柱候蘿蔔牛肚牛筋腩

 

今日買咗牛肋條(牛腩)、牛肚和牛筋返屋企，

一次過炆咗一大鍋牛肚牛筋腩，

未加蘿蔔前先裝起部份雪入冰箱，

咁就隨時想食時，

就有得加餸啦!

材料: 急凍牛肋條(牛腩)3磅、急凍牛肚1磅、急凍熟牛筋1磅、蘿蔔1條、

薑10片、滷包1個、紹酒2湯匙、熱水6碗(約)、蔥粒

調味: 柱候醬2湯匙、蠔油1湯匙、豉油1湯匙、老抽適量、冰糖適量 

做法:凍水落鑊加牛腩、牛肚、薑3大片和紹酒1湯匙，

煮滾出水10分鐘，取出沖洗後，牛腩切大粒；牛肚切條；

熟牛筋切件；蘿蔔去皮切件(皮批深D，蘿蔔會冇渣)；

凍鍋落油，落薑6片煎香後，加入牛腩和牛肚炒勻後，沿鑊邊贊紹酒1湯匙，

加調味、冰糖、滷包和熱水6碗煮滾(水要蓋過牛腩)，

轉小火慢慢炆1小時，加熟牛筋炆多30分鐘後熄火，唔好開蓋焗2小時；

飯前開中小火煮滾牛腩，加入蘿蔔炆多30分鐘至收汁，

按個人口味落鹽調味，最後灑上蔥粒便成。

~呢個柱候蘿蔔牛筋腩金錢肚，隔日食仲入味，牛肚會再腍身D呀!

~炆牛腩時如發現冇哂汁嘅話，可以加入適量熱水繼續煮呀!

~炆咗一大煲牛腩牛肚，可以裝起部份入盒放入冰箱儲存呀!

~點解加滷包，係因為我屋企冇哂八角和桂皮呀!

 

  

大家可以入嚟Facebook讚下我新開嘅Fans專頁呀! 

  

雀后(添飯)Facebook Fan Page