雪菜火鴨絲炆米

噚日買咗半邊燒鴨做餸，

 食剩哂D厚燒鴨肉，

今朝就用佢嚟炆咗碟雪菜火鴨絲炆米；

我鐘意用天鵝牌米粉(泰國製造)嚟做呢碟炆米，

因為呢隻牌子米粉炆幾耐都唔易斷，

夾起嚟唔會碎濕濕呀!

2個米粉炆起好大碟，

我和老公2個人都食唔哂，

又可以食多一餐啦!

材料: 燒鴨胸肉8件、即食雪菜1包、椰菜1/4個、甘筍半條、米粉2個

調味: 蠔油1湯匙、豉油1湯匙、香菇粉1茶匙(可以唔落)、

糖1茶匙、鹽少許、水1碗

做法: 燒鴨拆肉切絲；椰菜切絲；甘筍去皮切絲；

米粉用水浸軟後隔去水份備用(米粉過長可以剪斷)；

即食雪菜沖沖水後瀝乾水份，不需落油用白鑊炒乾，

加燒鴨肉、半茶匙糖和麻油炒勻上碟備用；

原鑊落少許油炒椰菜和甘筍，落米粉和調味煮炆至汁濃後，

加雪菜鴨肉炒勻，最後加少許老抽調色便成。

(記得留起少少雪菜火鴨絲，放在碟面裝飾。)

~呢包米粉係佳寶買架!

    

大家可以入嚟Facebook讚下我新開嘅Fans專頁呀!

雀后(添飯)Facebook Fan Page