雞翼12隻、BB薯仔8粒、洋蔥1個、蒜蓉、老抽少許

醃料: 豉油1湯匙、鹽半茶匙、糖1茶匙、生粉1茶匙、麻油少許

調味: 李X記咖喱醬2大匙

做法: 雞翼解凍後，落醃料醃1小時；BB薯去皮切件；洋蔥去皮切絲；

燒熱油鑊落雞翼略煎兩面，加入蒜蓉、薯仔和洋蔥快炒數十下後，

落埋咖哩醬炒勻，加入1.5碗水炆雞翼約12~15分鐘左右，

最後加少許老抽調色便成。

   

 

  

大家可以入嚟Facebook讚下我新開嘅Fans專頁呀!  

雀后(添飯)Facebook Fan Page

鹽燒鯖魚

响日本餐廳食鯖魚，

半邊都要起碼四、五十蚊啦!

前幾日係百佳買鯖魚(半邊)都係$7.9，

呢度夾埋1條都唔使$16呀。

XO醬青瓜豬扒

呢日又係食雪櫃物資~豬扒；

配上5條日本青瓜仔，

仲有我至愛嘅XO醬，

惹味得嚟又爽口，

正呀!

滷水雞翼腸仔魚蛋

今日用李X記滷水汁煮咗一大鍋雞翼腸仔魚蛋，

簡簡單單又好味道架!

另外，

又俾我係雪櫃摷到條紅腸出嚟，

唔使講咁多，

即刻煎埋佢嚟食呀!

哈哈，

睇嚟我個雪櫃D物資都幾豐富喎!